Ban gaŋ Jehu ye o di Israel na'am la yɛla
9
1 Nɔdi'es Elasia da buol dasaŋ sɔ' nɔdi'esidibin la yɛl o ye, Lɔɔmi fʋ fuug la nɛ sɛnbidiŋ, ka nɔk malʋŋ kpaam nɛ buuta nwa n keŋ Ramot-Gilead teŋin. 2 Fʋ ya'a paae ani, fʋn ieem Jehu onɛ an Jehosafat biig, ka o yaab mɛ an Nimsi la bɛ zin'isi'a. Ka keŋ o san'an dɔl o yii o taaba la san'anɛ kpɛn' pʋʋgin dɔɔgin la sa. 3 Ka nɔk buuta la bu'oe malʋŋ kpaam la niŋ o zugin ka yɛl nyain ye, Zugsɔb la yɛl si'eli nwa ye: “Manɛ gaŋif ye fʋ di Israel na'am.” Ka yɔ'ɔg za'anɔɔr la yii zɔ, ka da yuug anii!4 Dasaŋ onɛ an nɔdi'es la sid daa keŋ Ramot-Gilead. 5 On daa paae la, o daa nyɛ soogia kpɛɛmnam la ka ba la'as taaba zin'. Ka o yɛl ye, “Soogiakpɛɛm, m mɔri labaar ye m yɛlif.” Ka Jehu bu'os o ye, “Kpɛɛm kanɛ?” Ka o lɛbis ye, “Fʋn onɛ an soogianam kpɛɛm la.” 6 Jehu da duoe kpɛn' yir la pʋʋg, ka nɔdi'es la bu'oe malʋŋ kpaam la niŋ o zugin ka yɛl o ye, “Zugsɔb onɛ an Israel Wina'am la yɛl ye, ‘Manɛ gaŋif ye fʋ di na'am sʋ'oe Zugsɔb la nidib Israel teŋin. 7 Li anɛ ye fʋ san'am Ahab onɛ daa aan fʋ zugdaan la zak, ka m yɔɔ m yammis la sam, banɛ an nɔdi'esidib nɛ Zugsɔb la yammis banɛ ka Jezebɛl kʋ la wʋsa. 8 Ahab zak la wʋsa na san'am. M na nwaae Ahab yin la biribiŋ kpaanr wʋsa Israel teŋin, o ya'a anɛ yammʋg bɛɛ o ya'a ka' yammʋga. 9 M na kɛ ka Ahab zak la an wʋʋ Jeroboam onɛ an Nebat biig la zaki an si'em la, ka mɛ nwɛnɛ Baasa onɛ an Ahija biig la zak mɛn. 10 Ya'a kpɛlim nɛ Jezebɛl, baasi ye ba ɔnb o Jezireel teŋgbauŋʋn la. Ka sɔ' kʋ mum oo!’ ” Ka o kpɛn yɔ'ɔg za'anɔɔr la ka yii zɔ.
11 Jehu n da yii o kpɛɛm taaba la ni na la, ka ba yinne bu'os o ye, “Li malisaa? Bɔɔ kɛ ka gɛɛŋ kaŋa kɛɛn fʋ san'an na?” Ka Jehu lɛbis ye, “Ayei, ya mi' dau kaŋa nɛ o pian'ayaalis la yɛla!” 12 Ka ba lɛbis ye, “Ayei li ka' sidaa, yɛlimi ti on yɛl si'el!” Ka Jehu lɛbis ye, “O yɛlim ye, ‘Zugsɔb la yɛl ye manɛ bu'oe malʋŋ kpaam niŋi fʋ zugin ye fʋ di Israel na'am.’ ” 13 Ba da niŋ tɔ'ɔtɔ yɛɛsi ba fuudi yadigi o tuon na'am bimbim la zug. Ka pieb na'atan, ka tans nɛ kʋkɔtita'ari yɛl ye, “Jehu di na'am!”
Jehu n kʋ Joram nɛ Ahazaya la yɛla
14 Dinzug Jehu onɛ an Jehosafat biig ka an Nimsi yaaŋ la da gban'e bɛ'ɛd Joram yɛla (saŋkaŋa Joram nɛ Israel dim wʋsa da sʋŋid Ramot Gilead n gu'ud Hazael onɛ an Aram Na'ab la. 15 Amaa Na'ab Joram da pʋn lɛb Jezireel bɔɔd ye o ti'eb o mɛŋ, Aram dimi da pu'alim o, on da zab nɛ Hazael onɛ an Aram Na'ab la zug.) Jehu da yɛl ye, “Li ya'a an fʋn tɛn'ɛs si'em nwa, da kɛ ka sɔ' nyaŋi su'a yi kpɛla keŋ yɛl Jezireel dim labakaŋaa.” 16 O da kpɛn' o zaba tɛreko ni keŋ Jezireel, bɔzugɔ Joram da bɛ nɛ ani vʋ'ʋsid, ka Ahazaya onɛ an Juda Na'ab la keŋ ye o pʋ'ʋs o.
17 Onɛ ya'ae Jezireel girimbisa zugʋ gur teŋ la nyɛ Jehu nɛ o nidib la li'en na la, ka o tans ye, “Mam nyɛ nidibi la'asi kenna.” Ka Joram tis nɔɔr ye, “Bɔɔm wiedban'ad ka o yii keŋ tʋ'ʋs o bu'osi ye o kennɛ sumbʋgʋsʋm kennaa?” 18 Wiedban'ad la da tʋ'ʋs Jehu ka yɛl o ye, “Na'ab ye m bu'osif ye sumbʋgʋsʋm ken ka fʋ kennaa?” Ka Jehu lɛbisi o ye, “Fʋ bɔɔd sumbʋgʋsʋm ye fʋ niŋ bɔ? Gaadim dɔllim nya'aŋ!” Onɛ ya'ae agɔlli gur teŋ la da yɛl ye, “Onɛ ka fʋ tʋm la paae ba, amaa o pʋ lɛbid naa.” 19 Ka Na'ab la lɛn tʋm wiedban'adi pɛ'ɛs ayi'. On da tʋ'ʋs o la o da yɛl o ye, “Na'ab ye m bu'osif ye fʋ ken la anɛ sumbʋgʋsʋm?” Ka Jehu lɛbis o ye, “Fʋ bɔɔd sumbʋgʋsʋm ye fʋ niŋ bɔ? Gaadim dɔllim nya'aŋ!” 20 Ka onɛ ya'ae agɔlli gur teŋ la yɛl ye, “O paae ya, amaa o pʋ lɛbid na mɛnɛ; onɛ dɔribid zaba tɛreko la nwɛnɛ Nimsi biig Jehu nɛ, bɔzugɔ o dɔribidnɛ nwɛnɛ gɛɛŋ!”
21 Ka Joram tans ye, “Lɔɔmi m zaba tɛreko tisim!” Ka ban lɔɔ naae la, Joram onɛ an Israel Na'ab nɛ Ahazaya onɛ an Juda Na'ab la da ban'a yi, sɔ' wʋsa nɛ o mɛŋ zaba tɛreko, ye ba tʋ'ʋs Jehu. Ba da tʋ'ʋs o nɛ pɔkanɛ an Nabof onɛ an Jezireel teŋ nid la din la zinzema. 22 Joram n da nyɛ Jehu la o da bu'os o ye, “Jehu, fʋ ken la anɛ sumbʋgʋsʋm?” Ka Jehu lɛbis ye, “Li ye li niŋ wala ka sumbʋgʋsʋm bɛ, teŋgbana la wʋsa nɛ fʋ ma Jezebɛl sɔɔng la ya'a nam bɛ?” 23 Joram da fɛndigi zɔ, ka yʋ'ʋn buonnɛ yɛt Ahazaya ye, “Ahazaya, zɔm ka li mu'oe nɛ, ba yii ti nya'aŋ!” 24 Jehu da tɛk o tiraugʋ tɔn ka li gban'e Joram gʋrʋgʋ gaadi kʋnsi o susʋnya ka o luu o zaba tɛreko la pʋʋgin galli! 25 Jehu da yɛl Bidkar onɛ aan o zaba tɛreko tɛɛd la ye, “Ʋkʋm o lɔbig Nabof onɛ an Jezireel teŋ nid la pɔɔgin. Tiɛnm Zugsɔb la da nie pian' o yɛla si'em, saŋkanɛ ka mam nɛ fʋn daa la'am ban'ad zaba tɛrekonamɛ bɛɛ o saam Ahab nya'aŋ la; ka o yɛl ye 26 Zugsɔb la yɛl ye, ‘Su'os man sa nyɛ Nabof nɛ o biis ziim, ka m na kɛ ka fʋ yɔɔ li sam pɔkaŋa ni’ Dinzugɔ, nannanna ʋkimi nɛ o lɔb pɔɔgin la nwɛnɛ Zugsɔb la da yɛl si'em la.”
27 Juda Na'ab Ahazaya nyɛ bʋn linɛ maal la, o daa zɔɔ dɔl suori keŋ Bef-Hagan, ka Jehu mɛ zɔɔ dɔl o tansid ye, “Kʋʋmi nɛ o mɛn!” Ba da pu'alim o, o zaba tɛreko la pʋʋgin, on da dɔl suori wa'ae Gur linɛ kpi'e Ibilam teŋin la, amaa o da zɔɔ pɔns ka keŋ Megido teŋin kpii ani. 28 O yammis da zii o nɛ zaba tɛreko keŋ Jerusalem mum o, o yaanam yaadin David tempʋʋgin la. 29 (Joram onɛ an Ahab biig la da zin'in Israel na'am gbauŋ zug yʋma pii nɛ yinne la, Ahazaya da di Juda Na'am.)
Ban kʋ Jezebɛl la yɛla
30 Jehu da keŋ Jezireel teŋin. Jezebɛl n da wʋm la o da kir kirʋ, ka maali maal o zuobid ka zin' takoro ni. 31 Jehu da kpɛn' za'anɔɔrin la, o da bu'os o ye, “Li malis ka fʋ kennaa, Zimiri, fʋn kanɛ kʋʋ fʋ zugdaan la?” 32 Jehu da gɔdigi gɔs takoro la ni ka tans ye, “Anɔ'ɔnɛ zi'e m nya'aŋa? Anɔ'ɔnɛ?” Nidiba ayi' bɛɛ atan' banɛ ka ba fuoe ba ye ba gɔsid pu'ab la daa su'uni gɔs o. 33 Ka Jehu lɛbis ye, “Yisimi nɛ o lɔb na!” Ba da sid yis o lɔbi bas na, ka o ziim la tɔn'ɔsi mad dɔkpin la nɛ widi banɛ nɔ o nɛ nɔba la. 34 Jehu da kpɛn' di ka nu. Ka yʋ'ʋn yɛl ye, “Zaŋimi pu'a kanɛ ka nɔpɔɔr bɛɛ o zug la keŋ mum o, bɔzugɔ o anɛ na'abiig.” 35 Amaa ban da yi ye ba mum o la, ba da pʋ nyɛ si'ela asɛɛ o zuwauŋ nɛ nɔba nɛ nu'us. 36 Ka ba lɛb Jehu san'anɛ yɛl o. Ka o lɛbis ye, “Nɛ' anɛ Zugsɔb pian'akanɛ ka o daa pian' dɔlisi yii Elasia onɛ an Tisib teŋ nid la ni na ye, ‘Jezireel teŋgbauŋʋn ka baas ye ba ɔnb Jezebɛl niŋgbiŋ. 37 Jezebɛl niŋgbiŋ na nwɛnɛ sa'adi dig Jezireel teŋgbauŋ zug, ka sɔ' kʋ nyaŋi yɛl ye Jezebɛl niŋgbiŋi nwa.’ ”