Jehoahas di Israel na'am la yɛla
13
1 Ahazaya biig Joas n da di Juda na'am la, li yʋma pisi nɛ atan' saŋa la, Jehu biig Jehoahas da di Israel na'am Samaria tempʋʋgin. O da di na'am la yʋma pii nɛ ayɔpɔi. 2 O da tʋm bɛ'ɛd Zugsɔb la tuon, ka li dɔlnɛ Nebat biig Jeroboam tʋʋmbɛ'ɛd la buudi nɔɔ, ka kɛ ka Israel dim mɛ tʋm bɛ'ɛd. O da pʋ fɛndig ka bas o tʋʋmbɛ'ɛd la. 3 Alazug Zugsɔb sʋnf da duoe nɛ Israel dim, ka o kɛ ka ba bɛ Aram dim Na'ab Hazael nɛ o biig Ben-Hadad nu'usin, ba na'am la bɛn wʋsa. 4 Jehoahas da sɔs Zugsɔb la bɔɔd sʋŋir, ka o wʋm tis o bɔzugɔ o da nyɛ Aram Na'ab la wɛbigidi ba si'em. 5 Zugsɔb la da bɔ sɔ' onɛ na faaɛn Israel ka ba nyaŋi yi Aram dim nu'usin. Li da kɛ ka Israel dim nyaŋi lɛbi zin'ini ba mɛŋ yaan wʋʋ ban da pʋn zin' si'em la. 6 Amaa ba da pʋ fɛndig ka bas tʋʋmbɛ'ɛd banɛ ka Jeroboam yidim da tʋm ka mɛ kɛ ka Israel dim tʋm la. Ba da nan kpɛn tʋmmi li nɛ. Asera teŋgban dazi'edir kanɛ ka ba duoe zi'el la da nan kpɛn zi'e Samaria tempʋʋgin. 7 Jehoahas da lɛn ka' soogianama, ya'a ka' wiedban'adib pisnu, nɛ zaba tɛrekonam piiga, nɛ soogia banɛ ken teŋ la tusa piiga ma'anɛ; Aram Na'ab la da san'am linɛ kpɛlim la wʋsa, ka maali li ka li an wʋʋ ban ɛɛnti bʋ'ʋd ki ka uusʋg an si'em la.8 Ya'a kpɛlim nɛ yɛla banɛ da maal Jehoahas na'am diib saŋa la, nɛ on da tʋm si'el nɛ on da nyaŋi maal si'el la, ba da sɔbi li kpɛn'ɛs Israel Na'anam Gbauŋʋn la. 9 Jehoahas da kpiya ka ba mum o bam mum o yaanam zin'isi'a Samaria tempʋʋgin, ka o biig Jehoas lɛdigi di na'am la.
Jehoas n di Israel na'am la
10 Juda na'ab Joas da di na'am la yʋma pistan' nɛ ayɔpɔi, ka Jehoas onɛ an Jehoahas biig la da di Israel na'am Samaria tempʋʋgin. O da di na'am la nɛ yʋma pii nɛ ayuobʋ. 11 O da tʋm bɛ'ɛd Zugsɔb la tuon ka pʋ fɛndig ka bas tʋʋmbɛ'ɛd banɛ ka Nebat biig Jeroboam da tʋm ka mɛ kɛ ka Israel dim tʋm la nii, ka lɛɛ kpɛn tʋmmi ba.
12 Ya'a kpɛlim nɛ yɛlbanɛ da maal Jehoas na'am diib saŋa la, on da tʋm si'el nɛ on da nyaŋi maal si'el la, nɛ on zabid nɛ Amazaya, Juda Na'ab la si'em la, ba da sɔbi li kpɛn'ɛs Israel Na'anam Gbauŋʋn la. 13 Jehoas da kpiya ka o biig Jeroboam lɛdigi di o saam na'am la. Ba da mum Jehoas Samaria tempʋʋgin, ban mum Israel na'anam zin'isi'a la.
Elasia kum yɛla
14 Ban'asi'a da gban'e Elasia hali ti kʋʋ o. On da nan pʋ kpi la Jehoas onɛ da an Israel Na'ab la da keŋ ye o kaae o ka kum o ban'as la yɛla. Ka ye, “M Saama, m Saama, Israel dim zaba tɛrekonam nɛ ba wiedban'adiba!” 15 Elasia da yɛl o ye, “Bɔɔm tiraug nɛ piema,” ka o sid bɔɔ ba. 16 Ka o yɛl Israel Na'ab la ye, “Nɔkim tiraug la zanl!” On nɔk la ka Elasia mɛ ʋk o nu'ugʋ pa'al Na'ab la nu'ug zug 17 ka yɛl o ye, “Yɔ'ɔgim nya'aŋ takoro la,” ka o yɔ'ɔg. Ka Elasia yɛl o ye, “Tɔɔnm!” Ka o tɔn ka Elasia ye, “Zugsɔb la nyaŋir piim la, piim kanɛ na nyaŋ Aram dim la! Fʋ na nyaŋ Aram dim la Afek teŋin.” 18 Ka lɛn yɛl o ye, “Nɔkim piema la!”, Ka Na'ab la nɔk. Ka Elasia yɛl o ye, “Tɔɔnm teŋ!” Ka o tɔn nɔɔr atan' ka gu'oe. 19 Wina'am tʋmtʋm la sʋnf da duoe nɛ Na'ab la ka o yɛl o ye, “Li sʋ'ʋlimin ye fʋ tɔn teŋ la nɔɔr anu bɛɛ ayuobʋ. Lin ka fʋ naan nyaŋin Aram dim la li' ba wʋsa. Amaa nannanna fʋ na nyaŋi ba nɛ nɔɔr atan' ma'aa!” 20 Elasia da kpiya ka ba mum o.
Saŋkan la Moab dim da kennɛ faand ki, bunib saŋa wʋsa. 21 Israel dau da kpiya ka ba bɛɛ ani ye ba mum o ka ʋk zugʋ nyɛ ka faandib la ya'an kenna, ka ba nɔk kum la bas Elasia yaʋg la pʋʋg. Ka kum la lu yaʋgʋn la si'is Elasia kɔnba la ka vʋ'ʋgi duoe zi'e.
22 Aram Na'ab Hazael da wɛbid Israel dim hali Jehoahas na'am diib saŋa la wʋsa. 23 Amaa Zugsɔb la da mi' ba yɛla ka zɔɔ ba nimbaanlig ka pa'al ye o ba'a bɛ nɛ ba, on naal nɔɔr nɛ Abraham nɛ Isaak nɛ Jakob la zug. Hali ti paae zina o pʋ siak ye o san'ami ba bɛɛ yisi ba o tuonnɛ. 24 Aram Na'ab Hazael da kpiya ka Ben-Hadad onɛ an o biig la lɛdigi di na'am la. 25 Ka Jehoahas biig Jehoas lɛn lɛb tembanɛ ka Hazael da nyaŋi o saam Jehoahas zaba ni ka di'e la faaɛn yi Hazael biig Ben-Hadad san'an. Nɔɔr atan' ka Jehoas nyaŋ o, ka faaɛn tɛɛns la wʋsa lɛbis.