Elaja n keŋ arezana si'em
2
1 Zugsɔb la da bɔɔd ye o nɔk Elaja keŋ arezana nɛ sisi'epiliŋ la, Elaja nɛ Elasia da yinɛ Gilgal teŋin ken. 2 Ka Elaja yɛl Elasia ye, “Kpɛlim kpɛla; Zugsɔb la tʋmim ye m keŋ Betel teŋin.” Amaa Elasia da lɛbis o ye, “Asida ka m yɛtif, nɛ Zugsɔb kanɛ vʋe la yʋ'ʋrɛ, m kʋ basi fʋ dɔllimm!” Alazug ba wʋsa da keŋ paae Betel teŋin. 3 Nɔdi'esidib banɛ da la'asi bɛ Betel la da yii kɛn Elasia san'an na bu'os o ye, “Fʋ mi' ye Zugsɔb la na nɔki fʋ zugdaan la zina yii fʋ san'an ka basi fɔɔ?” Ka Elasia lɛbis ye, “Ɛɛn m mi', amaa da pian'adi nɛ li yɛlaa!” 4 Ka Elaja yɛl Elasia ye, “M biig Elasia, kpɛlim kpɛla: ka Zugsɔb la tʋmim ye m tɔlisi keŋ Jeriko teŋin.” Ka o lɛbis ye, “Asida ka m yɛtif, nɛ Zugsɔb kanɛ vʋe la yʋ'ʋrɛ, mam kʋ basi fʋ dɔllimm!” Alazug ba da tɔlisi keŋ paae Jeriko teŋin. 5 Nɔdi'esidib banɛ da la'asi bɛ Jeriko la da keŋ Elasia san'an bu'os o ye, “Fʋ mi' ye Zugsɔb la na nɔki fʋ zugdaan la yii fʋ san'an zina ka basi fɔɔ?” Ka o lɛbisi ba ye, “Ɛɛn m mi', amaa da pian'adi nɛ li yɛlaa!” 6 Ka Elaja yɛl o ye, “Kpɛlim kpɛla; ka Zugsɔb la tʋmim ye m keŋ Joodan mu'arin.” Ka o lɛbis o ye, “Asida ka m yɛtif, nɛ Zugsɔb kanɛ vʋe la yʋ'ʋrɛ, mam pʋ ye m basi fʋ dɔllimm!” Alazug babayi' la daa dɔl taaba keŋ. 7 Nɔdi'esidib la ban pisnu, da la'as taaba keŋ zi'e lallisa, gɔsid zin'ikanɛ ka Elaja nɛ Elasia zi'e Joodan mu'ar nɔɔrin la. 8 Elaja da yɛɛg o fuugʋ kpilim ka ʋki nwɛ' ku'om la. Ka ku'om la da duoe zi'enɛ nwɛnɛ zaŋguom nɛ lɛbis datiuŋ nɛ dagɔbʋg wʋsa. Ka babayi' la nɔ teŋ kpi'emisi lɔ'ɔŋ. 9 Ban daa lɔ'ɔŋi naae la ka Elaja bu'os Elasia ye, “Yɛlimim, bɔ ka fʋ bɔɔd ye m maali tisif ka ba nyaan nɔkimi fʋ san'anɛ?” Ka Elasia lɛbis ye, “Kɛl ka m paami fʋ paŋ la buudi zin'isa ayi'.” 10 Elaja da lɛbisi yɛl o ye, “Fʋ sɔs nɛ linɛ yɛla tɔi;” la'am nɛ wala fʋ ya'a ti nyɛ ka ba nɔkimi yii fʋ san'an, li na aan fʋ din; ya'a ka' ala, fʋ kʋ nyɛɛ. 11 Ban daa dɔl taaba ken ka sɔnsid la, tɔ'ɔtɔ ka widi tɛreko nɛ widi yina nwɛnɛ bugum nɛ kpɛn' ba teŋsʋkʋ baki ba, ka nɔk Elaja nwɛnɛ sisi'epiliŋ nɛ dʋ arezana. 12 Elasia da nyɛ nɛ' la ka nwɛ' kuŋ ye, “M Saamma, m Saamma, widi tɛrekonam nɛ Israel wiedban'adiba!” Ka o da pʋ lɛn nyɛɛ o ya'asa. Elasia da gban'e o mɛŋ fuugʋ pʋdig ayi' sʋnsa'aŋ zug, 13 ka pi'ig fukanɛ naam Elaja san'an lu la lɛbi keŋ zi'en Joodan mu'ar la nɔɔrin, 14 ka zaŋ Elaja fuug la nwɛ' ku'om la ka bu'os ye, “Zugsɔb onɛ an Elaja Wina'am la bɛ yaanɛ?” On da ʋk fuug la nwɛ' ku'om la, ku'om la da buak ayi' lɛb dagɔbʋg nɛ datiuŋ ka o nyaŋi lɔ'ɔŋ. 15 Nɔdi'esidib banɛ yi Jeriko na zi'e gɔsid la da yɛl ye, Elaja siig la yʋ'ʋn bɛ nɛ Elasia zug. Ka ba keŋ tʋ'ʋs o ka igini o tuonnɛ na'as o, 16 ka yɛl ye, “Ti zugdaana, gɔsima! Ti mɔr dap kpi'ema pisnu. Kɛl ka ba keŋ iee fʋ zugdaan la ka daasi'erɛɛ Zugsɔb Siig la nɔk o nɛ keŋ zuol zuor zug bɛɛ sia'al o bɔn'ɔfaligin.” Ka o yɛli ba ye, “Ayei, da tʋmini ba.” 17 Amaa ba da dɔl o li yɛla, hali ka nyan ti gban'e o ka o gʋ'ʋŋ zan'asʋg. Alazug o da yɛl ye, “Tɔ, ka tʋmmini ba!” Ka ba tʋm nidib pisnu la, ka ba iee o zin'ig daba atan' ka pʋ nyɛɛ o. 18 Ban da lɛb Elasia san'an Jeriko teŋin na la, o da yɛli ba ye, “M daa pʋn pʋ yɛli ya ye ya da keŋɛ?”Elasia kɛ ka ku'om lɛbig sʋ'ʋm la yɛla
19 Teŋ la dap da yɛl Elasia ye, “Ti zugdaana, gɔsima! Teŋ kaŋa bɛ nɛ zin'isʋŋin nwɛnɛ fʋn pʋn nyɛɛ li si'em la, amaa ku'om la ka' sʋ'ʋm, ka teŋgbauŋ la mɛ pʋ du'ad zʋʋdɛ.” 20 Ka o yɛl ye, “Mɔri lapaalig na, ka niŋi yaarim li pʋʋgin!” Ka ba sid mɔr na tis o. 21 Ka o yii mɔri li keŋ ku'om la bʋn zin'isi'a la nɔk yaarim la lɔsi li pʋʋgin, ka yɛl ye, “Zugsɔb la yɛl si'eli nwa: ‘M tiak ku'okaŋa ka li lieb sʋ'ʋm. Li kʋ lɛn zi kum na bɛɛ kɛ ka teŋ la zʋʋd kʋ du'aa.’ ” 22 Ka ku'om la sid lieb sʋ'ʋŋa ti paae zina, nwɛnɛ Elasia da pian' si'em la.
Bibanɛ la' Elasia la yɛla
23 Elasia da yii ani keŋ Betel teŋin, ka on daa dɔl suori ken la, bisieba daa naam tempʋʋgin la yina la'ad o ka yɛl o ye, “Zupieŋaa kem sa! Zupieŋaa kem sa!” 24 Ka o fɛndigi gɔsi ba ka pɔ nɔɔri niŋi ba nɛ Zugsɔb la yʋ'ʋr. Ka zɔta ayi' yi sian'arin la naa gban'e dasam la ban pisnaasi nɛ ayi' aansi ba niŋgbina la zɔrisi zɔris. 25 Ka o gaadi keŋ Kaamel zuorin la ka yii ani lɛb Samaria teŋin.