Seunim nid la di'e o pɔɔd la yɛla
8
1 Saŋkaŋa Elasia da yɛl pu'a kanɛ ka o biig daa kpi ka o sɔs Zugsɔb la ka biig la lɛn vʋ'ʋg la ye, “Yim dɔlli fʋ yidim la keŋ zin'ikanɛ ka fʋ gɔs ka fʋ na nyaŋi bɛ, bɔzugɔ Zugsɔb gban'e ye kɔ'ɔm na lu teŋ kaŋa zug yʋma ayɔpɔi.” 2 Pu'a la sid daa yi nwɛnɛ Wina'am tʋmtʋm la yɛl o si'em la. On nɛ o yidim la da yii keŋ Filistia dim teŋin la yʋma ayɔpɔi. 3 Yʋma ayɔpɔi la nya'aŋ ka o naam Filistia dim teŋin la lɛb na ka keŋ Na'ab la san'an ye o sɔs ka ba lɛbisi o yir la nɛ o paalʋ la tis o. 4 Na'ab la da pian'ad nɛ tisid Gehazi, onɛ an Wina'am tʋmtʋm sankpan'as la, ka bu'os o ye, “Yɛlimim tʋʋm titada banɛ ka Elasia tʋm.” 5 Gehazi nam bɛɛ ani yɛt Na'ab la ye Elasia da kɛ ka kum vʋ'ʋg la ka pu'a kanɛ biig ka Elasia da vʋ'ʋg o kumin la mɛ kena ye o bɛllim Na'ab la di'e o yir nɛ paalʋ la. Ka Gehazi yɛl ye, “Pu'a la nwa, m zugdaan nɛ m Na'aba. O bikanɛ ka Elasia daa vʋ'ʋg kumin la nwa mɛn!” 6 Na'ab la da bu'os pu'a la li yɛla, ka o yɛl o li wʋsa. Ka o nɔk yɛl la niŋ na'ayikpɛɛm yinne nu'ugin ye, “Lɛbisim linɛ wʋsa an pu'a la la'adi tis o, la'am nɛ o pɔɔd zʋʋd ligidi kanɛ wʋsa ka ya nyɛ lin pin'il saŋkanɛ ka o daa yi teŋa la ti paae zina.”Hazael n kʋ Ben-Hadad la yɛla
7 Elasia da keŋ Damaskus tempʋʋgin, ka Ben-Hadad onɛ an Aram Na'ab la bɛn'ɛd. Ban da yɛl Na'ab la ye Wina'am tʋmtʋm la keŋ hali paae ba teŋin na la, 8 Na'ab la da yɛl Hazael ye, “Nɔkim piini keŋ tʋ'ʋs Wina'am tʋmtʋm la. Sɔsim o ye o bu'os Zugsɔb la tisim ye, m na tilig ban'a kaŋa nii?” 9 Hazael da keŋ tʋ'ʋs Elasia ka nɔk la'asʋma banɛ bɛ Damaskus wʋsa lɔɔ ziil yʋgʋma pisnaasi. O da kpɛn' zi'enɛ o tuon, ka yɛl ye, “Fʋ biig Ben-Hadad onɛ an Aram Na'ab la tʋmim ye m bu'os ye, o na tilig ban'a kaŋa nii?” 10 Elasia da gandig ye, “Kem yɛl o ye, ‘Fʋ sid na tilig’, amaa Zugsɔb la nie pa'alim ye o lɛɛ na kpi.” 11 O da kpa' gɔt o kii hali ka nyan ti gban'e Hazael. Ka Wina'am tʋmtʋm la pin'ili kum. 12 Ka Hazael bu'os ye, “M zugdaana, bɔ ka fʋ kumma?” Ka o lɛbis ye, “Mam mi' tɔɔg kanɛ ka fʋ ye fʋ tʋm tis Israel dim la zug! Fʋ na nyu'oe zin'ibanɛ aan ba paŋ zin'is la, ka kʋʋ ba dasam la wʋsa nɛ sʋ'ʋg, ka nɔki ba bilies la fanbig teŋ, ka lati ba pu'a pʋʋs la pʋya.” 13 Hazael daa yɛl ye, “Ayei, m zugdaana! Mam, tadimbʋkaŋa, na niŋ wala tʋm tʋʋmfɛn'ɛskaŋa?” Ka Elasia lɛbis ye, “Zugsɔb la pa'alim ye fʋ na di Aram Na'am.” 14 Ka Hazael bas Elasia ka lɛbi o zugdaan la san'an. Na'ab Ben-Hadad da bu'os o ye, “Elasia yɛlif ye bɔ?” Ka Hazael lɛbis o ye, “O yɛlim ye fʋ na vʋ'ʋg.” 15 Amaa bɛogʋ da nie la o da nɔk futɛbisʋgʋ lɔs ku'omin ligil Na'ab la nindaa ka o kpi. Ka Hazael di'e o zin'igi di na'am la.
Jehoram onɛ an Juda Na'ab la yɛla
16 Israel na'ab Joram onɛ an Ahab biig la da di na'am paae yʋma anu la, ka Jehoram onɛ da an Jehosafat biig la mɛ di Juda na'am. 17 O da anɛ yʋma pistan' nɛ ayi' ka di na'am la, ka da zin'in na'am gbauŋ la zug Jerusalem tempʋʋgin yʋma anii. 18 O da dinɛ Ahab pu'ayua ka dinzugʋ kɛ ka o da dɔlis wʋʋ Israel na'anamɛ da dɔlisid si'em la, nwɛnɛ Ahab yidimi da niŋ si'em, ka tʋm bɛ'ɛd pamm Zugsɔb tuon la. 19 La'am nɛ wala, Zugsɔb la da pʋ siak ye o san'am Juda teŋ la, David n aan o sankpan'as la zug. O da kaanb ye o na kɛ ka fitir si'a kpɛm bɛɛ tis David nɛ o yaas, saŋa linɛ ka' naarɛ. 20 Jehoram saŋa la, Edom da zan'as Juda dim ka diisi ba mɛŋ na'ab. 21 Dinzug Jehoram da keŋ Zair nɛ o zaba tɛrekonam la wʋsa, ka Edom dim la da gilig on nɛ o kpi'emnam banɛ gɔt zaba tɛrekonamin la, amaa o da duoe yʋ'ʋŋʋ aaɛn yi. O soogianam la lɛɛ da zɔnɛ lɛbi kul. 22 Hali ti paae zina Juda pʋ lɛn sʋ'oe Edom dim la. Libna teŋ dim mɛ da zan'as nɛ saŋa kan mɛn. 23 Ya'a anɛ yɛla banɛ da maal Jehoram na'am saŋa nɛ on da tʋm si'el la, ba da sɔbi niŋ Juda Na'anam Gbauŋʋn la. 24 Jehoram da maal ka'alim ka ba mum o David mɛŋ tempʋʋgin. Ka o biig Ahazaya lɛdigi di'e na'am la.
Ahazaya di Juda na'am la
25 Ahab biig Joram da di Israel na'am ka li ti paae yʋma pii nɛ ayi' la, Na'ab Jehoram biig Ahazaya n da di na'am. 26 Ahazaya da anɛ yʋma pisi nɛ ayi' ka di na'am ka da zin'in na'am gbauŋ zug Jerusalem tempʋʋgin yʋʋm yinne. O ma yʋ'ʋri da buon Atalia onɛ da an Israel Na'ab Omir biig la. 27 O da dɔlisid wʋʋ Ahab yidimi niŋ si'em la ka tʋm bɛ'ɛd Zugsɔb la tuon, nwɛnɛ Ahab yidimi da niŋ si'em la, bɔzugɔ o kpinɛ Ahab yidim la nɛ on di pu'a ani la zug. 28 Ahazaya da dɔl Ahab biig, Joram keŋ zab nɛ Hazael onɛ an Aram Na'ab la, Ramot Gilead teŋin. Aram dim la da pu'alim Joram 29 ka o da lɛb Jezireel tempʋʋgin ye o ti'ebi o mɛŋ sapu'ad kanɛ ka Aram dim pu'alim o Ramot teŋin la, on da zabid nɛ Hazael onɛ an Aram Na'ab la. Ahazaya onɛ an Juda Na'ab ka an Jehoram biig la da keŋ Jezireel ye o kaae Joram onɛ an Ahab biig la, bɔzugɔ ba da pu'alim o nɛ.