Amazaya n di Juda na'am la yɛla
25
1 Amazaya da anɛ yʋma pisi nɛ anu ka di na'am. O da zin' na'am gbauŋ la zug Jerusalem teŋin yʋma pisi nɛ awai. O ma yʋ'ʋri da buon Jehoadin ka o yi Jerusalem teŋin na. 2 O da tʋm linɛ an sʋm Zugsɔb la nini ni, amaa ka' nɛ o sʋnf wʋsaa. 3 Amazaya yʋ'ʋn da baŋ ye teŋ la bɛ nɛ o nu'ugin la, o da kʋ kpɛɛm banɛ da kʋʋ o saam la. 4 Ka lɛɛ pʋ kʋʋ ba biisɛ, nwɛnɛ lin sɔb zi'ela gbana ni, linɛ ka Zugsɔb da kɛ ka Moses sɔb la ye, “Ba kʋ, kʋ sɔ' o biig yɛlaa, bɛɛ ba kʋ sɔ' o ba' yɛlaa. Sɔ' wʋsa ye o kpinɛ o mɛŋ tʋʋmbɛ'ɛd yɛla.” 5 Amazaya da buol Juda nidib la wʋsa n la'as ka pʋdigi ba ka li dɔl wʋʋ ba tuŋʋ an si'em n tis banɛ gur nidib wʋʋ tusir-tusir bɛɛ kɔbig-kɔbig Juda nɛ Benjamin tɛɛnsin la wʋsa. Ka yʋ'ʋn kaal banɛ an wʋʋ yʋma pisi bɛɛ gaad ala la nyɛ ka ba kal an wʋʋ tusa kɔbistan' (300,000) banɛ na nyaŋ keŋ zaba, ka na nyaŋi zanl kpan nɛ gbanti'edʋg. 6 O mɛ da nɔk anzurifa ligidi bɛdegʋ da' zabzabidib tusa kɔbiga (100,000) Israel teŋin. 7 Amaa ka Wina'am nid kɛɛn o san'an na yɛl o ye, “Na'aba, zabzabidib banɛ yi Israel la pʋ nar ye ba yi zabir la, bɔzugɔ Zugsɔb la ka' Israel dim san'anɛ, ka mɛ pʋ bɛ nɛ Efiram nid baa yinnee. 8 Hali baa ya ya'a keŋ zab nɛ nimmua, Zugsɔb la na kɛ ka ya dataas la nyaŋi ya, bɔzugɔ Wina'am mɔr paŋ kanɛ na sʋŋi ya bɛɛ kɛ ka ba nyaŋi ya.” 9 Na'ab Amazaya da bu'os Wina'am nid la ye, “Ka man nɔk ligidi bɛdegʋ da' zabzabidib la?” Ka Wina'am nid la lɛbis o ye, “Wina'am tun'e tisif linɛ gaad ala.” 10 Alazug Amazaya da kɛ ka soogia banɛ yi Efiram kena la lɛbi kul. Ba sʋnf da san'am nɛ Juda hali, ka ba lɛbi kul nɛ ɛndʋg.11 Na'ab Amazaya yʋ'ʋn da maligim ti'eb ka nɔk o soogianam la keŋ bɔn'ɔg kanɛ ka ba buon Yaarim Bɔn'ɔg la ni, ani ka o da kʋ Seir teŋ nidib tusa piiga (10,000). 12 Juda soogianam la mɛ da gban'e nidib tusa piiga (10,000) vʋti mɔri ba dʋ zuor zugʋ lɔbi ba bas teŋin ka ba luu kɔ'ɔsi kɔ'ɔs.
13 Amaa Amazaya n da lɛbis soogia sieba la da keŋ fan' Juda tempʋʋs la, lin naan Samaria keŋ paae Bet-Horon teŋin. Ba da kʋ nidib tusa atan' ka vaae la'ad bɛdegʋ mɔri keŋ. 14 Amazaya n da zab nɛ Edom dim la naae ka lɛbid na la, o da vaae Seir dim bada kena iginidi ba tuon ka maan nyu'or maannɛ tisid bada la. 15 Zugsɔb la sʋnf da duoe nɛ Amazaya, ka o tʋm nɔdi'es o san'anɛ bu'os o ye, “Bɔɔ kɛ ka fʋ dɔl nimbama bada banɛ da pʋ nyaŋi faaɛn ba yii fʋ nu'usinɛ?” 16 On da nan pian'ad la, ka Na'ab la bu'os o ye, “Tinam gaŋif ye fʋ sa'al Na'ab la, bɛɛ? Guoma la! Gɔsima, da kɛ ka m kɛ ka ba kʋʋf woo!” Nɔdi'es la da gu'oe ya, amaa ka yɛl o ye, “M mi' ye Wina'am gban'e nɛ ye o san'amif, bɔzugɔ fʋ tʋm nɛ nɛ'ɛŋa ka mɛ pʋ lɛm bɔɔd ye fʋ wʋmmi m sa'alʋgɔ.”
17 Juda na'ab Amazaya da nwɛ' banɛ san'an o la saawara ka tʋm nidib ye ba keŋ Jehoas onɛ an Jehoahas biig ka an Jehu yaaŋ onɛ an Israel Na'ab la san'anɛ yɛl o ye, “Kem na ka man nɛ fʋ kpa' taaba.” 18 Amaa Israel Na'ab Jehoas da lɛbisi yɛl Juda Na'ab Amazaya ye, “Tituugi da bɛ Lebanon teŋin, n tʋm yɛl na'aziinr ye, ‘Nɔkimi fʋ bipuŋ la tisim ka m tisim biig ka o di. Ka sian'anr bʋnkɔnbʋg kena nɔ tituug la mɛdig. 19 Fʋ sid nyaŋ Edom ka yʋ'ʋn mɔr tita'alim. Mɔr sumalisim fʋn nyaŋ la, amaa zin' fʋ yin baanlimm. Bɔ ka fʋ ieed yɛla ye fʋ lugi fʋ mɛŋi kpanb nɛ Juda sʋ'ʋlim la wʋsa?’ ” 20 Na'ab Amazaya lɛɛ da pʋ kɛlisɛ, bɔzugɔ Wina'am da maal nɛ suoya linɛ na kɛ ka o nɔk o niŋ Jehoas nu'usin bɔzugɔ o da dɔl nɛ Edom dim bada. 21 Alazug Na'ab Jehoas onɛ an Israel na'ab la da tʋ'ʋs o nɛ tanp. On nɛ Juda na'ab Amazaya da tʋ'ʋs taaba Bet Semes linɛ bɛ Juda sʋ'ʋlimin la. 22 Israel dim da nyaŋ Juda dim la ka sɔ' wʋsa zɔɔ kul o yin. 23 Jehoas Israel Na'ab la da nyaŋi gban'e Amazaya onɛ an Juda Na'ab ka an Joas biig nɛ Ahazaya yaaŋ la Bet-Semes teŋin. Jehoas da kɛn Jerusalem tempʋʋgin na nwa'ae zaŋguoma la, lin naam Efiram Yaŋirin la ti paae Gɔnligir Zin'ig Za'anɔɔr la. Ka li wa'alim nwɛnɛ nɔba makir kɔbisyuobʋ nɛ. 24 O da nɔk sanlima nɛ anzurifa nɛ la'abanɛ wʋsa bɛ Wina'am Pʋ'ʋsim Yin la linɛ ka Obɛd-Edom da gur la, nɛ na'ayin la la'asʋma la wʋsa lɛb Samaria.
25 Na'ab Joas biig Amazaya onɛ da an Juda na'ab la da kpɛn vʋe yʋma pii nɛ anu Jehoas onɛ da an Jehoahas biig ka an Israel na'ab la kum nya'aŋ. 26 Ya'a kpɛlim nɛ yɛla banɛ da maal Jehoas na'am diib saŋa la, li pin'ilʋgʋ ti paae li naar, ba mɛ sɔbi li niŋ Juda nɛ Israel Na'anam Gbauŋʋn la. 27 Lin pin'il saŋa kanɛ ka Amazaya da fɛndig ka bas Zugsɔb la, ba da la'as taaba gban'e bɛ'ɛd o yɛla ka o zɔɔ keŋ Lakis teŋin, amaa ba da tʋm nidib Lakis teŋin ka ba keŋ kʋʋ o anina. 28 Ba da nɔk o pa'al wief zugʋ lɛb na mum o, o yaanam yaadin David Tempʋʋgin linɛ bɛ Juda teŋin la.