Jehosafat n da nyaŋ Moab nɛ Ammon si'em
20
1 Nɛ' nya'aŋ la Moab dim nɛ Ammon dim nɛ Meun dim sieba da kena ye ba zab nɛ Jehosafat. 2 Dap sieba da kena yɛl Jehosafat ye, “Zabzabidib bɛdegʋ yi Edom nɛ Atɛuk la nya'aŋ baba kenna ye ba zab nɛf. Ba pʋn paae Hazazɔn Tamar.” (En-Gedi teŋi la). 3 Dabiem da kpɛn' Jehosafat ka o keŋ ye o bu'os Zugsɔb la ka yɛl Juda teŋ nidib wʋsa ye ba lɔɔm nɔɔr. 4 Juda nidib la wʋsa da la'as taaba bɔɔd sʋŋir Zugsɔb la san'an. Ba da naan zin'ig wʋsa linɛ bɛ Juda sʋ'ʋlimin la la'as na ye ba bɔ sʋŋir o san'an. 5 Ka Jehosafat duoe zi'en Juda nɛ Jerusalem tɛɛns la ni, Zugsɔb Pʋ'ʋsim Yir zak paalig la tuonnɛ 6 yɛl ye,“Zugsɔba, fʋnɛ aan ti yaanam Wina'am. Fʋ ka'anɛ Wina'am bɛ arezana nii? Fʋnɛ sʋ'oe dunia sʋ'ʋlim wʋsa. Paŋ nɛ kpi'euŋ bɛ nɛ fʋ nu'usin, ka sɔ' kae na nyaŋi zi'enɛ fʋ tuonnɛ. 7 Oo ti Wina'am, ka' fʋʋ da kad teŋ la nidib ka bas suori tisi fʋ nidib Israel, ka lɛn nɔki li tis Abraham onɛ aan fʋ zua la yaas laa? 8 Ba zin'inɛ ani ka mɛ' Pʋ'ʋsim Yir ani tisi fʋ yʋ'ʋri yɛt ye, 9 ‘Tɔɔg ya'a ti paae ti, ka li anɛ zaba bɛɛ ban'as bɛɛ kɔ'ɔm, ti na zi'enɛ fʋ tuon Pʋ'ʋsim Yir linɛ ka fʋ yʋ'ʋr bɛɛ ani la kaasi ti sʋnsa'aŋ la pʋʋgin ka fʋ wʋm tisi ti ka faaɛn ti.’ 10 Amaa nannanna dap nwa yit Ammon nɛ Moab nɛ Zuokanɛ buon Seir la kenna. Israel dimi da yi Egipt na la fʋ da pʋ siak ye ba kpɛn' ba tɛɛnsin la daami ba; ka ba sid fɛndig ka pʋ keŋ daami ba. 11 Gɔsim ban yʋ'ʋn ye ba yɔ si'eli lɛbisi ti! Ba kenna ye ba kadi ti yis faar kanɛ ka fʋ tisi ti ye ti sʋ'oe la zug. 12 Oo ti Wina'am, fʋ kʋ kadi ba sariaa? Ka tinam ka' paŋ kanɛ na tʋ'ʋs zabzabidib banɛ wʋsa kenna ye ba zab nɛ ti la. Ti zi' tinamɛ ye ti niŋ si'em, amaa ti kpɛn gɔsidnɛ fʋ.”
13 Juda dap la wʋsa nɛ ba pu'ab nɛ dasam nɛ biis da zi'en ani Zugsɔb la tuon. 14 Ka Zugsɔb Siig la sig Jahaziel onɛ an Zakaria biig la zug, onɛ saamme an Benaya ka Benaya saam mɛ an Jeiel ka Jeiel saam mɛ an Matanaya onɛ an Levi dɔɔg nid ka an Asaf yaaŋ la. Ka o duoe zi'en nidib la la'asʋgʋn la 15 ka yɛl ye, “Kɛlisimi, Na'ab Jehosafat nɛ banɛ wʋsa bɛ Juda nɛ Jerusalem! Zugsɔb la yɛt si'eli nwa tisidi ya: ‘Da kɛ ka dabiem mɔri ya bɛɛ ya sʋnf san'am nɛ soogianam banɛ zu'oe la yɛllɛ. Bɔzugɔ zaba la ka' ya dinnɛ, amaa Zugsɔb la din. 16 Bɛog yanam on duom keŋ tʋ'ʋsi ba. Ba saa na dʋt Ziz Suor la baba ka ya saa na nyɛɛ ba ka ba bɛ bɔn'ɔfalig linɛ zulim la naar zin'ig linɛ bɛ Jeruel pipirigin la.’ 17 Li ka' yanamɛ na zab zabkaŋaa. Maalim zi'enɛ sʋ'ʋŋa ka gɔs yɔlisim kanɛ ka Zugsɔb la na tisi ya, yanam Juda nɛ Jerusalem dima. Da zɔti dabiem; mɛ da kɛ ka ya ya'am ian'ada. Bɛog yanam on yim tʋ'ʋsi nɛ ba ka Zugsɔb la na bɛ nɛ ya.”
18 Jehosafat da su'un ka o zug kpa' teŋin, ka Juda nɛ Jerusalem nidib la wʋsa igini wɔ'ɔgid Zugsɔb la. 19 Ka Levi dim sieba banɛ yi Kohat nɛ Kora tuŋ ni la da duoe zi'enɛ pian'ad Zugsɔb onɛ an Israel Wina'am la yʋ'ʋr nɛ kʋkɔtita'ar. 20 Bɛkɛung asuba ba da yii keŋ Tekoa pipirigin la. Ban da yit la, Na'ab Jehosafat da zi'en ka yɛl ye, “Kɛlisimi, Juda nɛ Jerusalem nidiba! Niŋimini ya Zugsɔb Wina'am la yadda ka o na guri ya, ka niŋ o nɔdi'esidib la yadda ka ya na nyaŋ.”
21 Jehosafat da nwɛ' nidib la sɔɔra ka gaans dapsieba ye ba yʋʋm tis Zugsɔb la ka wɔ'ɔg o na'am pipilim linɛ pa'annɛ o kasi yɛla la, ka yii gaad tuongatib la tuonnɛ yɛt ye,
“Pʋ'ʋsimi Zugsɔb la bareka;
bɔzugɔ o nɔŋilim la bɛ nɛ saŋa linɛ ka' bɛnnɛ.”
22 Ban da pin'ili yʋ'ʋmmi wɔ'ɔgid la, Zugsɔb la da pin'ili zabid nɛ Ammon nɛ Moab nɛ Seir Zuor dim banɛ kena ye ba zab nɛ Juda la nyaŋi ba. 23 Dap banɛ yi Ammon nɛ Moab la da duoe zab nɛ dap banɛ yi Seir Zuorin na la nyaŋi ba kʋʋ ba wʋsa. Ban yʋ'ʋn da kʋ Seir nidib la naae la ka yʋ'ʋn lɛbi kʋʋd taaba.
24 Juda dap la da kena zi'en zin'ikanɛ ka ba na naami gɔsidi nyɛt pipirig la, ka gɔs soogianam la bɛ zin'isi'a la, ba da nyɛ nɛ nidibi kpii dig teŋin: sɔ'ɔsɔ da pʋ pɔnsɛ. 25 Alazug Jehosafat nɛ o nidib la da keŋ vaae la'abanɛ ka ba kpi ka bas la, ka nyɛ la'asʋma nɛ fuud nɛ la'abanɛ mɔr nyɔɔd, ka li zu'oe gaad nɛ ban na nyaŋi zi. La'ad la da zu'oe nɛ hali ka li nɔki ba daba atan' ka ba nyaan nyaŋi zii naae. 26 Daba anaasi daar la ba da la'as taaba Beraka Bɔn'ɔgin zun'e Zugsɔb la. Linɛ kɛ ka ba buon zin'ikan ye Beraka Bɔn'ɔga hali ti paae zina.
27 Ka Jehosafat gaad Juda nɛ Jerusalem dap la wʋsa tuon ka ba lɛb nɛ sumalisim keŋ Jerusalem tempʋʋgin, bɔzugɔ Zugsɔb la da maal suori tisi ba ka ba mɔr sumalisim ba dataas la yɛla. 28 Ba da paae Jerusalem kpɛn' Zugsɔb Pʋ'ʋsim Yin la pieb wiis nɛ kɔna nɛ na'atana.
29 Ban da wʋm Zugsɔb la zab nɛ Israel dim dataas la si'em la, Wina'am dabiem da kpɛn' na'abanɛ bɛ tembama la ni. 30 Jehosafat sʋ'ʋlim la da mɔr sumbʋgʋsʋm bɔzugɔ Wina'am da tis o vʋ'ʋsʋm zin'ig wʋsa.
Jehosafat na'am la naar
31 Na'ab Jehosafat da anɛ yʋma pistan' nɛ anu ka di Juda na'am. O da sʋ'oe Jerusalem tempʋʋg la nɛ yʋma pisi nɛ anu. O ma yʋ'ʋri da buon Azuba, o da anɛ Silihi pu'ayua. 32 Si'el wʋsa ni o da dɔlisid o saam Asa nɔba ka pʋ bie baa bi'elaa, ka tʋm dinɛ an sʋm Zugsɔb la tuon. 33 Amaa teŋgbana la o da pʋ yisi ba, ka nidib la pʋ nɔki ba sʋnya dɔlli ba yaanam Wina'am la.
34 Ya'a kpɛlim nɛ yɛla banɛ da maal Jehosafat na'am diib saŋa, lin yi li pin'ilʋgʋn ti paae li naarin la, li wʋsa sɔb Hanani biig Jehu yɛlkʋda labaya gbana la ni, linɛ bɛ Israel Na'anam Gbauŋ la ni.
35 Li nya'aŋ la Jehosafat da naal nɔɔr nɛ Ahazaya onɛ an Israel na'ab onɛ da an bugusim sɔb la. 36 On nɛ Ahazaya da naal nɔɔri kpiisid nɛ anrintitada. Ba da kpa' li Eziyon Geber teŋin. 37 Elieza onɛ an Dodavahu biig ka yi Maresa teŋin na la da pian' zɛrig Jehosafat ye, “Fʋn naal nɛ Ahazaya la zug, Zugsɔb la na san'am fʋn maal si'el la wʋsa.” Anrima la da san'am ya, ka ba pʋ lɛn nyaŋidi mɔri kpiisida.