Ban da ki'is Atalia la yɛla
23
1 Atalia da dii o na'am la, li yʋma ayɔpɔi saŋa la, Jehoyada da tʋm buol soogianam kpɛɛmnam la banɛ sʋ'oe nidib kɔbig-kɔbig, ka ba yʋda aan Azaria Jeroham biig, nɛ Isimael Jehohanan biig, nɛ Azaria sɔ' onɛ saamme da an Obɛd la, nɛ Maaseya Adaya biig, nɛ Zikir biig Elisafat. 2 Ba da kaae Juda sʋ'ʋlim tɛɛns la wʋsa ka la'as Levi dim nɛ Israel dim wʋsa yidaannam la na. Ban da paae Jerusalem tempʋʋgin na la, 3 nidib wʋsa da la'as Wina'am Pʋ'ʋsim Yin la na naal nɔɔr nɛ Na'ab la.Jehoyada da yɛli ba ye, “Na'ab biig la na di na'am sʋ'oe sʋ'ʋlim la wʋʋ Zugsɔb la da zi'el nɔɔr si'em tis Na'ab David yaas la. 4 Ka yanamɛ ye ya tʋm si'em nwa: yanam maanmaannib nɛ Levi dim banɛ ka ba pʋdig zin'is atan' ye ya pʋdigir yinne tʋm Vʋ'ʋsʋm daar la, kɛlli ka pʋdigir yinne gur za'anɔya la, 5 ka pʋdigir yinne mɛ gur na'ayir la, ka yinne mɛ gur ɛɛnbir Yaŋir la: ka banɛ kpɛlim la wʋsa na zi'en Zugsɔb Pʋ'ʋsim Yir za'asin la gu'ud. 6 Mid ka sɔ' kpɛn' Pʋ'ʋsim Yin la ka li ya'a ka'anɛ maanmaannib nɛ Levi dim banɛ bɛɛ li tʋʋma ni la ma'aanɛ; banɛ na nyaŋi kpɛn' bɔzugɔ ba anɛ banɛ maali ba mɛŋ kasi. Banɛ kpɛlim la wʋsa anɛ ye ba gur zin'ibanɛ ka Zugsɔb la pa'ali ba ye ba gur la. 7 Kɛl ka Levi dim wʋsa zanli ba zaba la'ad ka zi'enɛ gilig Na'ab la. Sɔ' ya'a kpɛn' Pʋ'ʋsim Yin la yanam on kʋʋm o. Dɔlli Na'ab la vɛn'-vɛn' on ken zin'isi'a wʋsa.”
8 Levi dim nɛ Juda nidib la wʋsa da niŋ nwɛnɛ Maanmaan Jehoyada yɛli ba si'em la wʋsa. Sɔ' wʋsa da buol o nimbanɛ gur Vʋ'ʋsʋm Daar la nɛ banɛ pʋ gur daakan la mɔri ba kɛn Jehoyada onɛ an Maanmaan la san'an na. 9 O da yis Na'ab David zaba la'ad linɛ bɛ Pʋ'ʋsim Yin la na tis soogiakpɛɛmnam la. 10 Banɛ gur la wʋsa da mɔr zaba la'adi ba nu'usin ka zi'enɛ gilig Na'ab la kpi'e nɛ maan daka Pʋ'ʋsim Yin la, lin naan ya-dagɔbʋgʋ keŋ paae datiuŋ.
11 Jehoyada nɛ o biis la da yis Na'ab biig la paalʋ na, ka nɔk na'am zupibig la pid o, ka nɔk wada gbauŋʋ tis o ka diis o na'am. Ba da nɔk malʋŋ kpaam bu'oe niŋ o zugin ka tans nɛ kʋkɔtita'ar ye, “Win na tis Na'ab nyɔvʋr wɔk!” 12 Atalia n da wʋm nidib la maan tʋkpiidʋg nɛ ban zɔti zɔt ka dʋ'ʋsid Na'ab la si'em la, o da kpɛn' ba san'an Zugsɔb Pʋ'ʋsim Yin la. 13 Ka gɔsi nyɛ Na'ab la zi'e kpi'e o zan'antɔlig la bɛ za'anɔɔrin baba la. Ka mɛ nyɛ kpɛɛmnam la nɛ banɛ piebid na'atana la da zi'e kpi'e Na'ab la, ka nidib la wʋsa maan sumalisim ka piebid na'atana la. Ka Atalia aans o fuud, ka tansi kaasi yɛl ye, “Biriku'annim ye! Biriku'annim ye!”
14 Jehoyada onɛ an Maanmaan la da yɛl soogia kpɛɛmnam nɛ tuongatib la ye, “Mɔr o dɔl soogianam la teŋsʋkʋ yii na ka onɛ wʋsa dɔl, yanam on kʋʋm o!” Bɔzugɔ Maanmaan la da yɛl ye, “Li pʋ nar ye ba kʋʋ o Zugsɔb Pʋ'ʋsim Yin laa.” 15 Dinzug on da paae widi dɔl suosi'a kpɛn'ɛd na'ayin la ba da gban'e o kʋʋ ani.
16 Jehoyada da naal nɔɔr nɛ Zugsɔb la nɛ Na'ab nɛ nidib la, ye ba na an Zugsɔb la nidib. 17 Teŋ la nidib wʋsa da la'asi keŋ Baal teŋgban Pʋ'ʋsim Dɔɔgin la nwa'ae li ka da'ae teŋgban la bas teŋin. Ba da san'am si'el wʋsa, ka gban'e Matan onɛ an Baal maanmaan la kʋ maan bimbima la tuon.
18 Jehoyada yʋ'ʋn da nɔk Zugsɔb Pʋ'ʋsim Yir tʋʋma sʋ'ʋlim niŋ maanmaannib banɛ da yi Levi dɔɔgin na la nu'usin. Bama ka Na'ab David da pʋn zi'eli ba tʋʋma Pʋ'ʋsim Yir pʋʋgin, ye ba maan nyu'or maana tisid Zugsɔb la wʋʋ lin sɔb si'em Moses Wada Gbauŋʋn la, ka tʋmmi ba tʋʋma nɛ sumalisim nɛ yʋʋma, wʋʋ Na'ab David n da zi'eli ba si'em la. 19 O da zi'el za'anɔgu'udib ye ba zi'e Zugsɔb Pʋ'ʋsim Yir za'anɔya la ni, linɛ na kɛ ka onɛ wʋsa an dian'ad sɔb kʋ kpɛn' ani.
20 O da nɔk soogiakpɛɛmnam banɛ sʋ'oe nidib kɔbig-kɔbig, nɛ banɛ gu'ud, nɛ nimbanɛ bɛ teŋ la ni wʋsa n zi'el. Ka yis na'ab la Zugsɔb Pʋ'ʋsim Yin la dɔl Za'anɔɔr kanɛ bɛ zugin la keŋ na'ayin la. Na'ab la yʋ'ʋn da zin'inɛ o na'am zin'igin la. 21 Teŋ la nidib wʋsa da maal sumalisim. Ka tempʋʋg la da lɛbi niŋ baanlimm, bɔzugɔ ba da kʋʋ Atalia.