Ban kʋ Ahab yidim la yɛla
10
1 Saŋkan la, Ahab biribis banɛ da bɛ Samaria tempʋʋgin la da anɛ pisyɔpɔi. Alazug Jehu da sɔb gbana tis Samaria kpɛɛmnam, nɛ na'ayikpɛm nɛ banɛ gur Ahab biis la. O da yɛl ye, 2 “Ya zugdaan la biis la sadigim bɛɛ ya san'an, ka ya mɛ mɔr zaba tɛrekonam nɛ widi, nɛ teŋ kanɛ kpi'em, nɛ zaba la'ad la, gbauŋ kaŋa ya'a paae ya san'an na, 3 yanam gaŋimi bisʋŋ nɛ onɛ nari ya zugdaan biis la sʋʋgin kɛ ka o zin'inɛ o saam na'am gbauŋ la zug ka ya zi'enɛ o nya'aŋi zab.” 4 Amaa dabiem da gban'e ba ka ba ye, “Na'anama ayi' ya'a daa pʋ nyaŋ oo, tinam na nyaŋɛɛ?” 5 Alazug onɛ da gɔsid na'am yɛla la, nɛ teŋ la tuongat nɛ na'ayikpɛm nɛ banɛ gur la da tɔlim labakaŋa yɛl Jehu: “Ti anɛ fʋ yammis ka na tʋm fʋn ye ti tʋm si'el wʋsa. Tinam kʋ gaŋ sɔ' ye o an na'aba; fʋn maalim linɛ ka fʋ tɛn'ɛs ka li an sʋm tisif.” 6 Jehu da lɛn sɔb gbauŋʋ pɛ'ɛs ayi' yɛti ba ye, “Ya ya'a sid zi'e m nya'aŋ ka siak man yɛl si'el la, alaa fi'igimi ya zugdaan la biis la zuti kɛɛn m san'an Jezireel teŋin bɛog anwa win na.” Na'ab la biis pisyɔpɔi daa bɛ teŋ la tuongatib la san'an ka ba gɔsidi ba. 7 Gbauŋ la da paae na la, dap nwa sid da kɔti kɔt na'abiis pisyɔpɔi la fi'isi ba zut la niŋ pɛɛdin mɔri keŋ Jezireel teŋin tis Jehu. 8 Onɛ daa keŋ nɛ labaar la paae la, o daa yɛl Jehu ye, “Ba mɔr na'abiis la zut la na.” Ka Jehu tis nɔɔr ye, “Digilimini ba dʋya ayi' teŋ la za'anɔɔrin, hali ka bɛog ti nie!” 9 Bɛogʋ da nie la Jehu daa yina zi'en nidib la wʋsa tuon ka yɛl ye, “Ya wʋsa zi' linɛ maal la ti'irɛ. Manɛ daa yii m zugdaan la nya'aŋ ka kʋʋ o, ka anɔ'ɔnɛ kʋ bama? 10 Baŋimi ye, Zugsɔbi yɛl si'eli zaŋi ken yɛlkanɛ na paae Ahab yidim la sid niŋ ya. Zugsɔb la tʋmnɛ nwɛnɛ on kaanb si'em yii o sankpan'as Elaja ni la.” 11 Dinzug Jehu da kʋ onɛ wʋsa an Ahab yin la nid ka bɛ Jezireel, nɛ o kpɛɛmnam nɛ o zuanam nɛ o maanmaannib, ka sɔ'ɔsɔ pʋ kpɛlim.12 Jehu yʋ'ʋn daa yii wa'ae Samaria teŋin la ka paae Bet-Ekɛd linɛ an kɔnbkemnib zin'ig la 13 ka sia'al ninsieba banɛ kpin Ahazaya ka bu'osi ba ye, “Ya aan anɔ'ɔnama?” Ka ba lɛbis ye, “Tinam kpinnɛ Ahazaya ka kena ye ti kaae Na'ab la nɛ na'apu'a la yidim.” 14 Ka o tis nɔɔr ye ba gban'ami ba vʋt ka kɔti ba Bet-Ekɛd bulig la baba. Ba da anɛ dap pisnaasi nɛ ayi'. O da pʋ bas baa nid yinne. 15 On da yii ani la, o da keŋ sia'al Rekab biig Jehonadab ka o bɛ suori kennɛ o san'an na. Jehu da pʋ'ʋs o ka bu'os ye, “Fʋ anɛ yinne nɛ mam wʋʋ man an yinne nɛ fʋ si'em laa?” Ka Jehonadab lɛbis o ye, “Mam anɛ ala mɛn.” Ka Jehu lɛbis ye, “Ya'a aan ala, fʋn gban'ami m nu'ug!” Ka o ʋk o nu'ug ka Jehu gban'e o nu'ugʋ sʋŋ o, ka o dʋʋ kpɛn' zaba tɛreko la ni. 16 Jehu da yɛl o ye, “Dɔllim ka nyɛ Zugsɔb la yɛla pakim si'em!” Ka o kɛ ka o la'am bɛ nɛ o, o mɛŋ tɛreko la ni ka ba keŋ. 17 Jehu n da paae Samaria la, o da kʋ Ahab yidim banɛ kpɛlim la wʋsa. O da san'ami ba, nwɛnɛ Zugsɔb la pian' si'em tis Elaja la.
Jehu n kʋ Baal nidib wʋsa la yɛ
18 Jehu daa yʋ'ʋn la'as nidib la wʋsa yɛli ba ye, “Ahab da tʋm nɛ bi'ela tis Baal teŋgban, amaa man Jehu na dɔl o nɛ nimmua. 19 Nannanna la'asim Baal nɔdi'esidib la nɛ banɛ tʋmmi tisid o nɛ maanmaannib la wʋsa na. Mɔɔmi ka sɔ' da kpɛlim, bɔzugɔ m bɔɔdi maal nɛ maantita'ari tis Baal. Onɛ pʋ kenaa, m na kʋʋ o!” Amaa Jehu daa ma'ad ala ye ba la'as na ka o kʋʋ ba. 20 Jehu da yɛl ye, “Mɔɔlimi nɛ nimmua ye Baal nidib la la'asim na ka ti tis Baal girima!” Dinzug ba daa sid mɔɔl ala. 21 Ka o tʋm ka ba giligi mɔɔl Israel wʋsa ka banɛ an Baal nya'andɔlib la wʋsa yina, sɔ' da pʋ kpɛlim. Ba da la'as teŋgban onɛ buon Baal la dɔɔgin hali ka zin'ig la pɛ'ɛl wʋsa. 22 Ka Jehu yɛl onɛ gur la'ad dɔɔg la ye, “Mɔri fusʋma na pʋdig Baal nya'andɔlib la wʋsa!” O da yis na tɛn'ɛli ba wʋsa. 23 Jehu nɛ Jehonadab onɛ an Rekab biig la da kpɛn' Baal maan dɔɔgin la. Jehu da yɛl Baal maanmaannib la ye, “Gɔsimi ka sɔ' da kpɛn' kpɛla na ka ya'a ka' onɛ maan maannɛ tisid Baal ma'aanɛ. Banɛ dɔl Zugsɔb la da pɛ'ɛs kpɛla baa yinne.” 24 Ba da kpɛn' ye ba maal maana nɛ maan linɛ nyu'od bugum la. Saŋkan la yim ka Jehu da kɛ ka o nidib pisnii gilig dɔɔg la, ka yɛli ba nɛ nimmua ye, “Sɔ' ya'a bas onɛ ka m niŋ o nu'ugin ye o kʋ zɔɔ pɔns, fʋn kanɛ bas o la ka m kʋʋd.” 25 Jehu da naae maan kanɛ nyu'od la, o da tis banɛ gur nɛ tuongatib la nɔɔr ye, “Kpɛn'ɛm kʋʋnɛ ba; mid ka ya bas sɔ' ka o pɔns.” Ba da kie-kie ba nɛ sʋ'ʋsi kʋ. Banɛ da gur nɛ tuongatib la da vaae kum la lɔb yiŋ, ka yʋ'ʋn kpɛn' Baal onɛ an teŋgban la dɔkanɛ bɛ pʋʋgin la 26 ka yis teŋgban kugir la na nyu'oe. 27 Ba da nwa'asi nwa'as kugir la nɛ teŋgban dɔɔg la, ka nidib nɔk zin'ig la maal bangida zin'ig hali ti paae zina. 28 Jehu da niŋ si'em la kpi'ilim Baal maalʋg Israel teŋin la wʋsa.
29 La'am nɛ wala o da pʋ nyaŋi fɛndig ka bas tʋʋmbɛ'ɛd linɛ ka Jeroboam onɛ an Nebat biig la da kɛ ka Israel dim tʋm la, nwɛnɛ ban da wɔ'ɔgid sanlima na'apɔla teŋgbana linɛ ka ba maali zi'el Betel nɛ Dan tɛɛnsin la. 30 Zugsɔb la da yɛl Jehu ye, “Fʋn sadigim maal sʋ'ʋm tʋm nɛ'ɛŋa man nini ni ka maal Ahab zak la wʋʋ mam pʋn gban'e ye m niŋ si'em la, alazug mam mɛ na kɛ ka fʋ yaan-naas gba ti kpɛn diti fʋ na'am la Israel teŋin.” 31 Nɛ wala Jehu da pʋ gu'usi o mɛŋ ka dɔl Zugsɔb onɛ an Israel Wina'am zi'ela la nɛ o sʋnf wʋsaa. O da pʋ bas tʋʋmbɛ'ɛd kanɛ ka Jeroboam da kɛ ka Israel dim tʋm la.
Jehu kum yɛla
32 Dabisban la, Zugsɔb da pin'ili bu'od Israel dim sʋ'ʋlim la. Na'ab Hazael da zabi nyaŋ Israel dim ba teŋ titɔndis la wʋsa ni. 33 O da nyaŋi ba lɛbid Joodan mu'ar dagɔbʋg baba linɛ bɛ Gilead teŋin (Gad nɛ Reuben nɛ Manase sʋ'ʋlim). Lin yi Aroa teŋin, hali ti paae Gilead nɛ Basan tɛɛns wʋsa.
34 Ya'a kpɛlim yɛla banɛ da maal Na'ab Jehu na'am diib saŋa la, on da tʋm si'el nɛ on da nyaŋi maal si'el la, ba da sɔbi li kpɛn'ɛs Israel Na'anam Gbauŋʋn la. 35 Na'ab Jehu n da maal ka'alim la, ba da mum o ban mum o yaanam zin'isi'a la Samaria tempʋʋgin, ka o biig Jehoahas di'e na'am la di. 36 Na'ab Jehu da an Israel na'ab Samaria teŋin nɛ yʋma pisi nɛ anii.