Pʋkɔɔnr kpaam la yɛla
4
1 Nɔdi'esidib la yinne pu'a da keŋ kaasi tis Elasia ye, “Fʋ sankpan'as onɛ aan m sid la kpinɛ, ka fʋ mɛ mi' ye o daa anɛ onɛ tisid Zugsɔb la girima. Amaa nannanna la o sam daan kena ye o faaɛn o biribis ayi' la mɔri keŋ kɛ ka ba lɛbig o yammis.” 2 Ka Elasia bu'os o ye, “M ye m sʋ'ʋŋif wala? Yɛlimim, fʋ mɔr bɔɔ fʋ yinnɛ?” Ka o lɛbis ye, “M zugdaana, m pʋ mɔr si'el si'ela asɛɛ kpaam fiin bɛ.” 3 Ka Elasia lɛbisi yɛl o ye, “Kemi fʋ kpi'es la yaanɛ sɔs dʋkzaala bɛdegʋ. 4 Fʋ ya'a di'esi naae, fʋn kpɛn'ɛm dɔɔgin nɛ fʋ biis la ka yɔ kʋlʋŋ la lɛbis. Bu'osim kpaam la niŋ dʋgid la pʋʋgin, linɛ pɛ'ɛl fʋn on vuugi labil.” 5 O da bas o ka kuli sid kpɛn' dɔɔgin on nɛ o biis la ka yɔ, ka ba ʋgʋs dʋgid la tis o ka o bu'osidi niŋid. 6 Dʋgid la wʋsaa da pɛ'ɛl la, o da yɛl o biis la ye, “Mɔri sieba na ya'as.” Amaa ba da lɛbisi o ye, “Dʋkzaal lɛn kae.” Ka kpaam la gu'oe. 7 O da keŋ yɛl Wina'am nid la, ka o yɛl o ye, “Kem kuos kpaam la yɔ sam la. Ka linɛ kpɛlim la fʋn nɛ fʋ biis la nɔkim sʋŋi ya mɛŋ.”Seunim nid biigi vʋ'ʋg la yɛla
8 Daar ayinne ka Elasia keŋ Seunim teŋin ka pu'a bɛɛ ani an bʋndaan, ka sɔs Elasia ye o gu'us ka o maal diibi tis o. Dinzug saŋa kanɛ wʋsa ka Elasia lɛb ani baba na, o kennɛ anii dit. 9 Pu'a la da yɛl o sid ye, “Mam mi' ye dau kanɛ ken kpɛla la anɛ Wina'am nid, ka an pʋpiel. 10 Kɛl ka ti mɛ' dɔbili ti dɔɔg la zug ka niŋ gadʋg nɛ teebul nɛ kʋk nɛ fitir ani tis o. Ka o ya'a ti kaae kpɛla na, on gbɛn.” 11 Daar yinne, Elasia da kena dʋʋ kpɛn' o dɔɔgin la dig ani. 12 Ka yɛl o tʋmtʋm Gehazi ye, “Buolim pu'a kanɛ an Seunim teŋ nwa nid la na!” Ka o buol o, ka o kena zi'enɛ o tuon. 13 Ka Elasia yɛl Gehazi ye, “Yɛlim pu'a la ye, ‘Fʋ mugusidi fʋ mɛŋ anwa wʋsa nɛ tinam yɛla. Nannanna fʋ bɔɔd ye ti maal bɔɔ tisi fɔ? Fʋ bɔɔd ye ti yɛl Na'ab la, bɛɛ soogianam kpɛɛm la fʋ yɛlaa?’ ” Ka o lɛbis o ye, “M bɛ nɛ m mɛŋ nidibin.” 14 Ka Elasia bu'os ye, “Bɔ ka ti na nyaŋi maali tis o?” Ka Gehazi lɛbis ye, “O ka' biribiŋa ka o sid mɛ kʋdig.” 15 Ka Elasia yɛl ye, “Buolim o na!” Ka o buol o na. Ka o kena zi'en dɔɔg la za'anɔɔrin. 16 Ka Elasia yɛl o ye, “Yʋʋm anwa win la, fʋ na zanl biribiŋi fʋ nu'ugin.” Ka pu'a la pʋ niŋ yadda ka ye, “Ayei, m zugdaana, fʋ anɛ Wina'am tʋmtʋm! Da ma'aa ma!” 17 Amaa pu'a la sid da gban'e pʋʋgʋ du'a biribiŋ saŋa kanɛ ka Elasia da yɛl o la nɔɔ. 18 Biig la da nɔbig ya, ka daar yinne ka o saam bɛ pɔɔgin nɛ bunnib ka o keŋ o san'an. 19 Ka biig la yɛl o saam ye, “M zug! M zug!” Ka o saam la yɛl sankpan'as yinne ye, “Mɔr o keŋ o ma san'an!” 20 Sankpan'as la ʋk biig la mɔr o keŋ tis o ma la, ka biig la zin'inɛ o nɔba zug hali ka nintaŋ ti bul, ka o kpɛn kpi. 21 O da mɔr biig la kpɛn' digil Wina'am tʋmtʋm la gadʋg zug, ka yi ka lɛbisi yɔ'. 22 Ka buol o sidi yɛl o ye, “M bɛlimnɛ, tisim yammis la yinne nɛ bʋŋ ka m keŋ Wina'am tʋmtʋm la san'an ka lɛb tɔ'ɔtɔ na.” 23 Ka o bu'os o ye, “Bɔ ka fʋ kennɛ o san'an zina? Li ka' nwadpaalig bɛɛ Vʋ'ʋsʋm Daarɛ.”a Ka o lɛbis ye, “Li ka' si'ela.” 24 O da ban' bʋŋ la ka yɛl yammʋg la ye, “Gaadim tuon, da sie kennɛ, ya'a ka' man na yɛl ye fʋ siema.” 25 Alazug o da yii keŋ Wina'am tʋmtʋm la san'an Kaamel zuorin la. On da nyɛ ban bɛ lalli la, ka Wina'am nid la yɛl o yammʋg Gehazi ye, “Gɔsima, li anɛ Seunim pu'a la, la! 26 Yim tʋ'ʋs o, ka bu'os o ye, ‘Li malisaa? Fʋ sid an sʋm? Fʋ biig an sʋm?’ ” Ka o lɛbis ye, “Yɛlsi'a kae” 27 On da paae Wina'am tʋmtʋm la san'an zuor la zug la, o da gban'e o nɔba. Ka Gehazi kena ye o tɛbig o yis, amaa Wina'am tʋmtʋm la da yɛl o ye, “Basim o! O mɔri sʋnsa'aŋ bɛdegʋ, amaa Zugsɔb la su'a li nɛ ka pʋ nie tisi ma, ka mɛ pʋ yɛl dinɛ kɛɛ.” 28 O da bu'os o ye, “M zugdaana, m daa yɛlif ye m bɔɔd biigaa? M daa pʋ yɛlif ye fʋ da kɛ ka biig ya'amlɛog mɔrim zaalim-zaalim?” 29 Elasia da yɛl Gehazi ye, “Maalimi fʋ fuug la lɔ nɛ sɛnbidiŋ ka zaŋi m dansaar la zɔ. Fʋ ya'a tʋ'ʋs sɔ' fʋn da pʋ'ʋs oo, ka sɔ' mɛ ya'a pʋ'ʋsif fʋn da siakɛ. Nɔkimi m dansaar la pa'al biig la nindaan.” 30 Amaa biig la ma daa ye, “Asida ka m yɛtif, nɛ Zugsɔb onɛ vʋe la yʋ'ʋr zug, mam kʋ basif ka keŋɛ!” Dinzug, o daa gʋ'ʋŋi duoe dɔl o. 31 Gehazi da gaad tuonnɛ nɔk dansaar la pa'al biig la nindaan, amaa biig la da pʋ damm. Dinzug, Gehazi da lɛbi tʋ'ʋs Elasia ka yɛl o ye, “Biig la pʋ vʋ'ʋgɛ.” 32 Elasia da paae yin la, o nyɛ ka biig la kpinɛ dig o dɔɔgin. 33 Ka o da kpɛn' dɔɔgin la ka yɔɔ lɛbis, ka babayi' la ma'aa bɛ pʋʋgin, ka o sɔs Zugsɔb la. 34 Ka duoe dʋ gadʋg la zugʋ digin biig la zug, ka o nɔɔr kpa' o nɔɔr, ka o nini kpa' o nini, ka o nu'us kpa' o nu'us. O da tiɛn o mɛŋ biig la zug ka biig la niŋgbiŋ pin'ili tʋligid. 35 Elasia da duoe giilim-giilim dɔɔgin la ka lɛbi dʋ gadʋg la zugʋ lɛn tiɛn o mɛŋ biig la zug ya'as. Biig la da tɛnsim nɔɔr ayɔpɔi ka laki o nini. 36 Ka Elasia buol Gehazi ka yɛl o ye, “Buolim Seunim pu'a la na!” Ka o buol o na. On da kena la ka Elasia yɛl o ye, “Di'emi fʋ biig!” 37 O da kpɛn' na igini o nɔba ni ka su'uni o nindaa teŋin. Ka zaŋ o biig la yi.
Yabidi bɛ dʋkin la yɛla
38 Elasia da lɛb Gilgal, ka kɔ'ɔm lu teŋ kan la. Nɔdi'esidib la da la'as na ye ba nyɛɛ o la, o yɛl o sankpan'as la ye, “Nɔkim dʋgtita'ari dʋg zɛɛndi tisi ba!” 39 Ba nid yinne da yii keŋ pɔɔdin la bɔ zɛnma'asa, ka nyɛ sian'arin zɛnvaand ka pɔn' li wala la, la'asi li bɔbig o fuugin. On lɛb na la ka sɛ sieba niŋ dʋkʋn la la'am nɛ sɔ' daa zi' lin an si'el la. 40 Ba daa kpa'ae zɛɛnd la tis nidib la ye ba di, amaa ban daa pin'ili dit la ba daa kaas kuŋ ye, “Wina'am tʋmtʋmma, yabid bɛ dʋkʋn la!” Ba daa pʋ nyaŋi dii lii. 41 Ka Elasia yɛl ye, “Bɔɔmi zɔm na.” Ka o niŋi li dʋk la pʋʋg ka ye, “Bɛsigimi li tis nidib la ka ba di.” Ka ba di'e li di ka yabid la lɛn kae ya'asa.
Nidib kɔbiga di ka li kpɛlim la yɛla
42 Dau sɔ' daa yi Baal-Sealisa teŋin na mɔr bodobodo kanɛ ka ba nɔk zʋʋd dinɛ an bʋndɛɛŋ la nɛɛm maali mɔr na tis Wina'am tʋmtʋm la, la'am nɛ kasana, ka Elasia yɛli ba ye ba nɔkim tis nidib la ka ba di. 43 Ka o sankpan'as la bu'os ye, “M ye m niŋ wala nɔk nɛ' zi'el nidib kɔbiga tuonnɛ?” Ka Elasia lɛbis o ye, “Nɔkim tisi ba ka ba di, bɔzugɔ Zugsɔb la yɛl ye, ‘Ba na di hali ka li kpɛlim.’ ” 44 Ka o sid nɔki li zi'eli ba tuon ka ba di, ka li kpɛlim nwɛnɛ Zugsɔb la yɛl si'em la.