21
1 Jehosafat da maal ka'alim ka ba mum o, David tempʋʋgin. Ka o biig Jehoram da di'e o zin'igi di na'am la. 2 Jehoram pitib banɛ da an Jehosafat biis da anɛ: Azaria nɛ Jehel nɛ Zakaria nɛ Azariyahu nɛ Maikel nɛ Sefatia, bama wʋsa da anɛ Jehosafat onɛ an Israel na'ab la biis. 3 Ba saam da tisi ba piini bɛdegʋ linɛ an anzurifa nɛ sanlima nɛ la'ad linɛ mɔr nyɔɔd la'am nɛ teŋ kpi'ema banɛ bɛ Juda sʋ'ʋlimin, amaa o da nɔk na'am sʋ'ʋlim la nɛ tis Jehoram bɔzugɔ onɛ da aan o bikpɛŋ.Jehoram onɛ an Juda na'ab la yɛla
4 Jehoram da ba' nya'a sʋ'ʋŋa o saam sʋ'ʋlim la ni la, o da kʋʋ o pitib la wʋsa la'am nɛ kpɛɛmnam banɛ bɛ Israel la sieba. 5 Jehoram da anɛ yʋma pistan' nɛ ayi' ka di na'am la, ka da zin' na'am gbauŋ la zug Jerusalem tempʋʋgin yʋma anii. 6 O da di Ahab pu'ayua ka dinzug o da dɔlis wʋʋ Israel na'anamɛ dɔlisid si'em la, nwɛnɛ Ahab yidimi da niŋ si'em la, ka tʋm bɛ'ɛd pamm Zugsɔb la tuon. 7 La'am nɛ wala, o sankpan'as David zugɔɔ, Zugsɔb la da pʋ siak ye o san'am Juda teŋ laa. O da kaanb ye o na kɛ ka fitir si'a kpɛm bɛɛ tis David nɛ o yaas, saŋa linɛ ka' naarɛ. 8 Jehoram saŋa la, Edom da zan'as Juda dim ka diisi ba mɛŋ na'ab. 9 Dinzug Jehoram da keŋ Zair teŋin nɛ o zaba tɛrekonam la wʋsa, ka Edom dim la da gilig on nɛ o kpi'emnam banɛ gɔt zaba tɛrekonam la, amaa o da duoe yʋ'ʋŋʋ aaɛn yi. 10 Hali ti paae zina Juda pʋ lɛn sʋ'oe Edom dim la.
Libna teŋ dim mɛ da zan'as nɛ saŋa kan mɛn, bɔzugɔ Jehoram da ki'is Zugsɔb onɛ aan o yaanam Wina'am la. 11 O mɛ da mɛ' bada zin'is linɛ bɛ Juda zuoya la zug, ka kɛ ka Jerusalem dim yʋ'ʋn tʋm nwɛnɛ pu'agɔɔnda nɛ ka kɛ ka Juda kpɛn' mɔɔg.
12 Jehoram da di'e gbauŋʋ yi Wina'am nɔdi'es Elaja san'an ka li yɛt ye, “Zugsɔb onɛ aan fʋ yaab David Wina'am la yɛl si'em nwa ye: ‘Fʋ pʋ dɔl suokanɛ ka fʋ saam Na'ab Jehosafat da dɔl la, bɛɛ Juda na'ab Asa n da an si'em la. 13 Amaa fʋ dɔlli Israel dim na'anam suoya, ka kɛ ka Juda nɛ Jerusalem nidib pʋ bɛ zin'ig yinnee ka yuod wʋʋ Ahab zaki maal si'em la. Fʋ mɛ kʋʋ fʋ mɛŋ pitib, fʋ saam yir nidib, dap banɛ da sɔn'ɔf. 14 Nannanna Zugsɔb la ti'ebnɛ ye o nwɛ' fʋ nidib la. Fʋ biribis, nɛ fʋ pu'ab, nɛ linɛ wʋsa aan fʋ din, o na nwɛ' ba kpisinkpil tita'ar. 15 Fʋ mɛŋ ye fʋ bɛn'ɛnɛ ban'abɛ'og, ban'akanɛ pʋ basid na gban'e fʋ gbinvɔ-nyɔɔg, hali ka ban'a la ti kɛ ka fʋ gbinvɔ-nyɔɔg la yi paalʋ na.’ ”
16 Zugsɔb la da kɛ ka Filistia dim nɛ Arab dim banɛ da kpi'e nɛ Kus buudi la sʋnf duoe nɛ Jehoram. 17 Ba da keŋ zab nɛ Juda dim la nyaŋi ba, ka vaae la'asʋma banɛ ka ba nyɛ na'ayin la wʋsa, la'am nɛ na'ab la pu'ab nɛ o biis. Biig baa yinne da pʋ kpɛlim o san'anɛ asɛɛ Ahazaya onɛ an kpaanr la.
18 Nɛ' nya'aŋ Zugsɔb la sid da kɛ ka ban'akanɛ ka' ti'ebʋg gban'e o gbinvɔ-nyɔɔg. 19 Lin da bɛɛ ala zaŋi ken yʋma ayi' la o gbinvɔ-nyɔɔg la da yi paalʋ na ban'a la zug, zabid hali ka o ti kpi zabir la zug. O nidib la da pʋ nyu'oe bugum tis o na'asi wʋʋ ban da niŋ si'em tis o yaanam la.
20 Jehoram da anɛ yʋma pistan' nɛ ayi' ka di na'am, ka da di Jerusalem na'am yʋma anii. On da maal ka'alim la li da pʋ daam sɔ'ɔɔ, ka ba mum o David mɛŋ tempʋʋgin, amaa ba da pʋ mum o na'anam yaadinɛ.