Uzia n di Juda na'am la yɛla
26
1 Juda nidib la wʋsa da la'asi gaŋ Uzia onɛ da an yʋma pii nɛ ayuobʋ la ka o dii o saam Amazaya na'am la. 2 O da zabi nyaŋ Elaf teŋ la ka maligim mɛɛ li paas Juda teŋ la ni.3 Uzia da anɛ yʋma pii nɛ ayuobʋ ka di na'am, ka da zin'in na'am gbauŋ la zug Jerusalem tempʋʋgin yʋma pisnu nɛ ayi'. O ma yʋ'ʋri da buon Jekolia ka o yi Jerusalem na. 4 Uzia da tʋm nɛ linɛ an sʋm Zugsɔb la tuon wʋʋ o saamme da tʋm si'em la mɛn. 5 Saŋa kanɛ ka Zakaria da bɛ la, o da ti'enɛ Wina'am, bɔzugɔ Zakaria da pa'al o nɛ ka o zɔt Wina'am dabiem. Saŋa kanɛ wʋsa ka o da ti'e Zugsɔb la, Wina'am da kɛt nɛ ka o yɛla wʋsa ken tuon.
6 O da keŋ zab nɛ Filistia dim ka nyaŋi nwa'a ba zaŋguoma banɛ bɛ Gaf nɛ Jabne nɛ Asdod tɛɛnsin la. O da mɛ' teŋ kpi'ema Asdod nɛ teŋ sieba Filistia dim la teŋsʋk. 7 Wina'am da sʋŋ o ka o nyaŋ Filistia dim la nɛ Arabia dim banɛ bɛ Gur-Baal la nɛ Meun dim. 8 Ammon dim da kena yɔ lampɔ tis o, ka o yʋ'ʋr yi hali ti paae Egipt sʋ'ʋlim, bɔzugɔ o yʋ'ʋn da paam nɛ kpi'euŋ hali.
9 Uzia da mɛ' zin'ibanɛ ka ba dʋti gur teŋ la Jerusalem Gɔnligir Zin'ig Za'anɔɔrin la, nɛ Bɔn'ɔg Za'anɔɔrin la nɛ zin'ikanɛ ka lɔdig bɛ la. O da mɛɛ li ka li mɔr paŋ. 10 O mɛ da lɛm mɛɛ li buudi pipirigin ka tu bulis bɛdegʋ bɔzugɔ, o da mɔr bʋnkɔnbid bɛdegʋ Sefela teŋgbauŋʋn nɛ zin'ikanɛ ka paalʋ dig sassi la ni. O da mɔr nidib bɛdegʋ ka ba tʋmmi o pɔɔdin nɛ tiwanna linɛ bɛ kʋkʋna zug la nɛ kʋ'ʋlʋm zin'is la, bɔzugɔ o nɔŋ nɛ kuob hali.
11 Uzia da mɔri soogianam bɛdegʋ banɛ na nyaŋi pʋdigi yii zab wʋʋ Jeiel onɛ an gbansɔbid la nɛ Maaseya onɛ an kpɛɛm, nɛ Hanania onɛ an na'ayir kpɛɛm la pa'ali ba si'em la. 12 Yir kpɛɛmnam banɛ da gaad zabzabidib la tuon kal da anɛ tusa ayi' nɛ kɔbisyuobʋ (2,600). 13 Ban da gɔt soogia sieba la kal da anɛ tusa kɔbistan' nɛ ayɔpɔi nɛ kɔbisnu (307,500), banɛ na nyaŋi sʋŋ Na'ab la ka o zab nɛ o dataas. 14 Uzia da tis soogianam la linɛ lusid nyɔ'ɔg nɛ kpana nɛ kʋnt zupibis nɛ zaba fuud nɛ piema nɛ luobkuga. 15 Jerusalem teŋin la, o da kɛnɛ ka banɛ mi' tʋʋma hali maal bʋnsieba linɛ na nyaŋi ya'a zaŋguoma la zugʋ tɔɔnd piema ka lɔbid kugbɛda. O yʋ'ʋr da tiig nɛ zin'ig wʋsa, bɔzugɔ o da paam nɛ sʋŋir hali ka nyaan ti kilim nintita'ar.
16 Amaa Uzia n da paam kpi'euŋʋ naae la nyɛɛsim da kɛ ka o li. O da lɛn ka' sida sɔbi tis Zugsɔb onɛ aan o Wina'am la, ka kpɛn' Zugsɔb Pʋ'ʋsim Dɔɔgin la ye o nyu'oe bʋnnyubisa tis Zugsɔb la. 17 Azaria onɛ an Maanmaan la nɛ o taaba pisnii banɛ an Zugsɔb maanmaannib ka ba sʋnf kpi'em la da dɔl o kpɛn'. 18 Ba da keŋ yɛl o ye, “Li ka' suor ka fʋn Uzia, nyu'oe bʋnnyubisa tis Zugsɔb la. Li anɛ maanmaannib banɛ an Aaron yaas ka ba maali ba kasi la banɛ nar ye ba nyu'oe. Yim Pʋ'ʋsim Dɔɔgin la, ka fʋ ka' sida sɔba, ka Zugsɔb Wina'am kʋ tisif girimaa.”
19 Uzia onɛ da pʋn zanl linɛ nyu'od bʋnnyubisa la, o sʋnf da duoe hali. On da nan bɛɛ ani tansid maanmaannib la Zugsɔb maan daka la tuon Pʋ'ʋsim Dɔɔgin la, ka kʋkɔm ban'a pin'ili gban'e o gbɛ'ogʋn. 20 Maanmaan kpɛɛm Azaria nɛ maanmaannib la da gɔt o la, ba da nyɛ ka kʋkɔm ban'a bɛɛ o gbɛ'ogʋn, ka ba niŋ tɔ'ɔtɔ ye ba mɔr o yi. Hali on mɛŋ gba da bɔɔd ye o yi tɔ'ɔtɔ, bɔzugɔ Zugsɔb la da kɛ ka ban'a la gban'e o.
21 Ban'a la da mɔr Na'ab Uzia, hali nɛ on ti kena kpi. O yʋ'ʋn da bɛ nɛ o yiri o kɔn' ka pʋ lɛn tʋm si'ela. Na'ab la biig Jotam da di gbandaan n bɛ na'ayin la ka gɔt nimbanɛ bɛ teŋin la.