Joas n da maligim maal pʋ'ʋsʋg zin'ig la
12
1 Jehu da dii o na'am paae yʋma ayɔpɔi la, Joas da di na'am zin' o na'am gbauŋ zug Jerusalem tempʋʋgin sʋ'oe Juda yʋma pisnaasi. O ma yʋ'ʋri da buon Zibia onɛ yi Beerseba la. 2 Joas da tʋm linɛ nar Zugsɔb la nini ni yʋma banɛ wʋsa ka Jehoyada onɛ da an Maanmaan la da san'an o la. 3 Amaa o da pʋ yis teŋgbana malima zin'ibanɛ bɛ kʋkʋna la zut la, ka nidib la da kpɛm maan maana ani ka nyu'od bʋnnyubisa.4 Joas da yɛl Maanmaan la ye, “Vaami la'abanɛ ka ba mɔr na ka li an piinkanɛ an nyain tis Zugsɔb La'asʋg Zin'ig la, nɛ ligidbanɛ ka ba di'e ban kaal nidib saŋsi'a la, nɛ nidib la mɛŋi kaanbi zi'el ye ba tis ligidi si'em, nɛ ligidkanɛ ka ba mɔr nɛ yamlɛogʋ ken Pʋ'ʋsʋg Zin'igin la na. 5 Kɛl ka maanmaan wʋsa di'e ligidi ligidsu'adib la san'anɛ maal zin'ikanɛ san'am Pʋ'ʋsim Yin la wʋsa.” 6 Amaa Joas na'am da mɔr ala ti paae yʋma pisi nɛ atan' ka maanmaannib la nam pʋ maal Pʋ'ʋsim Yir zin'ibanɛ san'am la. 7 Alazug Na'ab Joas da la'as Jehoyada onɛ an maanmaan la nɛ o maanmaan taaba la wʋsa bu'osi ba ye, “Bɔ ka ya pʋ maal zin'ibanɛ san'am Pʋ'ʋsim Yin la? Da lɛn di'e ligidi ya mɛŋa, amaa kɛl ka ba nɔki li maal Yir la.” 8 Maanmaannib la da siakya ye ba kʋ lɛn di'e ligidi ya'asɛ, ka mɛ kʋ maal Pʋ'ʋsim Yir laa. 9 Jehoyada onɛ an Maanmaan la da nɔk la'ad su'ab daka tita'ari kibigi li liŋ la. O da nɔki li zi'eli kpi'el maan daka la, ka li zi'e sɔ' na kpɛn'ɛd Zugsɔb Pʋ'ʋsim Yin la datiuŋ baba. Maanmaannib banɛ gur Yir la za'anɔɔr la da nɔkidi ligidbanɛ ka nidib la mɔri ken Pʋ'ʋsim Yin la na wʋsa niŋid daka la pʋʋgin. 10 Saŋa kanɛ wʋsa ka ba ti baŋ ye ligidi zu'oe daka la pʋʋgin la, na'ayir gbansɔbid la nɛ maanmaan kpɛɛm la na kenna kaal ligidbanɛ ka nidib la mɔri kɛn Zugsɔb Pʋ'ʋsim Yin la na nɔki niŋ bɔtnamin. 11 Ba ya'a kaali naae, ba zaŋid ligidi la nɛ tis ban gaŋ sieba ye ba gɔs Pʋ'ʋsim Yir la. Ligidkan la ka ba yɔɔd kampintanam nɛ banɛ mɛɛd tan, 12 nɛ banɛ mɛɛd kuga nɛ banɛ nwa'ad kuga la. Ka da'ad daad nɛ kuga banɛ ka ba kpi'a ye ba maal Pʋ'ʋsim Yir la ka yɔ sam kanɛ wʋsa ka ba kpɛn' maal Pʋ'ʋsim Yir la. 13 Ba da pʋ nɔkid ligidkanɛ ka ba mɔri ken Pʋ'ʋsim Yin na la tisid ka ba maan anzurifa laas nɛ la'abanɛ ka ba niŋid ku'om misid nɛ na'atana bɛɛ la'abanɛ wʋsa ka ba nɔkid sanlima bɛɛ anzurifa maannɛ niŋid Zugsɔb Pʋ'ʋsim Yin la. 14 Ba da mɔri yɔɔd tʋmtʋmnib la ka ba nɔkidi lii maligim maan Pʋ'ʋsim Yin la. 15 Ba da pʋ kɛt ka nidib la gi'ennɛ pa'an ban di'e li ka yɔɔd tʋmtʋmnib la si'em-si'em, bɔzugɔ ba da tʋmnɛ nɛ pʋpielim. 16 Maan linɛ an taal maan nɛ tʋʋmbɛ'ɛd maan ligidi la da pʋ paasid Zugsɔb Pʋ'ʋsim Yin laa; maanmaannib la da sʋ'oe din.
Aram Na'ab Hazael n zab nɛ Juda dim la
17 Saŋkan la Hazael onɛ an Aram Na'ab la da keŋ zab nɛ Gaf dimi nyaŋi ba. Ka lɛn yuki keŋ zab nɛ Jerusalem dim. 18 Amaa Joas onɛ da an Juda Na'ab la da nɔk la'asʋma banɛ ka Jehosafat nɛ Joram nɛ Ahazaya banɛ aan o yaanam ka da an Juda na'anam ka pɛsigi tis Zugsɔb la nɛ piinbanɛ ka on mɛ da pɛsig la, nɛ sanlima banɛ ka ba da nyɛ Zugsɔb Pʋ'ʋsim Yir suak zin'igin nɛ na'ayin la wʋsa, ka mɔri li wʋsa keŋ tis Hazael onɛ an Aram Na'ab la, ka o nyaan yi ka bas Jerusalem.
Joas kum yɛla
19 Ya'a kpɛlim yɛlbanɛ da maal Joas na'am saŋa nɛ on da tʋm si'el la, ba da sɔbi niŋ Juda Na'anam Gbauŋʋn la.