Na'ab Joas n maligim maal Pʋ'ʋsim Yir la si'em
24
1 Joas da anɛ yʋma ayɔpɔi biig saŋa kanɛ ka o da di na'am la, ka da zin' na'am gbauŋ zug Jerusalem tempʋʋgin gɔs Juda sʋ'ʋlim la yʋma pisnaasi. O ma yʋ'ʋri da buon Zibia onɛ yi Beerseba na la. 2 Joas da tʋm linɛ nar Zugsɔb la nini ni yʋʋm banɛ wʋsa ka Jehoyada da an Maanmaan la. 3 Jehoyada da di pu'ab ayi' tis o, ka on nɛ ban du'a biribis nɛ bipumis.4 Li da yuug bi'ela ka Na'ab Joas yʋ'ʋn gban'e ye o na maligim maal Zugsɔb Pʋ'ʋsim Yir la. 5 O da buol maanmaannib nɛ Levi dim la ye ba la'as taaba o san'an na ka yɛli ba ye, “Kem giligi Juda tɛɛns wʋsa di'e ligidkanɛ ka Israel dim yɔɔd yʋʋm wʋsa la na ka ti maligim maal Wina'am Pʋ'ʋsim Yir la. Kem niŋi ala tɔ'ɔtɔ.” Amaa Levi dim la da pʋ niŋ ala tɔ'ɔtɔɔ. 6 Alazug Na'ab Joas da buol Jehoyada onɛ an maanmaan kpɛɛm la na bu'os o ye, “Bɔ ka fʋ nam pʋ kɛ ka Levi dim la la'as Juda nɛ Jerusalem dim lampɔ ligidi la na? Li da anɛ zi'elʋgʋ yit Zugsɔb la tʋmtʋm Moses nɛ Israel dim la san'an na ye ba nɔki tis Nɔnaar Fuug Sʋgʋr la yɛla.”
7 Atalia onɛ da an pu'a kanɛ an bugusim sɔb la saŋa la, o biis da kpɛn' Wina'am Pʋ'ʋsim Yir pʋʋginɛ nɔk Wina'am mɛŋ la'ad linɛ an kasi la mɔri keŋ pʋ'ʋs Baal teŋgbana la.
8 Na'ab la da tis nɔɔr ka ba maal daka zi'el yiŋ Zugsɔb Pʋ'ʋsim Dɔɔg la za'anɔɔrin. 9 Ka yʋ'ʋn yɛl Juda nɛ Jerusalem dim ye ba mɔr lampɔ kanɛ ka Moses onɛ an Wina'am tʋmtʋm la da yɛl Israel dim ye ba yɔɔm sian'arin la. 10 Nɛ'ɛŋa da kɛ ka tuongatib la nɛ nidib sʋnf ma'ae, ka ba mɔri ba ligidi na niŋ daka la ni, hali ka li ti pɛ'ɛl.
11 Saŋa kanɛ wʋsa ka Levi dim la mɔr daka la kpɛn' na'ayikpɛm la san'an ka ba nyɛ ka ligidi la zu'oe, na'ayir gbansɔbid la nɛ maanmaan kpɛɛm la ɛɛn baae ligidi la nɛ ka kɛ ka ba mɔr daka la lɛbisi zi'eli li zin'igin. Ba da niŋid nɛ ala saŋa wʋsa ka paamid ligidi bɛdegʋ. 12 Na'ab la nɛ Jehoyada da nɔkidnɛ ligidi la tisid dap banɛ gɔsid tʋʋm kanɛ nar ye ba tʋm Pʋ'ʋsim Dɔɔgin la. Ka ba haad banɛ mɛɛd nɛ kampintanam ye ba maligim maal Pʋ'ʋsim Dɔɔg la, nɛ banɛ tʋm nɛ kʋnt nɛ kʋntzɛn'ug la.
13 Dap banɛ da gɔsid tʋʋma la da anɛ nimmua dim, ka li kɛ ka tʋʋma la ken tɔ'ɔtɔ. Ba da mɛ' Wina'am Pʋ'ʋsim Dɔɔg la nɛ wʋʋ lin da pʋn gban'e ye li mɛ' si'em la, hali ka maali li ka li mɔr paŋ sʋ'ʋŋa. 14 Ban da naae la ba da nɔk ligidkanɛ kpɛlim la mɔri kena tis Na'ab la nɛ Jehoyada, ka ba nɔki li maal la'adi niŋ Zugsɔb Pʋ'ʋsim yin la: la'abanɛ na nɔki tʋm nɛ la'abanɛ na nyu'oe nyu'or maan la, nɛ labibis, la'am nɛ sanlima nɛ anzurifa la'ad. Jehoyada saŋa la wʋsa nyu'or maan da pʋ viigid Zugsɔb Pʋ'ʋsim Dɔɔgin la.
15 Saŋa kaŋa Jehoyada da kʋdig nɛ hali. O da anɛ yʋma kɔbiga nɛ pistan' ka nyaan kpi. 16 Ba da mum o nɛ na'anam yaadin David tempʋʋgin la, on da tʋm tʋʋm sʋma Israel teŋin tis Zugsɔb la nɛ o Pʋ'ʋsim Dɔɔg la zug.
Na'ab Joas tʋʋmbɛ'ɛd la yɛla
17 Jehoyada kum nya'aŋ la, Israel kpɛɛmnam da keŋ pʋ'ʋs Na'ab la ka sa'al o ka o wʋm tisi ba. 18 Ba da kɛɛs Zugsɔb onɛ aan ba yaanam Wina'am la bas ka pʋ'ʋsid Asera onɛ an ba'ar la dazi'eda, nɛ winsieba. Ba tʋʋmbɛ'ɛd la zug ka Zugsɔb la da kɛ ka tɔɔg sig Juda nɛ Jerusalem teŋin na. 19 Zugsɔb la da tʋm o nɔdi'esidib ye ba pian' tis nidib la ka ba tiak. Ka nɔdi'esidib la sid yɛli ba ban tʋm si'el ka li pʋ nar la, amaa ka ba pʋ kɛlisɛ.
20 Ka Wina'am Siig sig Zakaria onɛ saamme an Jehoyada onɛ da an Maanmaan la zugin na. Ka o duoe zi'en nidib la tuon ka yɛli ba ye, “Wina'am bu'os ye, ‘Bɔ ka ya zan'as Zugsɔb la nɔɔrɛ? Ya kʋ nyɛ arezaka. Yanamɛ zan'as Zugsɔb la zug, o mɛ zan'asi ya.’ ”
21 Amaa ba da gban'e o yɛla bɛ'ɛd, ka Na'ab la tis nɔɔr ka ba lɔb o nɛ kuga kʋ Zugsɔb Pʋ'ʋsim Dɔɔg la za'ambɛŋin. 22 Na'ab Joas da pʋ tiɛn tʋʋm sʋma banɛ ka Zakaria saam Jehoyada da tʋm tis o la ka kʋʋ o biig. Zakaria n da bɔɔd kum la ka yɛl ye, “Zugsɔb la gɔsim yanamɛ tʋm si'el la ka kɛ ka ya namisi li yɛla!”
23 Yʋʋm kan la Aram soogianam da kena zab nɛ Joas, ka nyaŋ Juda nɛ Jerusalem ka kʋ kpɛɛmnam la nɛ nidib la wʋsa. Ka vaae la'abanɛ ka ba faaɛn la wʋsa kuli ba teŋin Damaskus n tisi ba na'ab la. 24 La'am nɛ Aram dim la da mɔr soogianam bi'ela kena la, Zugsɔb la da kɛ ka ba nyaŋ soogianam bɛdegʋ. Juda dimi da zan'as Zugsɔb onɛ aan ba yaanam Wina'am la zug ka tɔɔg da paae Joas. 25 Aram dim la da pu'alim Joas bɛ'ɛd bɛ'ɛdi ka lɛbi kul. O na'ayikpɛm la da zɛrig o hali nɛ on kʋ Jehoyada onɛ an Maanmaan la biig la, ka mɛ kʋʋ o nɛ o gadʋg zug. Ba da mum o David tempʋʋgin, amaa ka' na'anam yaadin la.
26 Banɛ da gban'e o yɛla bɛ'ɛd la da anɛ, Zabad onɛ ma yʋ'ʋri buon Simeaf ka o an Ammon buudi la nɛ Jehozabad onɛ ma yʋ'ʋri buon Simirif ka o an Moab nid la. 27 O biis yɛla, nɛ Wina'am da yɛl o yɛla ka li zu'oe si'em la wʋsa, nɛ Wina'am Dɔɔg la maligim maal si'em la wʋsa sɔbi bɛ Na'anam Gbauŋʋn la. Ka o biig Amazaya da kpɛlim di na'am la.