Ayi' Na'anam
Ahazaya kum yɛla
1
1 Ahab kum nya'aŋ la, Moab dim da zan'as ye Israel dim kʋ lɛn sʋ'oe ba.2 Saŋkan la Ahazaya da naanɛ o girimbisa zug Samaria teŋin lu naa pu'alim. Dinzug o da tʋm nidib ka yɛli ba ye, “Kemi Ekron teŋgban kanɛ buon Baal-Zebub la san'anɛ bu'osi gɔs ye m na paam laafi m pu'alʋŋ nwa nii?” 3 Amaa Zugsɔb maliak da yɛl Elaja onɛ an Tisibi nid la ye, “Kem tʋ'ʋs Samaria na'abi tʋm ninsieba la na ka bu'osi ba ye, ‘Li pa'al ye Wina'am ka' Israel teŋin bɛɛ wala ka ya ken Baal-Zebub Ekron teŋgban la san'anɛ?’ 4 Alazug, Zugsɔb la yɛl si'el na'ab la yɛla nwa ye: ‘Fʋn dig digsi'a la, fʋ kʋ duoe. Asɛɛ ka fʋ kpi.’ ” Ka Elaja sid keŋ. 5 Nimbanɛ ka na'ab la da tʋm la lɛbi o sa'an la, ka o bu'osi ba ye, “Bɔɔ kɛ ka ya lɛb na?” 6 Ka ba lɛbis ye, “Dau sɔ' sia'ali ti, ka yɛli ti ye, ‘Lɛm yɛli Na'akanɛ tʋmi ya la ye Zugsɔb la yɛl si'eli nwa ye: li pa'al ye Wina'am ka' Israel teŋin bɛɛ wala, ka fʋ tʋm nidib Baal-Zebub kanɛ an Ekron dim teŋgban la san'anɛ? Dinzug fʋn dig digsi'a la fʋ kʋ duoe. Asɛɛ fʋ kpi.’ ” 7 Ka Na'ab la bu'osi ba ye, “Nimbɔ buudi ka yanam sia'al ka o yɛli ya nɛ'?” 8 Ka ba lɛbis o ye, “O anɛ kɔnbilʋg sɔb, ka lɔɔ o siaa nɛ gbauŋ sɛnbidiŋ.” Ka Na'ab la yɛl ye, “Elaja onɛ yi Tisibi teŋin la, la.” 9 Ka o tʋm soogia kpɛɛm nɛ soogianam pisnu Elaja san'an. Soogiakpɛɛm la da paae Elaja san'an ka o zin' kʋkʋn zug ka o yɛl o ye, “Wina'am tʋmtʋmma, na'ab la yɛl ye fʋ sigim na!” 10 Ka Elaja lɛbisi yɛl soogia kpɛɛm la ye, “Tɔ! Mam ya'a sid an Wina'am tʋmtʋm, alaa bugum on yim arezana ni na kanb fʋn nɛ fʋ soogianam pisnu la wʋsa!” Ka bugum sid yi arezana nii sig na kanb soogia kpɛɛm la nɛ o nidib pisnu la wʋsa. 11 Nɛ' nya'aŋ la Na'ab la daa lɛn tʋm soogia kpɛɛm nɛ soogianam pisnu ka ba keŋ Elaja san'an. Ka kpɛɛm la yɛl o ye, “Wina'am tʋmtʋmma, na'ab la yɛl ye fʋ sigim tɔ' na!” 12 Ka Elaja lɛbis ye, “Tɔ! Mam ya'a sid an Wina'am tʋmtʋm, alaa bugum on yim arezana na kanb fʋn nɛ fʋ nidib pisnu la!” Ka bugum sid yi arezana nii sig na kanb kpɛɛm la nɛ o soogianam pisnu la wʋsa. 13 Na'ab la da lɛn tʋm soogia kpɛɛm onɛ paas atan' la. Kpɛɛm kaŋa da keŋ igin Elaja tuon, ka bɛlim o ye, “Wina'am tʋmtʋmma, zɔmim nimbaanlig ka da san'am man nɛ nidib pisnu banɛ aan fʋ yammis nwa nyɔvʋya! 14 Gɔsima, bugum pʋn yi arezana ni na kanb soogiakpɛɛmnam ayi' nɛ ba nidib la, amaa nannanna zɔmim nyɔɔg!” 15 Zugsɔb maliak yʋ'ʋn da pian' tis Elaja ye, “Sigim dɔl o; da zɔt dabiem!” Ka Elaja sid duoe sigi dɔl o ka ba keŋ na'ab la san'an 16 ka yɛl o ye, “Zugsɔb la yɛl si'eli nwa: Li pa'al ye Wina'am ka' Israel teŋin ka fʋ na bu'osɛ, ka gʋ'ʋŋi tʋm nidib ye ba keŋ bu'os Baal-Zebub kanɛ an Ekron teŋgban laa? Fʋn maal nɛ' la zug, fʋ kʋ vʋ'ʋgi ka duoe fʋn dig gadsi'a la zugɔ. Asɛɛ fʋ kpi!” 17 Ka na'ab la daa sid kpi nwɛnɛ Zugsɔb la yɛl Elaja ye o pian' si'em la. Ahazaya da ka' biig la zug, o pitʋ Joram da di Israel na'am, ka li anɛ Jehosafat biig Jehoram n da di Juda na'am la li yʋma ayi' la nya'aŋ. 18 Ya'a kpɛlim linɛ wʋsa n tʋm Ahazaya na'am saŋa la, nɛ on tʋm si'el wʋsa la, ba da sɔbi li kpɛn'ɛs Israel na'anam gbauŋʋn la.