Israel Na'ab Hosea yɛla
17
1 Na'ab Ahaz n da di Juda na'am la yʋʋm pii nɛ ayi' la, Ela biig Hosea da di Israel na'am Samaria tempʋʋgin, ka zin'in na'am gbauŋ la zug yʋma awai. 2 O da tʋm bɛ'ɛd Zugsɔb la tuon, amaa li da pʋ paae Israel na'abanɛ gaad la. 3 Asiria Na'ab Salmanɛser da keŋ ye o zab nɛ Hosea, ka o da sie o mɛŋi lieb Salmanɛser tʋmtʋm ka la'asid la'adi yɔɔd o yʋʋm wʋsa. 4 Amaa Asiria Na'ab la da baŋ ye Hosea ka' sida sɔba, bɔzugɔ o da tʋm nidib ye ba keŋ maal zuod nɛ Soo onɛ an Egipt Na'ab la, ka pʋ lɛn la'asid yʋʋm-yʋʋm yɔɔd la tisid Asiria Na'ab la ya'asɛ. Alazug Salmanɛser da gban'e o niŋ sanrega ni.5 Asiria Na'ab da keŋ kpɛn' Israel teŋin la wʋsa lɔbi gilig Samaria tempʋʋgʋ digi guri li yʋma atan'. 6 Hosea na'am la yʋma awai saŋa, Asiria Na'ab la da nyaŋ Samaria ka gban'e Israel dim la mɔri keŋ Asiria teŋin. O da paae zin'ili ba nɛ Hala teŋ kanɛ kpi'e Habor kɔldaug ka bɛ Gozan sʋ'ʋlimin la nɛ Media dim tempʋʋdin la.
7 Nɛ' wʋsa da niŋnɛ Israel dimi da tʋm bɛ'ɛdi tisi ba Zugsɔb onɛ aan ba Wina'am la, onɛ da yisi ba Egipt teŋin na ka faaɛn ba yi Na'ab Faaro nu'ugin la. Ba da dɔlnɛ winsieba, 8 ka dɔl buudbanɛ ka Zugsɔb da kadi baa yis ka di'e teŋ la tisi ba la malima nɛ malimbanɛ ka Israel na'anam da pin'il la. 9 Israel dim la da su'adi maan linɛ ka' sʋ'ʋm tisidi ba Zugsɔb Wina'am la, ka li pʋ dɔl suorɛ. Lin da yi dɔwɔk kanɛ ka ba zin' gur la, ti paae tembanɛ kpi'em la ba da mɛ teŋgbana nɛ maana zin'isi ba tɛɛnsin la wʋsa. 10 Ba da kpi'e kuga zi'el nɛ Asera dazi'eda ba' kʋkʋna wʋsa zug nɛ tibɛda wʋsa gbina ni. 11 Ba da nyu'od bʋnnyubisa maana zin'ig wʋsa nwɛnɛ nimbanɛ da bɛɛ anina tʋm si'em ka Zugsɔb la da kadi ba yis la. Ba da tʋm bɛ'ɛd hali, ka li daam Zugsɔb la ka o sʋʋnr duoe. 12 Ba da maan nɛ bada, la'am nɛ Zugsɔb la da yɛl ye, “Li pʋ nar ye ya tʋm nɛ' la.”
13 Zugsɔb da pʋn kɛ ka o nɔdi'esidib nɛ banɛ nyɛt la sa'al Israel nɛ Juda dim ye, “Fɛndigimi ka basi ya suobɛ'ɛd la, ka dɔllini m nɔzi'ela nɛ m gban'ar la, ka li dɔl nɛ wadbanɛ ka m yammis banɛ aan m nɔdi'esidib la da tu'asi tisi ya yaanam la wʋsa.” 14 Amaa ba kʋ kɛlisɛ ka ba zug mɛ kpi'em wʋʋ ba yaanam banɛ da pʋ niŋi ba Zugsɔb Wina'am yadda la. 15 Ba da zan'as o gban'ar nɛ o nɔnaar linɛ ka o naal nɛ ba yaanam nɛ nimmua sa'al banɛ ka o da tisi ba la. Ba da dɔl ba'ayɔɔd hali ti kɛ ka ba mɛŋ lieb ninyɔɔd. Ba da tu'as ninsieba banɛ da bɛ tembanɛ da giligi ba la, la'am nɛ Zugsɔb la da pʋn yɛli ba ye ba da tʋm wʋʋ temban nidibi tʋm si'em la. La'am nɛ wala, ba da tʋm wʋʋ nimbama tʋm bɛ'ɛd si'em la. 16 Ba da zan'as Zugsɔb onɛ aan ba Wina'am zi'ela la wʋsa ka ya'abi ba mɛŋ bada ayi' wʋʋ na'apɔla ka mɛ maal Asera dazi'eda. Ba da igini zun'od nwadbibis wʋsa ka wɔ'ɔgid Baal. 17 Ba da kɔtidnɛ ba biribis nɛ bipumisi maan maana nyu'od bugum. Ba da tʋmnɛ sɔnpʋt tʋʋma ka bʋgʋd ba'ad ka pɛsigi ba mɛŋi tʋm tʋʋmbɛ'ɛd Zugsɔb la tuon ka li daam Zugsɔb la ka o sʋnf duoe.
18 Alazug Zugsɔb la sʋnf da duoe nɛ Israel dim hali, ka o yisi ba o san'an. Juda dɔɔg la ma'aa da kpɛlim. 19 Hali Juda da pʋ dɔlli ba Zugsɔb Wina'am zi'ela laa. Ba da dɔlnɛ tʋʋm banɛ ka Israel dim mɔri kpɛn' ba sʋʋgin na la. 20 Dinzug Zugsɔb la da zan'as Israel dim wʋsa: o da kɛ ka tɔɔg paae ba, ka basi ba niŋ banɛ na san'ami ba la nu'usin ti paae saŋkanɛ ka o yisi ba o san'an. 21 On da wɛlig Israel n yis David zakin la, ba da kɛ ka Nebat biig Jeroboam liebi ba Na'ab. Ka Jeroboam da kɛ ka Israel dim bas Zugsɔb la dɔllim ka tʋm tʋʋmbɛ'ɛtita'ar. 22 Israel dim la da dɔl nɛ Jeroboam tʋʋmbɛ'ɛd la vɛn'-vɛn' ka pʋ yuk ka basi lii. 23 Hali ka Zugsɔb la ti yisi ba o tuon nwɛnɛ on da sa'ali ba si'em yiti o yammis banɛ aan o nɔdi'esidibin la. Dinzug ba da gban'e Israel dimi yisi ba, ba mɛŋ teŋin mɔri ba keŋ Asiria ka ba nan kpɛn bɛɛ anina.
Samaria maligim zin'in si'em
24 Asiria Na'ab da mɔr nidibi yi Babilon nɛ Kuta nɛ Ava nɛ Hamat nɛ Sefaavam tɛɛnsin na zin'ili ba Samaria sʋ'ʋlim tempʋʋdin ka ba lɛdig Israel dim zin'ig. Ba da sʋ'ʋg Samaria nɛ li tɛɛns wʋsa.
25 Ban da dɛŋin zin'in ani la, ba da pʋ dɔl Zugsɔb la; alazug o da kɛ ka gbigima keŋ nidib la sʋʋgin kʋʋ ba sieba. 26 Labaar da paae Asiria Na'ab ye, “Nidib la ka fʋ lɛbisi ba na ka maligim bɔ zin'ig Samaria sʋ'ʋlim tɛɛnsin zin'ili ba la, ba zi' teŋ la teŋgban la bɔɔd si'ela. Din ka o kɛ ka gbigima keŋ ban bɛ zin'isi'a la kʋ nidib la.” 27 Li da kɛ ka Asiria Na'ab la tis nɔɔr ye, “Kɛlli ka maanmaannib banɛ ka ya gban'e yi Samaria la na yinne da lɛbi zin'in ani pa'al nidib la teŋgban la bɔɔd si'el.” 28 Dinzug maanmaan yinne onɛ ka ba da gban'e o yi Samaria na la da keŋ zin'in Betel teŋin pa'an nidib la ban na dɔl Zugsɔb la si'em. 29 La'am nɛ wala, buudi wʋsa da maali ba teŋgbana tempʋbanɛ wʋsa ka ba zin' la ni n ba' teŋgban banɛ ka Samaria dim da pʋn maan maana kʋkʋna zug la. 30 Babilon dim la da maal nɛ Sukof-Benof, ka banɛ yi Kuta maal Negal, ka banɛ yi Hamat la maal Asiima. 31 Ava dim da maal Nibihas nɛ Tatak, ka Sefaavam dim la kʋʋ ba biisi nyu'oe maal maana tis Adramelek nɛ Anamelek banɛ an Sefaavam teŋgbana la. 32 Ba da dɔl Zugsɔb la, amaa ka lɛn gaŋi ba nidib kɔn'ɔb-kɔn'ɔb ka ba an maanmaannibi tisi ba teŋgbana la nɛ zin'ibanɛ ka ba maan la. 33 Ba da dɔl Zugsɔb la, amaa ba mɛ da lɛn dɔlli ba mɛŋ teŋgbana nwɛnɛ tembanɛ ka ba yina la malʋŋʋ an si'em la.
34 Din yi saŋkanɛ ti paae zina ba nan kpɛn dɔlli ba malimkʋda la. Ba pʋ dɔl Zugsɔb, bɛɛ o gban'ar nɛ o dɔlisʋg nɛ wada nɛ nɔzi'ela linɛ ka o tis Jakob onɛ ka o pʋdi o yʋ'ʋr ye Israel la yaas la. 35 Zugsɔb la da naal nɔɔr nɛ Israel dim la O da tisi ba zi'elʋg ye, “Da wɔ'ɔgi teŋgban si'a bɛɛ igini li tuonnɛ; da siaki ba nɔɔr bɛɛ maal maannɛ tisi ba. 36 Amaa Zugsɔb onɛ mɔri ya yi Egipt na nɛ o paŋ tita'ar nɛ o nu'ukpi'euŋ la, on ma'aa ka li an tilas ye ya dɔl. On ka ya na igini o tuon ka maal maana tis o. 37 Asɛɛ ya gu'us sʋ'ʋŋa ka dɔl o gban'ar nɛ o dɔlisʋg nɛ nɔzi'ela nɛ wada banɛ ka o kɛ ka ba sɔbi tisi ya la. Da dɔlli teŋgban si'aa! 38 Da tami nɔnaar linɛ ka m naal nɛ ya la, ka mɛ da dɔlli win siebaa, 39 lɛɛ dɔlli Zugsɔb onɛ aan ya Wina'am la, bɔzugɔ, onɛ na faaɛn ya yisi ya dataas nu'usin.” 40 Ba da pʋ siak ye ba kɛlis baa bi'elaa, amaa ka kpɛn ken tuon nɛ ba malimkʋda la. 41 Tembama nidib da dɔl Zugsɔb la ka da lɛm maan teŋgbana hali ti paae zina, ba biis nɛ ba yaas nan kpɛn tʋmnɛ wʋʋ ba yaanamɛ da tʋm si'em la.