Na'ab Ahazaya n di Juda na'am la yɛla
22
1 Jerusalem nidib da kɛ ka Ahazaya onɛ an Na'ab Jehoram kpaanr la di'e o saam zin'igi di na'am, bɔzugɔ Arab nidib la da keŋ nwɛ' tanpi kʋʋ o bieyanam la wʋsa. Linzug Ahazaya onɛ an Jehoram biig la da di na'am la. 2 Ahazaya da anɛ yʋma pisi nɛ ayi' ka di na'am ka da zin'in na'am gbauŋ zug Jerusalem tempʋʋgin yʋʋm yinne. O ma yʋ'ʋri da buon Atalia onɛ da an Na'ab Omir yaaŋ. 3 Na'ab Ahazaya mɛ da dɔlisid wʋʋ Ahab yidimi niŋ si'em la bɔzugɔ o ma da sʋŋid o nɛ ka o tʋm bɛ'ɛd. 4 O da tʋm bɛ'ɛd Zugsɔb la tuon, nwɛnɛ Ahab yidimi da niŋ si'em la, bɔzugɔ o saam kum nya'aŋ la banɛ da sa'al o ka o tʋm linɛ pʋ nar la, da san'am o yɛla. 5 O mɛ da dɔlli ba sa'ala on da dɔl Ahab biig, Joram n keŋ zab nɛ Hazael onɛ an Aram Na'ab la, Ramot Gilead teŋin. Aram dim la da pu'alim Joram 6 ka o lɛb Jezireel tempʋʋgin ye o ti'eb o mɛŋ pu'alʋŋ kanɛ ka Aram dim pu'alim o Ramot teŋin, on da zabid nɛ Hazael onɛ an Aram Na'ab la.Ahazaya onɛ an Juda Na'ab ka an Jehoram biig la da keŋ Jezireel ye o kaae Joram onɛ an Ahab biig la, bɔzugɔ ba da pu'alim o nɛ. 7 Ahazaya n da kaae Joram la zug, Wina'am da kɛ ka Ahazaya lu. Ahazaya n da paae la, o da dɔl Joram nya'aŋi yi ye o tʋ'ʋs Jehu onɛ an Nimsi biig onɛ ka Zugsɔb la gaŋ ye o san'am Ahab zak la. 8 On da nan kʋʋd Ahab yidim la, o da nyɛ Juda kpɛɛmnam nɛ Ahazaya du'adib bibanɛ da sʋŋid Ahazaya la, ka mɛ kʋʋ ba pɛ'ɛs. 9 Ka yʋ'ʋn kpɛn' ieed Na'ab Ahazaya mɛŋ, on da su'ad Samaria tempʋʋgin la. Ka Jehu nidib la da nyɛɛ o ani gban'e o. Ba da mɔr o keŋ Jehu san'an na n kʋʋ o. Ba da mum o, bɔzugɔ ba da yɛl ye, “O anɛ Jehosafat onɛ da dɔl Zugsɔb la nɛ o sʋnf wʋsa la biig.” Alazug sɔ' da lɛn kae Ahazaya yin la an wisiŋa na di'e na'am la.
Atalia nɛ Joas yɛla
10 Na'ab Ahazaya ma la yʋ'ʋri da buon Atalia. On da nyɛ ka ba kʋ o biig Na'ab Ahazaya la, o da duoe gban'e na'am tuŋ la dim wʋsa kʋ. 11 Amaa Jehoseba, onɛ da an Na'ab Joram pu'ayua la, da nɔk o taʋn Na'ab Ahazaya biig Joas n yis na'ayin la mɔr o zɔɔ yi banɛ da bɔɔd ye ba kʋʋ o la san'an. O da nɔk o nɛ o biyuol la su'a dɔgbɛɛndigin, zin'ikanɛ ka Atalia kʋ nyɛɛ o: li da kɛ ka ba pʋ nyaŋi kʋʋ o. 12 On nɛ ban da kpɛm bɛ suakin Wina'am Pʋ'ʋsim Yin la yʋma ayuobʋ, Atalia da di na'am saŋsi'a la.