Ahaz di Juda na'am la yɛla
16
1 Remalaya biig Peka da di na'am yʋma pii nɛ ayɔpɔi la ni ka Jotam biig Ahaz da di Israel na'am. 2 Ahaz da anɛ yʋma pisi ka di na'am Jerusalem tempʋʋgin. O da zin'in Juda na'am gbauŋ la zug nɛ yʋma pii nɛ ayuobʋ. On da ka' wʋʋ o yaab David n da an si'em la. O da pʋ tʋm linɛ dɔl suor Zugsɔb onɛ aan o Wina'am la nini nii. 3 O da dɔlnɛ suobanɛ ka Israel na'anam da dɔl la, hali ka nɔk o biigi maal maannɛ nyu'oe bugum. Tʋʋmkisa bama zug ka Zugsɔb la da yis kʋdimin dim ka nɔk teŋ la tis Israel dim la. 4 Ahaz da maan maana ka nyu'od bʋnnyubisa maana zin'isin nɛ kʋkʋna zug nɛ tibɛda wʋsa gbinnin.5 Aram Na'ab Rezin nɛ Remalaya biig Peka onɛ da an Israel Na'ab la da la'as taaba keŋ ye ba zab nɛ Na'ab Ahaz ka lɔbi gilig Jerusalem teŋ la, amaa ba da pʋ nyaŋ oo. 6 Saŋkan la Aram Na'ab Rezin da nyaŋi kad Juda nidib la yis Elaf teŋin ka di'e lɛbisi tis Aram. Ka Edom dim la keŋ zin'in Elaf teŋin ti paae zina. 7 Na'ab Ahaz da tʋm ye ba yɛl Asiria Na'ab Tigilaf-Pilesa ye, “Man anɛ fʋ sankpan'as nɛ fʋ zabzabid. Kem na faanmi yis Aram nɛ Israel Na'abanɛ zabid nɛ mam la nu'usin,.” 8 Ahaz da nɔk anzurifa nɛ sanlima linɛ bɛ Zugsɔb Pʋ'ʋsim Yin la, nɛ la'ad linɛ bɛ suak zin'igin na'ayin la, mɔri keŋ tis Asiria Na'ab la piini. 9 Asiria Na'ab la da siakya ka keŋ zab nɛ Damaskus dimi nyaŋi ba. O da gban'e teŋ la nidibi keŋ Kir ka kʋ Rezin onɛ aan ba Na'ab la.
10 Na'ab Ahaz da keŋ Damaskus ye o pʋ'ʋs Asiria Na'ab Tigilaf-Pilesa. O da nyɛ maan bimbim Damaskus tempʋʋgin ka maki li ka kɛ ka ba keŋ pa'al Uria onɛ an maanmaan la suobanɛ ka ba na dɔlisi maali li buudi. 11 Alazug Uria onɛ an maanmaan la da mɛ bimbim la wʋʋ Na'ab la maki li Damaskus si'em pa'al la. O da mɛnɛ naae ka Na'ab Ahaz nyaan lɛbi kul. 12 Na'ab la da yi Damaskus n lɛb na ka nyɛ maan bimbim la, o da keŋi li tuon ka maal maana li zug. 13 O da maal nyu'or maan nɛ zʋʋd maan, ka kpa'ae bʋnnuuda maan la li zug ka nɔk maan linɛ an taaba la'asʋg maan ziim la misig bimbim la. 14 Kʋntzɛn'ug maan daka kanɛ an Zugsɔb la din la da zi'enɛ bimbim paal la nɛ Zugsɔb Pʋ'ʋsʋg Dɔɔg la teŋsʋk, ka Ahaz nɔki li lɛbisi zi'el bimbim paal la datiuŋ baba. 15 Na'ab Ahaz yʋ'ʋn da tis Maanmaan Uria nɔɔr ye, “Maan bimbim tita'ar paal la zug ka fʋ na maal bɛogʋn nyu'or maan nɛ zaam zʋʋd maan nɛ na'ab la nyu'or maan nɛ o zʋʋd maan nɛ nidib la wʋsa nyu'or maan nɛ ba zʋʋd maan nɛ ba bʋnnuuda maan la. Nɔkim nyu'or maan nɛ maan bama la ziim misig bimbim nwa. Amaa kʋntzɛn'ug maan daka la na an man mɛŋ-mɛŋ din. Ani ka m na bʋgʋd ka baŋid linɛ na niŋ.” 16 Ka Uria onɛ an Maanmaan la da niŋ nwɛnɛ Na'ab Ahaz n da pa'al ye o niŋ si'em la.
17 Na'ab Ahaz da nɔk tɛrekonam linɛ mɔr ku'om zi'esa li zug la ka yisi li bʋnlamma nɛ ku'om laas la. O da yis Atɛuk laa dinɛ sʋn'e kʋntzɛn'ug na'araad la zugin la digil kuga zug. 18 O da nɔk Vʋ'ʋsʋm Daar fuug linɛ ka ba da nɔki maal Pʋ'ʋsʋg Zin'igin la yis, ka yɔ' na'ayir suor linɛ kpɛn'ɛd Zugsɔb Pʋ'ʋsim Yin la baba. O da niŋi linɛ ye li ma'ae Asiria Na'ab la sʋʋnr.