Jotam n di Juda na'am la yɛla
27
1 Na'ab Jotam da di na'am la ka anɛ yʋma pisi nɛ anu, ka gɔs Israel hali ti paae yʋma pii nɛ ayuobʋ. O ma yʋ'ʋri da buon Jerusa, onɛ da an Zadok pu'ayua. 2 O da tʋm linɛ tig Zugsɔb la nini wʋʋ o saam Uzia n da tʋm si'em la, amaa o da pʋ nwɛnɛ o saam la bɔzugɔ on da pʋ kpɛn' Zugsɔb Pʋ'ʋsim Dɔɔgin la. Nidib la da nan kpɛn tʋmnɛ ba tʋʋmyaalis la. 3 Jotam n da maligim mɛ' yaŋir linɛ bɛ zugin ka bɛ Zugsɔb Pʋ'ʋsim Zin'igin la, ka maligim maal zaŋguom linɛ bɛ Ofel kʋkʋnin la. 4 O da mɛ' tempʋʋs Juda kʋkʋna la ni, ka mɛ' kpi'euŋ zin'is nɛ dɔwa'ama zin'ikanɛ ka tiis bɛ la.5 Jotam da zab nɛ Ammon dim na'anam la ka nyaŋi ba. Yʋʋm kan la ba da la'as anzurifa na nɛ mui bɛdegʋ kena tis o. Ka li ti paae yʋma atan' ka ba nan kpɛn la'asid la'ad la ala kennɛ tisid o.
6 Jotam da paam paŋ hali bɔzugɔ o da dɔlli Zugsɔb Wina'am la nɛ o sʋnf wʋsa.
7 Jotam da lɛn tʋm tʋʋm sieba o na'am la saŋa, nɛ on da zab si'em la wʋsa, sɔbi niŋ Israel nɛ Juda Na'anam Gbauŋʋn la. 8 O da anɛ yʋma pisi nɛ anu ka di na'am, ka da gɔs Jerusalem yʋma pii nɛ ayuobʋ. 9 Jotam da maal ka'alim ka ba mum o yaanam yaadin, David tempʋʋgin. Ka o biig Ahaz lɛdigi di na'am la.