7
1 Ka Elasia yɛli ba ye, “Kɛlisimi Zugsɔb la pian'ʋk! Zugsɔb la yɛl si'eli nwa: ‘Bɛogʋ anwana win la, ba na da' mui kuriba anzurifa la'af yinne ka ki kuriba ayi' mɛ na da' anzurifa la'af yinne Samaria tempʋʋg za'anɔɔrin la.’ ” 2 Na'ayikpɛɛm onɛ da kpi'e Na'ab la da yɛl Zugsɔb tʋmtʋm la ye, “Gɔsima, hali baa Zugsɔb la ya'a yɔ'ɔg saŋgbana wʋʋ za'anɔya nɛ, nɛ' na nyaŋi niŋɛɛ?” Elasia da lɛbis o ye, “Fʋ na nyɛɛ li nɛ fʋ mɛŋ nini amaa fʋ nɔɔr kʋ lɛmmi lii!”Ban bas ludib la yɛla
3 Saŋkaŋa nidiba anaasi daa an kʋkɔma ka bɛ teŋ la za'anɔɔrin. Ba da yɛl taaba ye, “Bɔ ka ti zin' kpɛla hali ti kpiida? 4 Ti ya'a ye ti kpɛn' teŋ la pʋʋgin, kɔ'ɔm bɛɛ ani, ti na kpi. Ti mɛ ya'a lɛn kpɛlim kpɛla ti na kpi. Alazug kɛlli ka ti keŋi Aram dim la san'an lɛɛ zaŋi ti mɛŋi tisi ba. Ba ya'a basi ti, tinam on vʋe; ba ya'a lɛn kʋʋ ti, tinam on kpi.”
5 Zaam da ma'aya ka ba duoe keŋ Aram dim la dig si'el la. Ban daa paae ba dig zin'ig titɔndigin la, nid baa yinne daa kae, 6 bɔzugɔ Zugsɔb la kɛnɛ ka Aram dim la wʋm ka li dammid nwɛnɛ zaba tɛrekonam nɛ widi ɛɛnti ken nɛ soogianam bɛdegʋ ka li dammid si'em la, li daa kɛ ka ba yɛl taaba ye, “Gɔsimi, Israel na'ab la da' Hitti dim na'anam nɛ Egipt Na'ab la ye ba kena zab nɛ ti!” 7 Alazug ba daa duoe sisɔbiri zɔ ka basi ba sʋga nɛ ba widi nɛ bʋmis la. Ba daa basi ba dig zin'ig la wʋʋ lin an si'em la ka zɔɔ faaɛn ba nyɔɔr. 8 Kʋkɔma la daa paae Aram dim la'asʋg zin'igin la kpɛn' sʋga la yinne pʋʋgin. Ba daa di ka nu ka nɔk anzurifa nɛ sanlima nɛ fuudi yi paalʋ su'a ka lɛn lɛbi kpɛn' sʋgʋr yinne ni nɔk la'asieba ani keŋ su'a ya'as.
9 Ka yʋ'ʋn yɛl taaba ye, “Ti pʋ tʋm linɛ nara. Zina anɛ labasʋŋ dabisir ka ti pʋ kɛ ka sɔ' wʋmm. Ti ya'a gu'us ka bɛog nie, tɔɔg na paae ti. Ti kemi na'ayin la tɔ'ɔtɔ yɛli ba.” 10 Dinzug ba daa keŋ banɛ gur teŋ la za'anɔɔr la san'anɛ yɛli ba ye, “Tinam keŋ nɛ Aram dim la gbɛɛnd zin'isi'a la ka nid baa yinne ka' ani; ti pʋm pʋ wʋm sɔ' dammirɛ, widi nɛ bʋmis ma'aa lɔɔ zi'e, ka sʋga la kpɛn an lin an si'em la.” 11 Banɛ gu'ud yaŋir la daa kaas kuŋi mɔɔl labaar la, ka ba zɔɔ keŋ yɛl na'ayin.
12 Na'ab la da duoe yʋ'ʋŋ la yɛl o na'ayikpɛm la ye, “M na yɛli ya Aram dim la gban'e si'em. Ba mi' ye kɔ'ɔm mɔri ti. Dinzug ka ba bas zin'ig la ka su'a teŋ la kpikpɛŋ ka tɛn'ɛsid ye, ti na yina ka ba gban'e ti vʋt ka kpɛn' tempʋʋgin la!” 13 Na'ayikpɛm la yinne da lɛbis ye, “Tɔ! Ka kɛl ka dap sieba nɔk widi anu banɛ kpɛlim teŋin la keŋ gɔs. Bɔzugɔ, ban ya'a kpi, tinam banɛ kpɛlim kpɛla la wʋsa kʋ pɔnsɛ. Alazug kɛl ka ti tʋmi ba ka ba keŋ gɔs linɛ maal.” 14 Dinzug ba daa gaŋ zaba tɛrekonam ayi' nɛ ba widi la ka Na'ab la tʋmi ba ye ba keŋ gɔs linɛ maal Aram dim zabzabidib. O daa tis banɛ tɛɛd widi la nɔɔr ye ba kem gɔs linɛ maal. 15 Ba daa dɔlisi ba bugir hali ti paae Joodan mu'arin la. Ba daa nyɛ ka suor la pɛ'ɛl nɛ fuud nɛ la'abanɛ ka Aram dim la zɔt ka yɛɛsidi lɔbid la. Ka ba lɛbi yɛl Na'ab la. 16 Nidib la daa yii keŋ gilig Aram dim la'asʋg zin'ig la vaae ba la'ad la. Linɛ daa kɛ ka zɔm kuriba da'ad anzurifa la'af yinne ka mui kuriba ayi' mɛ da'ad anzurifa la'af yinne, wʋʋ Zugsɔb la sa yɛl si'em la.
17 Na'ab la daa kɛ ka o na'ayikpɛɛm onɛ zin' kpi'enɛ o la yʋ'ʋn gur teŋ la za'anɔɔr la, ka nidib la la'asi muk za'anɔɔr la nɔɔ o ka o kpi, nwɛnɛ Wina'am tʋmtʋm la pʋn dɛŋi yɛl si'em saŋkanɛ ka Na'ab la sa kɛɛn o san'an na la. 18 Li daa tʋm nwɛnɛ Wina'am tʋmtʋm la yɛl Na'ab la si'em la ye, “Bɛog anwana win, zɔm kuriba na da' anzurifa la'af yinne ka mui kuriba ayi' mɛ na da' anzurifa la'af yinne Samaria teŋ za'anɔɔrin la.” 19 Na'ayikpɛɛm la daa yɛl Wina'am tʋmtʋm la ye, “Gɔsima, hali baa Zugsɔb la ya'a yɔ'ɔg saŋgbana wʋʋ za'anɔya nɛ, nɛ' na nyaŋi niŋɛɛ?” Ka Wina'am tʋmtʋm la lɛbis o ye, “Fʋ na nyɛɛ li nɛ fʋ mɛŋ nini amaa fʋ nɔɔr kʋ lɛmmi lii!” 20 Ka li sid niŋ o ala bɔzugɔ nidib la da nɔɔ o nɛ za'anɔɔrin la ka o kpi.