Azaria (Uzia) n da di Juda na'am la yɛla
15
1 Israel na'ab Jeroboam n da di na'am yʋʋm pisi nɛ ayɔpɔi la ni, ka Amazaya biig Azaria mɛ da di Juda na'am. 2 O da anɛ yʋma pii nɛ ayuobʋ ka di na'am la. O da zin'in na'am gbauŋ la zug Jerusalem tempʋʋgin nɛ yʋma pisnu nɛ ayi'. O ma yʋ'ʋri da buon Jekolia ka o da yi Jerusalem teŋin na. 3 O da tʋm linɛ an sʋm Zugsɔb la tuon nwɛnɛ o saam Amazaya da tʋm si'em la. 4 Amaa o da pʋ yis teŋgbana banɛ bɛ kʋkʋna la zut la, ka nidib la kpɛm maan maana nyu'od bʋnnyubisa ani. 5 Zugsɔb la da kɛ ka kʋkɔm ban'as gban'e Na'ab la, hali ka o ti kpi. O da bɛ nɛ o yiri o kɔn'. Na'ab la biig Jotam da lieb gbandaani bɛ na'ayin la ka gɔt nimbanɛ bɛ teŋin la. 6 Ya'a kpɛlim yɛla banɛ da maal Azaria na'am saŋa, nɛ on da tʋm si'el la, ba da sɔbi niŋ Juda Na'anam Gbauŋʋn la. 7 Azaria da maal ka'alim ka ba mum o David tempʋʋgin. Ka o biig Jotam da lɛdigi di na'am la.Sallum n da di Israel na'am si'em
8 Juda Na'ab Azaria da dii o na'am la li yʋʋm pistan' nɛ anii ka Jeroboam biig Zakaria mɛ da di Israel na'am Samaria tempʋʋgin, o da zin'in na'am gbauŋ la zug nɛ nwadis ayuobʋ. 9 O da tʋm bɛ'ɛd Zugsɔb la tuon, wʋʋ o saamnamɛ da tʋm si'em la. O da pʋ fɛndig ka bas Nebat biig Jeroboam tʋʋmbɛ'ɛd la. 10 Jabis biig Sallum da su'a gban'e bɛ'ɛd Zakaria yɛla. O da gban'e o nidib la tuonnɛ kʋʋ o ka di'e na'am la di. 11 Ya'a kpɛlim yɛla banɛ da maal Zakaria na'am saŋa nɛ on da tʋm si'el la, ba da sɔbi niŋ Israel Na'anam Gbauŋʋn la. 12 Alazug, Zugsɔb la da pian' si'em tis Jehu la da lieb amɛŋa ye, “Fʋ yaas na zin'in na'am gbauŋ la zugʋ ti paae yaan-naas.” 13 Juda Na'ab Uzia da dii o na'am la yʋʋm pistan' nɛ awai saŋa la ka Jabis biig Sallum di Israel na'am mɛn. O da zin' na'am gbauŋ la zug Samaria tempʋʋgin nwadig yinne. 14 Gadi biig Menahem da yi Tiza keŋ gaad Samaria. Ani ka o da zab nɛ Jabis biig Sallum kʋʋ o ka di'e na'am la di. 15 Ya'a kpɛlim yɛla banɛ da maal Sallum na'am saŋa nɛ on da tʋm si'el la, la'am nɛ on gban'e gban'abɛ'ɛd si'em kʋ Na'ab Zakaria la, ba da sɔbi niŋ Israel Na'anam Gbauŋʋn la.
Menahem di Israel na'am la yɛla
16 Saŋkan la Menahem da pin'il nɛ Tiza teŋin zab hali paae Tifsa teŋ la nɛ li kpikpɛmis la wʋsa, bɔzugɔ ba da zan'as ye ba kʋ yɔ'ɔgi ba yaŋa la di'e o. O da nyaŋ Tifsa ka lati ba pu'apʋʋs la wʋsa pʋya. 17 Juda Na'ab Azaria na'am da paae yʋma pistan' nɛ awai la, Gadi biig Menahem da di Israel na'am Samaria tempʋʋgin ka da zin'in na'am gbauŋ la zug yʋʋm piiga. 18 O da tʋm bɛ'ɛd Zugsɔb la tuon. O na'am saŋa la wʋsa o da pʋ bas Nebat biig Jeroboam tʋʋmbɛ'ɛd linɛ ka o da kɛ ka Israel dim mɛ tʋm la. 19 Asiria Na'akanɛ buon Pul la da nyaŋ teŋ la di'e, ka Menahem tis o anzurifa tusir ye o sʋŋ o ka li kɛ ka o nyaŋi mɔr o sʋ'ʋlim la. 20 Menahem da di'es ligidi la nɛ Israel dimin; o da kɛ ka bʋndaan wʋsa yɔ anzurifa ligidi pisnu ka o di'e tis Asiria Na'ab la. Alazug Asiria Na'ab la da yi ya ka basi ba teŋi tisi ba. 21 Ya'a kpɛlim yɛla banɛ da maal Menahem na'am saŋa nɛ on da tʋm si'el la, ba da sɔbi niŋ Israel Na'anam Gbauŋʋn la. 22 Menahem da maal ka'alim ka ba mum o ban mum Israel na'anam zin'isi'a la. Ka o biig Pekahaya da lɛdigi di na'am la.
Pekahaya di Israel na'am la yɛla
23 Juda Na'ab Azaria da dii o na'am la li yʋma pisnu saŋa ka Menahem biig Pekahaya di Israel na'am Samaria tempʋʋgin ka zin'in na'am gbauŋ la zug yʋma ayi'. 24 Pekahaya da tʋm bɛ'ɛd Zugsɔb la tuon. O da pʋ bas Nebat biig Jeroboam tʋʋmbɛ'ɛd linɛ ka o da kɛ ka Israel dim tʋm la. 25 O Soogia kpɛɛmnam la yinne, Remalaya biig Peka da gban'e bɛ'ɛd o yɛla, ka dɔl nidib pisnu Gilead teŋin paasi o mɛŋi keŋ Samaria teŋin kʋ Na'ab Pekahaya, paas nɛ Agob nɛ Arie na'ayin la, zin'ikanɛ ka zaba ya'a mu'oe ka ba su'ad ani la. Ala ka Peka da kʋ Pekahaya ka di'e na'am la di. 26 Ya'a kpɛlim yɛla banɛ da maal Pekahaya na'am saŋa nɛ on da tʋm si'el la, ba da sɔbi niŋ Israel Na'anam Gbauŋʋn la.
Peka di Israel na'am la yɛla
27 Juda Na'ab Azaria na'am la da paae yʋma pisnu nɛ ayi' la, Remalaya biig Peka da di Israel na'am Samaria tempʋʋgin. O da zin'in na'am gbauŋ la zug nɛ yʋma pisi. 28 O da tʋm tʋʋmbɛ'ɛd Zugsɔb la tuon. O da pʋ bas Nebat biig Jeroboam tʋʋmbɛ'ɛd linɛ ka o da kɛ ka Israel dim tʋm la. 29 Israel Na'ab Peka zʋmaaŋ la, Asiria Na'ab Tigilaf-Pilesa da kena gban'e Iyon nɛ Abɛl-Bet-Maaka nɛ Yanoa nɛ Kedes nɛ Hazo. O da nyaŋ Gilead nɛ Galile pɛ'ɛs nɛ Naftali sʋ'ʋlim la wʋsa vaae nidib la mɔri lɛb Asiria. 30 Ka Ela biig Hosea da gban'e bɛ'ɛd Remalaya biig Peka yɛla. O da zab nɛ o ka kʋʋ o ka di'e na'am la di. Saŋkan la ka Uzia biig Jotam na'am la da paae yʋʋm pisi la. 31 Ya'a kpɛlim yɛla banɛ da maal Peka na'am saŋa nɛ on da tʋm si'el la, ba da sɔbi niŋ Israel Na'anam Gbauŋʋn la.
Jotam di Juda na'am la yɛla
32 Remalaya biig Peka da di Israel na'am la, li yʋma ayi' saŋa ka Uzia biig Jotam mɛ da di Juda na'am. 33 O da di na'am la ka anɛ yʋma pisi nɛ anu, ka gɔs Israel hali yʋma pii nɛ ayuobʋ. O ma da anɛ Zadok pu'ayua ka o yʋ'ʋr buon Jerusa. 34 O da tʋm linɛ tig Zugsɔb la nini nwɛnɛ o saam Uzia da tʋm si'em la. 35 Amaa o da pʋ yis teŋgbana banɛ bɛ kʋkʋna la zut la, ka nidib la kpɛm maan maana nyu'od bʋnnyubisa ani. Jotam da maligim mɛ yaŋir linɛ bɛ zugin ka bɛ Zugsɔb Pʋ'ʋsʋg Zin'igin la. 36 Ya'a kpɛlim yɛla banɛ da maal Jotam na'am saŋa nɛ on da tʋm si'el la, ba da sɔbi niŋ Juda Na'anam Gbauŋʋn la. 37 Dabisban la Zugsɔb la da dɛŋi tʋm Aram Na'ab Rezin nɛ Remalaya biig Peka ye ba zab nɛ Juda. 38 Jotam da maal ka'alim ka ba mum o, o yaanam yaadin, David tempʋʋgin. Ka o biig Ahaz lɛdigi di na'am la.