Atalia nɛ Joas yɛla
11
1 Na'ab Ahazaya ma Atalia n da nyɛ ka ba kʋ o biig Na'ab Ahazaya la, o da duoe gban'e na'am tuŋ dim la wʋsa kʋ. 2 Amaa Jehoseba, onɛ da an Na'ab Joram pu'ayua la, da nɔk o taʋn Na'ab Ahazaya biig Joas n yis na'ayin la mɔr o zɔɔ yi banɛ da bɔɔdi kʋʋ o la san'an. O da nɔk o nɛ o biyuol la su'a dɔgbɛɛndigin, zin'ikanɛ ka Atalia kʋ nyɛɛ o: li da kɛ ka ba pʋ nyaŋi kʋʋ o. 3 On nɛ o biyuol la da kpɛm bɛ suakin Zugsɔb Pʋ'ʋsim Yin la yʋma ayuobʋ, Atalia da di na'am saŋsi'a la.Ban da ki'is Atalia la yɛla
4 Atalia da dii o na'am la, li yʋma ayɔpɔi saŋa la, Jehoyada da tʋm buol soogianam kpɛɛmnam banɛ sʋ'oe nidib kɔbig-kɔbig la, la'as nɛ banɛ an Kar dim nɛ banɛ gu'ud zin'ig la wʋsa, ye ba la'as Zugsɔb la Pʋ'ʋsim Yin na. O da naal nɔɔr nɛ ba ka kɛ ka ba pɔɔ tis o, Zugsɔb Pʋ'ʋsim Yir la pʋʋgin. Ka o yis Na'ab la biig na pa'ali ba. 5 Ka tis nɔɔr ye, “Yanamɛ ye ya tʋm si'em nwa: Ya ya'a kɛn tʋʋma Vʋ'ʋsʋm Daar la na, pʋdigir yinne na gur na'ayir la, 6 ka yinne gur Sur Yaŋir la, ka banɛ paas atan' la mɛ gur yaŋir kanɛ bɛ banɛ gur Pʋ'ʋsim Zin'igi tia'asid la nya'aŋ. 7 Ka yanam banɛ kpɛlim pʋdigir ayi' ka pʋ gur zin'isi'a Vʋ'ʋsʋm Daar la wʋsa na gur Pʋ'ʋsim Zin'ig la gur na'ab la. 8 Sɔ' wʋsa zanl o zaba lauk ka ya zi'enɛ gilig na'ab la. Sɔ' ya'a li'el yanamɛ bɛ zin'isi'a la yanam on kʋʋm o. Na'ab la ya'a ken zin'isi'a wʋsa yanam on dɔl o vɛn'-vɛn'.”
9 Soogianam kpɛɛmnam banɛ da lut kɔbiga tuon la da niŋ nwɛnɛ Maanmaan Jehoyada yɛli ba si'em la. Sɔ' wʋsa da buoli ba banɛ gur Vʋ'ʋsʋm Daar la nɛ banɛ pʋ gur daakan la ka ba kɛn Jehoyada onɛ an Maanmaan la san'an na. 10 O da yis Na'ab David zaba la'ad linɛ bɛ Pʋ'ʋsim Yin la na tis soogiakpɛɛmnam la. 11 Banɛ gur la wʋsa da mɔri zaba la'adi ba nu'usin ka zi'enɛ gilig na'ab la kpi'e nɛ maan daka Pʋ'ʋsim Yin la naan tuonnɛ keŋ paae nya'aŋ. 12 Jehoyada da yis na'ab biig la paalʋ na, ka nɔk na'am zupibig la pid o, ka nɔk wada gbauŋʋ tis o ka diis o na'am. Ba da nɔk malʋŋ kpaam bu'oe niŋ o zugin. Ka nidib la nwɛ' nu'us pʋra-pʋra ka tans nɛ kʋkɔtita'ar ye, “Win na tis Na'ab nyɔvʋr wɔk!”
13 Atalia da wʋm banɛ gur zin'ig la nɛ nidib la maan tʋkpiidʋg la, o da kpɛn' nidib la san'an Zugsɔb Pʋ'ʋsim Yin la. 14 O da gɔsi nyɛ Na'ab la zi'e kpi'e zan'antɔlig la nwɛnɛ ba na'am diisʋg malʋŋʋ an si'em la. Kpɛɛmnam la nɛ banɛ piebid kasiŋkaans la da zi'e kpi'e Na'ab la, ka nidib la wʋsa yina maan sumalisim ka piebid kasiŋkaans. Ka Atalia aans o fuud sʋnsa'aŋ zug, ka tans nɛ kʋkɔtita'ar ye, “Biriku'annim ye! Biriku'annim ye!” 15 Jehoyada onɛ an maanmaan la da yɛl soogiakpɛɛmnam la nɛ tuongatib la ye, “Mɔr o dɔl soogianam la teŋsʋkʋ yina ka onɛ wʋsa dɔl, yanam on kʋʋm o!” Bɔzugɔ maanmaan la da yɛl ye, “Li pʋ nar ye ba kʋʋ o Zugsɔb Pʋ'ʋsim Zin'igin laa.” 16 Dinzug on da paae widi dɔl suosi'a kpɛn'ɛd na'ayin la ba da gban'e o kʋʋ o ani.
Jehoyada ti'asʋg la yɛla
17 Jehoyada da naal nɔɔr nɛ Zugsɔb la, nɛ Na'ab la nɛ nidib la, ye ba na an Zugsɔb la nidib. O mɛ da naal nɔɔr nɛ Na'ab la nɛ nidib la. 18 Teŋ la nidib wʋsa da la'asi keŋ Baal teŋgban pʋ'ʋsim dɔɔgin la nwa'ae li ka da'ae teŋgban la bas teŋin. Ba da san'am si'el wʋsa, ka gban'e Matan onɛ an Baal maanmaan la kʋʋ o maan bimbima la tuon. Lin nya'aŋ Maanmaan la da bɔ nidibi gu'ul Zugsɔb Pʋ'ʋsim Zin'ig la. 19 O da nɔk soogiakpɛɛmnam banɛ sʋ'oe nidib kɔbig-kɔbig nɛ Kar dim nɛ banɛ gu'ud, nɛ nimbanɛ bɛ teŋin la wʋsa, la'as taaba yis Na'ab la Zugsɔb Pʋ'ʋsim Zin'igin la dɔl za'anɔkanɛ ka gu'udib bɛ la ni keŋ na'ayin la. Na'ab la yʋ'ʋn da zin'ini o na'am zin'igin. 20 Ka teŋ la nidib wʋsa da maal sumalisim. Ka tempʋʋg la da lɛbi niŋ baanlimm, bɔzugɔ ba da kʋ Atalia nɛ sʋ'ʋg na'ayin la.
21 Joas da anɛ yʋma ayɔpɔi ka di na'am.