Lieŋi puk ku'om zug la yɛla
6
1 Daar yinne ka nɔdi'esidib la yɛl Elasia ye, “Gɔsima, tinamɛ la'asid nɛf zin'isi'a la yʋ'ʋn pɔɔdnɛ tisi ti. 2 Kɛl ka ti keŋ Joodan mu'arin ka nid wʋsa nwaae daug yinne-yinne zi na ka kɛ ka ti mɛ' zin'ikanɛ ka ti na bɛ.” Ka o yɛli ba ye, “Kemi!” 3 Ba nid yinne da yɛl o ye, “Ti zugdaana, m bɛlimnɛ, fʋ kʋ dɔlli ti keŋɛ?” Ka Elasia lɛbis ye, “Tɔ, m na keŋ.” 4 Ka dɔlli ba keŋ. Ban da keŋ paae Joodan mu'arin pin'ili nwaad tiisi lugid la, 5 ba nid yinne da nwaad tiig ye o lug la, ka lieŋ la fʋki lu ku'om la pʋʋg. Ka o kaas kuŋ ye, “Waai, m zugdaana, m pa'a sɔs lieŋ la nɛ.” 6 Ka Wina'am tʋmtʋm la bu'os ye, “Yaanɛ ka di li?” Ka o pa'al o din lu zin'isi'a la, ka Elasia kɔ'ɔg daugʋ lɔb ani, ka kɛ ka lieŋ la puk na. 7 Ka o yɛl o ye, “Yaami li!” Ka dau la tiɛn o nu'ugʋ yaae li.Elasia kɛ ka Aram dim lieb zʋnzɔɔs si'em
8 Aram Na'ab la da tʋ'ʋs Israel dim nɛ zaba. O da zin'in nɛ o na'ayikpɛm ka gban'e ye, “M na la'asi m soogianam la gu' ba kpɛ', bɛɛ kpɛ'.”
9 Amaa Wina'am tʋmtʋm la da tʋm yɛl Israel Na'ab la ye, “Baŋim ka da dɔl zin'ikanɛ, bɔzugɔ Aram dim la kennɛ ani baba.” 10 Alazug Israel Na'ab la da yii kpansi gɔs zin'ikanɛ ka Wina'am tʋmtʋm la yɛl o la ka li sid an sida, ka ba gu'usi ba mɛŋ. Saŋa bɛdegʋ Elasia da san'anɛ Na'ab la ka o gu'usidi o mɛŋ nɛ zin'ibama.
11 Nɛ' da kɛ ka Aram Na'ab la sʋnf duoe. Ka o la'as o na'ayikpɛm la wʋsa bu'osi ba ye, “Ya kʋ yɛlim onɛ yit kpɛla ken Israel Na'ab la san'an yɛɛsid laa?”
12 Ka na'ayikpɛm la yinne yɛl o ye, “Ka' tinam na'ayikpɛm laa, amaa Elasia onɛ an nɔdi'esi bɛ Israel la yɛt Israel Na'ab pian'abanɛ ka fʋ pian'adi fʋ dɔgbɛɛndigin la wʋsa.”
13 Ka Na'ab la tis nɔɔr ye, “Kem ieenɛ o zin'ig ka m tʋm nidib ka ba keŋ gban'e o na.” Ka ba keŋ ka lɛb na yɛl o ye, “O bɛ Dotan teŋin.” 14 Ka o tʋm widi nɛ zaba tɛrekonam nɛ ninkpi'ema ani. Ba da keŋ paae yʋ'ʋŋʋ lɔbi gilig teŋ la.
15 Wina'am tʋmtʋm la sankpan'as da yi bɛogʋn asuba na, ka nyɛ ka soogianam lɔbi gilig teŋ la nɛ widi nɛ zaba tɛrekonam. Ka sankpan'as la ye, “Waai, m zugdaana, ti di'ed ya?”
16 Wina'am tʋmtʋm la da lɛbisi yɛl o ye, “Da zɔt dabiem, banɛ bɛ nɛ tinam la gat banɛ bɛ nɛ ba la.”
17 Elasia da sɔs ye, “Zugsɔba, lakimi o nini ka o na nyaŋi nyɛ!” Zugsɔb la da lak sankpan'as la nini ka o gɔsi nyɛ ka kʋkʋna la pɛ'ɛl nɛ widi nɛ zaba tɛrekonam nɛ bugum gilig Elasia.
18 Dataas la da sigi kennɛ o san'an na la, Elasia da sɔs Zugsɔb la ye, “Kɛl ka nimbama wʋsa kilim zʋnzɔɔs!” Ka o kɛ ka ba kilim zʋnzɔɔs nwɛnɛ Elasia sɔs si'em la.
19 Elasia da yɛli ba ye, “Li ka' suor la nwaa. Li mɛ ka' teŋ kanɛ ka ya ken la nwaa. Dɔlli nɛ m nya'aŋ ka m mɔri ya keŋ dau kanɛ ka ya ieed la san'an.” Ka o dɔlli ba keŋ Samaria tempʋʋgin.
20 Ban da kpɛn' teŋ la pʋʋgin naae la ka Elasia yɛl ye, “Zugsɔba, lakim nimbama nini ka ba nyaŋi nyɛt!” Ka Zugsɔb la laki ba nini ka ba gɔsi nyɛnɛ ban bɛ Samaria teŋ la pʋʋgin.
21 Israel Na'ab la da nyɛɛ ba la, o bu'osi Elasia ye, “M kʋʋmi baa? M saama, m kʋʋmi baa?”
22 Ka o lɛbis ye, “Ayei, da kʋʋ baa! Fʋ na kʋ nimbanɛ ka fʋ gban'e ba zaba nii? Tisimi ba diib nɛ ku'om ka ba di ka nu ka lɛbi ba zugdaan la san'an!” 23 Dinzug, o da maal diib sʋ'ʋŋa tisi ba, ka ban di ka nuu naae la o basi ba ye ba kulim, ka ba lɛbi ba zugdaan la san'an. Lin yii anina, Aram nimbanɛ da ken Israel titɔndigin faand la da bas faaung la.
Kɔ'ɔm gban'e Samaria dim banɛ ka ba lud la
24 Lin nya'aŋ la Ben-Hadad onɛ da an Aram Na'ab la da la'as o soogianam la wʋsa ka ba keŋ lɔbi gilig Samaria tempʋʋg. 25 Kɔ'ɔm tita'ar da lu teŋin la; ba da lɔbi gilig teŋ la ka li yuug hali, ka ba ti kuosid bʋŋ zug anzurifa ligidi pisnii, ka kakpɛɛd kʋŋkɔŋ mɛ an anzurifa ligidi anu.
26 Israel Na'ab la da dɔl teŋ la zaŋguom la zugʋ gat, ka pu'a sɔ' kaas kuŋ ye, “M zugdaan onɛ an Na'aba, sʋŋim!”
27 Ka Na'ab la lɛbis ye, “Zugsɔb la ya'a pʋ sʋŋi fɔ, mam na paam sʋŋir yaanɛ sʋŋi fɔ? Mam mɔri ki zieŋin la bɛɛ daam na tisi fɔɔ?” 28 Ka bu'os o ye, “Yɛl la an bɔ?” Ka o lɛbis ye, “Pu'a kaŋa yɛl mam ye, ‘Mɔri fʋ biig la na ka ti ɔnb zina, ka bɛog ka ti mɛ ɔnb on biig la.’ 29 Ka ti sa dʋg mam biig la ɔnb, ka bɛog nie ka mam yɛl o ye, ‘Mɔri fʋ biig la na ka ti ɔnb!’ Amaa ka o zaŋ o su'a.”
30 Na'ab la da wʋm pu'a la pian'ad la, o sʋnf da san'am nɛ hali ka o aans o fuud. Ka on da dɔlisid zaŋguom la zug la, nidib la da nyɛ on yɛ bɔtkɛɛnd, sʋnsa'aŋ zug. 31 O da ye, “M pɔya mɛnɛ, man na fi'ig Elasia onɛ an Safat biig la zug zina ka Zugsɔb la ya'a na maalim si'em on maal!”
32 Saŋkan la Elasia da zin'inɛ o yin, ka kpɛɛmnam la la'am zin' nɛ o. Na'ab la da tʋm biig ka o gaad tuon, ka on nam bɛ suor la, Elasia da yɛl kpɛɛmnam la ye, “Ya pʋ nyɛ ninkʋʋd la tʋm sɔ' si'em ye o kena fi'ig man zugɔɔ? Gɔsimi, onɛ ka o tʋm la ya'a paae na yanam on yɔɔm o lɛbis ka din kʋlʋŋ la mɔri kiŋ-kiŋ. Ka' o zugdaan la nɔbkida dɔl o nya'aŋ laa?”
33 On daa nam pian'adi tisidi ba la, ka onɛ ka ba tʋm la paae na. Ka Na'ab la yɛl ye, “Yɛl kaŋa yinɛ Zugsɔb la san'an na. Bɔ ka m na lɛn gur Zugsɔb la ya'asɛ?”