Joram n di Israel na'am la yɛla
3
1 Jehosafat n da di Juda na'am yʋma pii nɛ anii la nya'aŋ la, Ahab biig Joram da di Israel na'am n bɛ Samaria tempʋʋgin. Joram da anɛ Israel na'ab yʋʋm pii nɛ ayi'. 2 O da tʋm tʋʋmbɛ'ɛd Zugsɔb la nini ni ka lɛɛ pʋ paae o saam nɛ o ma da tʋm si'em la. O da vuoɛn kugir kanɛ da an Baal teŋgban ka o saam da maal la bas. 3 La'am nɛ wala, o mɛ da tʋm tʋʋmbɛ'ɛd wʋʋ Jeroboam onɛ an Nebat biig la da tʋm si'em ka pan'as Israel dim ka ba mɛ tʋmi li la. O da pʋ basi li.Moab nɛ Israel dim zaba la yɛla
4 Saŋkaŋa Mesea onɛ an Moab Na'ab la da gʋ'ʋl pɛ'ɛs, ka li an ye o tisid Israel Na'ab la pɛbibis tusa kɔbiga nɛ pɛraad tusa kɔbiga kɔnbid yʋʋm wʋsa. 5 Amaa Ahab n da kpi la, Moab Na'ab la da ki'is Israel Na'ab la nɔɔr. 6 Saŋkan la Na'ab Joram da yi Samaria tempʋʋgin keŋ la'as Israel dim wʋsa. 7 O mɛ da tɔlim labakaŋa yɛl Jehosafat onɛ an Juda Na'ab la ye, “Moab Na'ab la ki'isi m nɔɔr. Fʋ na sʋŋim ka ti keŋ zab nɛ Moab dimaa?” Ka o lɛbis ye, “Man nɛ fʋ na keŋ. Mam nɛ fʋn anɛ yinne, man nidib la anɛ fʋ nidib, ka m widi la mɛ aan fʋ widi.” 8 Ka o bu'os ye, “Suokanɛ ka ti na dɔlli keŋ zab nɛ ba?” Ka o lɛbis o ye, “Ti ye ti dɔlnɛ yi Edom sian'arin la.” 9 Dinzug Israel Na'ab la da yi ya, nɛ Juda Na'ab la nɛ Edom Na'ab. Ban gilig daba ayɔpɔi naae la, soogianam la daa lɛn ka' ku'om na nuu ba mɛŋ, bɛɛ ba bʋnkɔnbid banɛ bɛ nɛ ba la. 10 Ka Israel Na'ab la kaas kuŋ ye, “Mbaye! Zugsɔb la la'as tinam na'anama atan' nwa nɛ kpɛla na ye o zaŋi ti niŋ Moab Na'ab la nu'uginɛɛ?” 11 Amaa Jehosafat da bu'os ye, “Zugsɔb nɔdi'es ka' kpɛla ka ti bu'os Zugsɔb la yii o san'anɛɛ?” Israel Na'ab la kpɛɛm yinne da lɛbis ye, “Elasia onɛ an Safat biig ka daa sʋŋid Elaja la bɛ kpɛla.” 12 Ka Jehosafat yɛl ye, “Zugsɔb la yɛlʋg sid bɛɛ o ni.” Alazug Israel Na'ab, nɛ Jehosafat nɛ Edom Na'ab la da keŋ o san'an. 13 Elasia da yɛl Israel Na'ab la ye, “Bɔɔ bɛ man nɛ fʋn san'anɛ? Kemi fʋ saam nɛ fʋ ma nɔdi'esidib la san'an!” Ka Israel Na'ab la lɛbis ye, “Ayei! Li anɛ Zugsɔb la buol tinam na'anama atan' la'as ye o nɔki ti niŋ Moab Na'ab nu'usin.” 14 Elasia da yɛl ye, “Asida ka m yɛtif nɛ Zugsɔb onɛ ka m dɔl la yʋ'ʋr ye, li ya'a ka' man tisid Juda Na'ab la na'asi zugɔ m kʋ gi'e gɔsini ya baa bi'elaa. 15 Amaa nannanna mɔri onɛ an kɔnnwɛ'ɛd na!” Ka ba mɔr o na, ka kɔnnwɛ'ɛd la nam bɛ nwɛ'ɛbin la, ka Zugsɔb paŋ sig Elasia zugin na 16 ka o yɛl ye, “Zugsɔb la yɛl si'eli nwa: ‘Tuumi bʋmbu'ad bɔn'ɔfaligin la wʋsa!’ 17 Ka Zugsɔb la lɛn yɛl si'eli nwa ye: ‘Ya kʋ nyɛ sisi'em bɛɛ saa, amaa bɔn'ɔg la na pɛ'ɛl nɛ ku'om, ka yanam nɛ ya niigi nɛ bʋnkɔnbid banɛ kpɛlim la na nu.’ 18 Nɛ' anɛ na'ana Zugsɔb la nini ni. O mɛ na lɛn kɛ ka ya nyaŋ Moab dim. 19 Ya mɛ na nyaŋi ba tɛɛns banɛ kpi'em nɛ ba tembɛda la wʋsa. Ya na nwa tisʋma la wʋsa, ka gu'oe ku'om bʋn zin'isi'a la wʋsa ka nɔk kugaa san'ami ba pɔsʋma la wʋsa.” 20 Li yimbɛog asuba ti paad saŋa kanɛ ka ba ye ba maal malʋŋ la, ba nyɛ ka ku'om kpɛn pʋbidi yit Edom baba kenna, ka teŋ la wʋsa pɛ'ɛl nɛ ku'om. 21 Moab dim la wʋsa da la'as teŋ la titɔndigin bɔzugɔ ba da wʋm ye na'anam la kenna ye ba zab nɛ ba, ka ba buol dau wʋsa, bʋnkʋdʋg bɛɛ dasaŋ, onɛ na nyaŋi zanl zaba la'ad la, ye ba yina zab. 22 Ban daa duoe bɛogʋn asuba la, ka winnig tu'al ku'om la, Moab dim la da bɛ zin'isi'a la ba da nyɛti li ka li nwɛnɛ ziim nɛ. 23 Ka ba ye, “Lina anɛ ziim. Na'anam la tulignɛ zabi kʋ taaba. Moab dima, ti kem faaɛn ba la'ad la!” 24 Amaa Moab dim la da keŋ Israel dim la'asʋg zin'igin la, Israel dim la da duoe zab nɛ ba hali ka ba ti gʋ'ʋŋi zɔ ka Israel dim la faaɛn teŋ la ka kʋ Moab dim la. 25 Ba da san'am tempʋʋd la, ka dau wʋsa pi'ig kugiri lɔb pɔɔd banɛ an sʋm la wʋsa ka li ti ligil nɛ kuga. Ba da vi' ku'om dinɛ pʋbid la wʋsa, ka nwa tisʋma la wʋsa; Kir-Haresef teŋ ma'aa kuga da kpɛlim digi li zin'igin, amaa dap banɛ da mɔr luobis la da giligi zab nɛ ba. 26 Moab Na'ab la da baŋ ye zaba la na nyaŋ o la, o da nɔk dap kɔbisyɔpɔi banɛ zabid nɛ sʋ'ʋs ka ba kɔɔ kpɛn' Edom Na'ab la bɛ si'el la ye ba gaadi yi, amaa ba da pʋ nyaŋɛ. 27 Ka o yʋ'ʋn da nɔk o bikpɛŋ onɛ na ti di'e o na'am la maal maan teŋ la zaŋguom la zug. Lina da kɛya ka ba sʋʋnr duoe nɛ Israel dim la hali ka ba fɛndigi lɛbi ba mɛŋ teŋin.