Naaman n paam laafi la yɛla
5
1 Saŋkaŋa Naaman da anɛ Aram Na'ab la soogianam kpɛɛm. O da anɛ nintita'ar ka ba tisid o na'asi hali, bɔzugɔ Zugsɔb la da dɔlis o ni ka Aram dim paam nyaŋir. O da anɛ soogia kanɛ sʋnfʋ kpi'em, amaa ka an kʋkɔm. 2 Saŋkaŋa nidib da yi Aram keŋ Israel teŋin zabi gban'e nidib na, ka yinne an bipuŋ ka tʋmmi tisid Naaman pu'a. 3 O da yɛl o zak sɔb la ye, “M zugdaan la ya'a naan siaki keŋ nyɛɛn nɔdi'es la bɛ Samaria la! O naan ti'ebi nɛ o kʋkɔm ban'as la.” 4 Naaman da keŋ o zugdaan Na'ab la san'an yɛl o bipuŋ kanɛ yi Israel na la yɛl si'em. 5 Aram Na'ab la da lɛbis ye, “Li ya'a an si'em wʋsa fʋn kem!” M na sɔb gbauŋʋ tis Israel Na'ab la. Dinzug Naaman da duoe nɔk anzurifa ligidi bɛdegʋ, nɛ sanlima ligidi, pɛ'ɛs nɛ fusʋma piiga. 6 Gbauŋ kanɛ ka o da di'e wa'ae ye o tis Na'ab la da sɔb si'em nwa: “Gbauŋ nwa ya'a paaf na, fʋn baŋim ye manɛ tʋm Naaman onɛ aan m tʋmtʋm la fʋ san'an ye fʋ ti'eb o kʋkɔm ban'as la.” 7 Israel Na'ab la da karim gbauŋ la naae la, o sʋʋnr da duoe nɛ ka o aans o fuud ka bu'os ye, “Mam anɛ Wina'am na nyaŋi kʋ, ka lɛn tis vʋmm? Oŋa daana niŋ wala tʋm sɔ' man san'an na ye m ti'eb o kʋkɔm ban'asɛ? Gɔsim on bɔɔdi niŋ si'em nyɛɛm taal!” 8 Elasia onɛ an Wina'am tʋmtʋm la da wʋm ye Israel Na'ab aans o fuud la, o da tʋm ye ba keŋ yɛl o labakaŋa: “Bɔ ka fʋ aansi fʋ fuudɛ? Kɛl ka dau la kɛɛn m san'an na ka o na baŋ ye nɔdi'es sid bɛ Israel teŋin!” 9 Naaman da keŋ nɛ o widi nɛ tɛrekonam la paae zi'en Elasia samannin. 10 Elasia da tʋm o tʋmtʋm ye o yim yɛl o ye, “Kem mi'isi fʋ mɛŋ nɔɔr ayɔpɔi Joodan mu'arin la, ka fʋ niŋgbiŋ la na lɛn lɛbi li zin'igin ka fʋ an nyain.” 11 Amaa Naaman sʋnf da duoya ka o fɛndigi lɛbid ka ye, “Man tɛn'ɛs ye o na yii m san'an na ka zi'en ka buol o Zugsɔb onɛ aan o Wina'am la yʋ'ʋr, ka ʋk o nu'ugi nyɔɔsim ban'a la bɛ zin'isi'a la ka ti'ebi m ban'a la. 12 Abana nɛ Faapa kɔldaad linɛ bɛ Damaskus teŋin la ka' sʋ'ʋm gat Israel teŋin kɔldaad wʋsa? Mam kʋ tun'e sʋʋn anina ka lieb nyainnɛɛ?” Alazug o da fɛndigi lɛbid nɛ ɛndʋg. 13 Amaa Naaman yammis da keŋ o san'an yɛl o ye, “Ti Saamma, nɔdi'es la ya'a yɛlin ye fʋ niŋ linɛ tɔi gaad ala, fʋ naan kʋ niŋinɛ? Ka o ya'a yɛlif ye fʋ sʋʋm ka kilim nyainnɛ, li tɔɔg an bɔ?” 14 Ka o sigi mi' Joodan ku'omin la nɔɔr ayɔpɔi, nwɛnɛ Wina'am tʋmtʋm la yɛl o si'em la, ka o niŋgbiŋ la lɛbi li zin'igin ka o an nyain nwɛnɛ bilia nɛ. 15 Ka Naaman nɛ o nidib la wʋsa lɛn lɛb Wina'am tʋmtʋm la san'an. O da zi'eni o tuon ka yɛl ye, “M zugdaana, nannanna mam baŋ ye Wina'am ka' dunia wʋsaa asɛɛ Israel teŋin ma'aa. M bɛlimnɛ, di'em piinkanɛ ka m mɔr na la.” 16 Ka nɔdi'es la lɛbis ye, “Nɛ Zugsɔb kanɛ vʋe ka m dɔl o la zugɔ, m kʋ di'e si'ela!” Ka Naaman la'am bɛlim o hali, ka o zan'as. 17 Naaman da yɛl o ye, “M bɛlimnɛ fʋ ya'a kʋ di'e, fʋn kɛl ka ba vaae titan bɛdegʋ ka bʋmis ayi' zii mɔri kul,a ka m kʋ lɛm maal maan buudi wʋsa tis teŋgban si'aa asɛɛ Zugsɔb la ma'aa. 18 Amaa Zugsɔb la kɛlli m taali bas bʋn yinne zug: M ya'a dɔlli m zugdaan la ka o kpɛn' Rimmon teŋgban malʋŋ zin'igin igin o tuon, ka mam mɛ igin, Zugsɔb la on kɛlli m taali bas nɛ' yɛla.” 19 Ka Elasia lɛbisi yɛl o ye, “Kem nɛ sumbʋgʋsʋm.” Naaman n daa keŋ lalig bi'ela la, 20 Gehazi, onɛ an Wina'am tʋmtʋm la sankpan'as la, daa tɛn'ɛs o pʋtɛn'ɛrin ye o zugdaan la bas Naaman onɛ an Aram nid la nɛ zaalim, ka pʋ di'e si'el la'abanɛ ka o mɔr na la nii. Ka ye, “Nɛ Zugsɔb onɛ vʋe la yʋ'ʋr zug, man na zɔɔ bɛɛn o di'e si'el o san'an!” 21 Alazug Gehazi da zɔ tɔ'ɔtɔ bɛn' Naaman. Naaman n da nyɛ ka o zɔti kennɛ o san'an na la, o da sigi o widi tɛreko la zugʋ tʋ'ʋs o. Ka bu'os o ye, “Li malisaa?” 22 Ka Gehazi lɛbis ye, “Li malis. M zugdaan la tʋmim ye m kena yɛlif ye, dasamma ayi' naam nɔdi'esidib la la'asʋg zin'igin Efiram linɛ an kʋkʋna teŋin la kɛɛn o san'an na, ka o bɛllim ye fʋ tis o anzurifa ligidi buorig yinne nɛ fuud zin'isa ayi' ka o tisi ba.” 23 Ka Naaman lɛbis ye, “Li ya'a an si'em wʋsa, nɔkim buoris ayi'!” O da bɛlim Gehazi hali ye o di'em, ka lɔ anzurifa la nɛ bɔto ayi', nɛ fuud la zin'isa ayi' ka nɔki tis o yammis ayi' ka ba zii gaad Gehazi tuon. 24 Gehazi daa keŋ paae Elasia yin kʋkʋn zug la, o daa di'e la'ad la yammis la san'an su'a yin ani, ka yɛli ba ye ba lɛm, ka ba sid lɛb. 25 O daa kpɛn' zi'eni o zugdaan Elasia tuon, ka Elasia bu'os o ye, “Gehazi, fʋn keŋ yaanɛ?” Ka Gehazi lɛbis ye, “M zugdaana, m pʋ keŋ si'ela.” 26 Amaa Elasia yɛl o ye, “Man pʋ bɛɛn nɛ fʋ san'an siig pʋʋgin saŋkanɛ ka dau la naanɛ o widi tɛreko la zugʋ sigi tʋ'ʋsif laa? Saŋkaŋa nar ye fʋ di'e ligidi bɛɛ fuud bɛɛ olif tiis bɛɛ vain tiis pɔɔd bɛɛ kɔnbid bɛɛ niigi bɛɛ yampu'ab nɛ yamdapaa? Ayei, li pʋ nara! 27 Alazug Naaman ban'as la na lɔ'ɔŋif nɛ fʋ yaas la wʋsa saŋa linɛ ka' bɛnnɛ.” Ka Gehazi yi Elasia san'an lieb kʋkɔmi yuod bɔr-bɔr.