Amazaya n di Juda na'am la yɛla
14
1 Jehoahas biig Jehoas n da di Israel na'am yʋma ayi' nya'aŋ la ni, Joas biig Amazaya mɛ da di Juda na'am mɛn. 2 O da anɛ yʋma pisi nɛ anu ka di na'am la. O da zin'in na'am gbauŋ la zug yʋma pisi nɛ awai. Amazaya ma da yinɛ Jerusalem ka o yʋ'ʋr buon Jehoadin. 3 O da tʋm linɛ an sʋm Zugsɔb la san'an, amaa ka' wʋʋ o yaab David n da tʋm si'em la. Si'el wʋsa ni o da dɔlisid nɛ o saam Joas nɔba, 4 amaa o da pʋ yis teŋgbana banɛ bɛ kʋkʋna zut la, ka nidib la kpɛm maan maana nyu'od bʋnnyubisa ani. 5 Amazaya yʋ'ʋn da baŋ ye sʋ'ʋlim la bɛ nɛ o nu'ugin kiŋ-kiŋ la, o da kʋ kpɛɛm banɛ da kʋʋ o saam onɛ da an na'ab la 6 ka lɛɛ pʋ kʋʋ ba biisɛ. On da niŋ si'em la da dɔlnɛ linɛ ka Zugsɔb da kɛ ka Moses sɔb zi'ela gbana la ni ye, “Ba kʋ kʋ sɔ' o biig yɛla bɛɛ ba kʋ sɔ' o ba' yɛla la. Sɔ' wʋsa ye o kpinɛ o mɛŋ tʋʋmbɛ'ɛd yɛla.” 7 Onɛ da zabi nyaŋ Edom dim ka kʋʋ ba nidib tusa piiga bɔn'ɔkanɛ buon Yaarim Bɔn'ɔg la ni ka faaɛn teŋ kanɛ buon Sela la, ka pʋdi li yʋ'ʋpaal ye, Jokteel, ka ba kpɛn buonnɛ li ala ti paae zina. 8 Amazaya da tʋm nidib ye ba keŋ Jehoas onɛ an Jehoahas biig ka an Jehu yaaŋ onɛ an Israel Na'ab la san'an yɛl o ye, “Kem na ka man nɛ fʋ kpa' taaba.” 9 Amaa Israel Na'ab Jehoas da lɛbisi yɛl Juda Na'ab Amazaya ye, “Tituugi da bɛ Lebanon teŋin tʋm yɛl na'aziinr ye, ‘Nɔkimi fʋ bipuŋ la tisim ka m tisim biig ka o di.’ Ka Lebanon sian'anr bʋnkɔnbʋg kena nɔ tituug la mɛdig. 10 Fʋ sid nyaŋ Edom ka yʋ'ʋn mɔr tita'alim. Mɔr sumalisim fʋn nyaŋ la, amaa bɛɛ fʋ yin baanlimm. Bɔ ka fʋ ieed yɛla ye fʋ lugi fʋ mɛŋi kpanb nɛ Juda sʋ'ʋlim la wʋsa?” 11 Amazaya da pʋ kɛlisɛ, alazug Israel Na'ab Jehoas da tʋ'ʋs o nɛ zaba. On nɛ Amazaya onɛ an Juda Na'ab la da tʋ'ʋs taab Bet-Semes teŋin linɛ bɛ Juda sʋ'ʋlimin la. 12 Israel da nyaŋ Juda dim ka sɔ' wʋsa zɔɔ kuli o yin. 13 Ka Israel na'ab Jehoas da nyaŋi gban'e Amazaya onɛ an Juda Na'ab ka an Joas biig nɛ Ahazaya yaaŋ la Bet-Semes teŋin. Jehoas da keŋ Jerusalem tempʋʋgin na nwa'ae zaŋguoma la, lin naam Efiram yaŋirin la ti paae Gɔnligir Zin'ig Za'anɔɔr la. Ka li wa'alim wan wʋʋ nɔba makir kɔbisyuobʋ nɛ. 14 O da vaae sanlima nɛ anzurifa nɛ laas banɛ bɛ Zugsɔb la Pʋ'ʋsim Yin la wʋsa nɛ na'ayir la la'ad la wʋsa. O mɛ da gban'e nidibi mɔri lɛb Samaria. 15 Ya'a kpɛlim nɛ yɛla banɛ da maal Jehoas na'am diib saŋa la, on da tʋm si'el nɛ on da nyaŋi maal si'el la, nɛ on zab nɛ Amazaya, Juda Na'ab la si'em la, ba da sɔbi li kpɛn'ɛs Israel Na'anam Gbauŋʋn la. 16 Jehoas da kpiya, ka ba mum o, o yaanam yaadin ban mum Israel na'anam zin'isi'a la. O biig Jeroboam da lɛdigi di na'am la. 17 Jehoahas biig Jehoas n da di Israel na'am ka kpi la nya'aŋ, Joas biig Amazaya da kpɛn zin'in Juda na'am gbauŋ la zug yʋma pii nɛ anu. 18 Ya'a kpɛlim yɛla banɛ da maal Amazaya na'am saŋa nɛ on da tʋm si'el la, ba da sɔbi niŋ Juda Na'anam Gbauŋʋn la. 19 Ba da ieed Amazaya suoya ka o zɔɔ keŋ Lakis teŋin, amaa ba da tʋm dap anina ka ba kʋʋ o. 20 Ba da zii o niŋgbiŋ la nɛ wief na mum o, o yaanam yaadin David tempʋʋgin. 21 Ka Juda nidib la'as taaba diis Azaria na'am ka o nan an yʋma pii nɛ ayuobʋ. Ka o di'e o saam Amazaya zin'ig. 22 Onɛ da maligim mɛ' Elaf teŋ zaŋguoma lɛbis teŋ la tis Juda, o saam Amazaya kum nya'aŋ.Israel na'ab Jeroboam onɛ paas ayi' la yɛl
23 Amazaya onɛ an Joas biig la di Juda na'am la li yʋʋm pii nɛ anu saŋa, ka Jehoas biig Jeroboam da di Israel na'am Samaria tempʋʋgin ka kpɛn zin' na'am gbauŋ la zug yʋma pisnaasi nɛ yinne. 24 O da tʋm tʋʋmbɛ'ɛd Zugsɔb la tuon hali, ka pʋ siaki fɛndig ka bas Nebat biig Jeroboam tʋʋmbɛ'ɛd linɛ ka o da kɛ ka Israel dim tʋm la. 25 O da nyaŋi lɛn di'e Israel titɔndis lin yi Lebo-Hamat ti paae Atɛuk linɛ bɛ Araba la, nwɛnɛ Zugsɔb Israel Wina'am la da pʋn dɛŋin yɛl si'em la. O da pian' yii o tʋmtʋm Jona san'an, onɛ an Amitai biig, ka an nɔdi'es onɛ yi Gaf Hefe teŋin la. 26 Zugsɔb la da nyɛ Israel dimi da di namisʋg si'em. Ba sɔ' wʋsa da namisidnɛ, ka sɔ' kae na nyaŋi sʋŋi ba. 27 Amaa Zugsɔb la da pʋn gban'e ye o kʋ kpiis Israel yʋ'ʋr dunia nwa la zug, o da dɔlis nɛ Jehoas biig Jeroboam nii faaɛn ba. 28 Ya'a kpɛlim nɛ yɛla banɛ da maal Jeroboam na'am diib saŋa la, on da tʋm si'el nɛ on da nyaŋi maal si'el la, nɛ on da zabi nyaŋ si'em, nɛ on da nyaŋi faaɛn Damaskus nɛ Hamat tɛɛns linɛ da an Juda dim sʋ'ʋlimin la lɛbisi tis Israel si'em la, ba da sɔbi li kpɛn'ɛs Israel Na'anam Gbauŋʋn la. 29 Jeroboam da maal ka'alim, ka ba mum o ban mum Israel na'anam zin'isi'a la.