Josia di Juda na'am la yɛla
22
1 Josia da anɛ yʋma anii ka di na'am, ka da zin'in na'am gbauŋ la zug Jerusalem tempʋʋgin yʋma pistan' nɛ yinne. O ma yʋ'ʋri da buon Jedida, Adaya pu'ayua onɛ yi Bozikaf teŋin na. 2 O da tʋm linɛ malis Zugsɔb la sʋʋnr ka dɔl o yaab Na'ab David suoya la wʋsa ka pʋ lɛb datiuŋ bɛɛ dagɔbʋga.3 O na'am la yʋʋm pii nɛ anii saŋa la, Na'ab Josia da tʋm o gbansɔbid Safan onɛ an Azalia biig ka an Mesulam yaaŋ la Zugsɔb Pʋ'ʋsim Yin. O da yɛl o ye, 4 “Kem maanmaan kpɛɛm Hilkia san'an yɛl o ka o la'as ligidbanɛ ka ba la'asi mɔri ken Zugsɔb Pʋ'ʋsim Yin na la, linɛ ka banɛ gur za'anɔya la di'es nidibin la. 5 Nɔkimi lii niŋ banɛ ka ba gaŋ ye ba gɔs Pʋ'ʋsim Yir la nu'usin ka kɛ ka ba yɔ Zugsɔb Pʋ'ʋsim Yir tʋmtʋmnib la ka ba maligim maal Yir la zin'ikanɛ san'am la wʋsa. 6 Tʋmtʋm banɛ an: kampintanam nɛ banɛ mɛɛd dɔɔd nɛ zaŋguoma la. Mɛ kɛl ka ba da' daad nɛ kugbanɛ ka ba kpi'a, maligim maal Pʋ'ʋsim Yir la. 7 Amaa li ka' tilas ye ba pa'al ban nɔk ligidi la tʋm si'em bɔzugɔ ba tʋmnɛ nɛ sida.”
Hilkia da nyɛ Zugsɔb zi'elʋg gbauŋ la
8 Hilkia onɛ an Maanmaan la da yɛl Safan onɛ an gbansɔbid la ye, “Man nyɛ wada Gbauŋ Zugsɔb Pʋ'ʋsim Yin la.” O da nɔki tis Safan ka o karimi li. 9 Safan onɛ an gbansɔbid la da lɛb Na'ab la san'an yɛl o ye, “Naa, ti nyɛ ligidkanɛ bɛ Zugsɔb Pʋ'ʋsim Yin la, ka nɔki tis tʋmtʋmnib banɛ gɔt Pʋ'ʋsim Yir tʋʋma la.” 10 O mɛ da lɛn yɛl Na'ab la ye, “Hilkia onɛ an Maanmaan la nɔk gbauŋ la tisim.” Ka Safan karimi li Na'ab la tuon. 11 Na'ab la da wʋm pian'abanɛ sɔb wada Gbauŋʋn la, o da aans o fuud. 12 O da tis Hilkia, onɛ an Maanmaan la, nɛ Safan biig Ahikam nɛ Mikaya biig Akibo nɛ Safan onɛ an gbansɔbid la nɛ Asaya onɛ tʋmmi tisid Na'ab la nɔɔr ye, 13 “Kem bu'osi baŋi linɛ bɛ Zugsɔb la san'an, man nɛ m nidib la nɛ Juda dim wʋsa, zaŋi keŋ linɛ sɔb gbauŋ kanɛ ka ti nyɛ la pʋʋgin. Zugsɔb la sʋnf duoe nɛ ti hali, ka li anɛ ti yaanamɛ pʋ siak pian'ad linɛ bɛ gbauŋ kaŋa ni la ka mɛ pʋ tʋm nwɛnɛ lin sɔb gbauŋ kaŋa ni ye ti tʋm si'em la zug.”
14 Hilkia onɛ an Maanmaan la nɛ Ahikam nɛ Safan nɛ Asaya da keŋ ye ba pian' tis nɔdi'es pu'ak onɛ yʋ'ʋri buon Hulda ka da an Sallum pu'a la. Sallum da anɛ onɛ gur fuud suak dɔɔg la, ka an Tikiva biig onɛ mɛ an Haras biig. O da bɛ nɛ Jerusalem teŋ yapaala la ni. 15 Pu'a la da yɛli ba ye, Zugsɔb onɛ an Israel Wina'am la yɛl si'eli nwa: Yɛlimi dau kanɛ tʋmi ya man san'an la na ye, 16 “Zugsɔb la yɛl si'eli nwa: ‘Mam ye m kɛnɛ ka tɔɔg lu teŋ kaŋa nɛ li nidib la zug, ka li dɔl wʋʋ lin sɔb gbauŋ kanɛ ka Juda Na'ab karim la. 17 Bɔzugɔ ba bas man, ka maan maana ka nyu'od bʋnnyubisa tisid bada banɛ ka ba maal nɛ ba nu'us la ka li kɛ ka m sʋnf duoe nɛ ba. M sʋʋnr duonɛ hali dit wʋʋ bugum nɛ, ka sɔ' kʋ nyaŋi kpiisi lii!’ ” 18 Amaa yɛlimi Juda Na'ab, onɛ tʋmi ya ye ya bu'os Zugsɔb la baŋ linɛ bɛ la ye, “Zugsɔb onɛ an Israel Wina'am la yɛl si'eli nwa zaŋi ken pian'abanɛ ka ya wʋm la: 19 ‘Fʋn wʋm mam pian' pian'asi'a zɛrig teŋ kaŋa nɛ li nidib la ye, ba na paam nɔpɔɔr ka lieb zaalim ka fʋ sʋʋnr san'am ka fʋ sigisi fʋ mɛŋ si'em man Zugsɔb la san'an ka aansi fʋ fuud ka kaas man tuon la zug, m wʋmi fʋ sɔsʋg.’ Zugsɔb la yɛl si'em la. 20 Fʋ kʋ nyɛ tɔkanɛ ka m ye m kɛ ka li kɛn teŋ kaŋa ni na laa, ka fʋ na ti kpi ka ba mumif nɛ sumbʋgʋsʋm.” Ba da mɔr pu'a la gandig si'em la wʋsa lɛbi yɛl Na'ab la.