Josia maligim tɛndig Zugsɔb la dɔllim si'em
(2Yɛ 34:3-7, 29-33)
23
1 Na'ab la da buol Jerusalem nɛ Juda kpɛɛmnam la wʋsa la'as. 2 O da dɔl Juda nɛ Jerusalem nidib la nɛ maanmaannib nɛ nɔdi'esidib la nɛ nidib buudi wʋsa lin yi kpi'emnamin ti paae tadimnamin keŋ Zugsɔb Pʋ'ʋsim Yin la. O da karim linɛ wʋsa sɔb nɔnaar gbauŋʋn linɛ ka ba nyɛ Zugsɔb Pʋ'ʋsim Yin la, ka li kpɛn' ba tʋba ni. 3 Na'ab la da duoe zi'enɛ o zin'ig linɛ kpi'e dazi'edir la ka tɛndig nɔnaar la Zugsɔb tuon. Ka ye o na dɔl Zugsɔb la nɛ o sʋnf wʋsa, ka siak o nɔzi'elʋg nɛ on pa'an si'el la nɛ o gban'ar la wʋsa; nɛ linɛ pa'an ye o siak linɛ sɔb nɔnaar gbauŋʋn la wʋsa. Ka nidib la wʋsa mɛ kaanbi zi'el ye ba na siak nɔnaar la.4 Na'ab la da tis maanmaan kpɛɛm Hilkia nɛ banɛ tia'al o la, nɛ banɛ gur za'anɔɔr la ye ba vaam linɛ ka ba maali tis Baal nɛ Asera teŋgbana nɛ nwadbibis la wʋsa yis Zugsɔb Pʋ'ʋsim Yin la. O da kanbisi li wʋsa nɛ bugum Jerusalem yiŋ Kidron bɔn'ɔfaligin la, ka vaae tampɛligim la mɔri keŋ Betel teŋin. 5 O da kad teŋgban maannib banɛ ka Juda Na'anam da gaŋ ye ba nyu'od bʋnnyubisa maana zin'ibanɛ bɛ Juda tempʋʋdin la nɛ banɛ gilig Jerusalem nɛ banɛ da nyu'od bʋnnyubisa tisid Baal nɛ winnig nɛ nwadig nɛ nwadbibis banɛ widigi gilig wʋsa la. 6 Josia da nɔk Asera dazi'edir la yis Zugsɔb Pʋ'ʋsim Yin la keŋ Kidron bɔn'ɔg linɛ bɛ Jerusalem yiŋ la nyu'oe li ani. O da nɛɛmi li ka li kilim zɔm ka nɔki yugus tadimnam yaadin la. 7 Josia mɛ da nwa'ae yir kanɛ ka dapgɔɔnda banɛ tʋmmi tisid teŋgbana la da bɛ ka nidib kennɛ dig nɛ ba la, yir kanɛ da kpi'e Zugsɔb Pʋ'ʋsim Yin, zin'ikanɛ ka pu'ab da ʋgʋd piena tisid Asera la. 8 Josia da buol maanmaannib banɛ bɛ Juda tɛɛnsin la wʋsa na ka ba san'am maana zin'is, lin naan Geba teŋin ti paae Beerseba, zin'ibanɛ ka maanmaannib la da nyu'od bʋnnyubisa la. O da nwa'ae kʋkʋna zut teŋgbana banɛ ka ba da mɛ', ka li bɛ Josua onɛ sʋ'oe tempʋʋg la za'anɔɔrin, linɛ bɛ teŋ la yaŋir dagɔbʋg baba la. 9 Ba da pʋ kɛ ka maanmaannib banɛ da maan maana tisid kʋkʋna zut teŋgbana la maal maana Zugsɔb bimbim linɛ bɛ Jerusalem teŋin la, amaa ba da la'asid nɛ ba maanmaan taaba la ɔnbid bodobodo linɛ ka' dabinnɛ.
10 O da san'am Tofet teŋgban linɛ da bɛ Ben Hinnom Biis bɔn'ɔgin la, ka sɔ' kʋ lɛn nyaŋi nɔk o biribiŋ bɛɛ bipuŋi maal maan Molek bugum la nii. 11 O da yis widi banɛ bɛ Pʋ'ʋsim Yir za'anɔɔrin ka Juda Na'anam da pɛsigi tis winnig la. Ba da bɛ nɛ pʋ'ʋsʋg za'asin linɛ kpi'e nɛ na'ayikpɛɛm onɛ yʋ'ʋri buon Natan-Melek dɔɔg la. Josia da nyu'oe zaba tɛrekonam banɛ ka ba pɛsigi tis winnig la mɛn. 12 O da nwa'ae maana bimbim banɛ ka Juda Na'anam da mɛ Ahaz dɔkanɛ bɛɛ agɔl dɔɔg la zug, nɛ bimbim banɛ ka Manase da mɛ Zugsɔb Pʋ'ʋsim Yir za'as ayi' la ni la. O da yisi ba ani nwa'asi bugusi bugus ka vaae lɔbi bas Kidron bɔn'ɔgin. 13 Na'ab la mɛ da san'am maana zin'ig linɛ bɛ Jerusalem ya-nya'aŋ la lɛbid Zam Kʋkʋn linɛ ka Israel Na'ab Solomon da mɛɛ tis Asitoref dinɛ an teŋgban bɛ'ɛd ka an Sidon dim teŋgban la, nɛ Kemos linɛ an Moab dim teŋgban bɛ'ɛd la, nɛ Molek dinɛ an Ammon dim teŋgban kanɛ an kisʋg la. 14 Josia da nwa' ba'ar kuga la ka kɔ' Asera dazi'eda la digil teŋin, ka nɔk ninsaalib kɔnba yadigi pɛ'ɛl zin'ig la.
15 Ka dinɛ lɛm paas anɛ ye, Josia da lɛn nwa' kʋkʋna zug teŋgban bimbim linɛ bɛ Betel teŋin ka Nebat biig Jeroboam da maal ka li kɛ ka Israel dim tʋm tʋʋmbɛ'ɛd la. O da nyu'oe kʋkʋna zug teŋgbana la nɛ daad la nɛɛm ka li kilim zɔm, ka kanbis Asera dazi'edir la mɛn. 16 Na'ab Josia da gɔsi giligi nyɛ yaad banɛ da gilig kʋkʋna dɛn'ɛr la, ka kɛ ka ba yis kɔnba yaadin la nyu'oe maan daka la zugʋ san'ami li, ka li dɔl nɛ Zugsɔb labaar linɛ ka o Wina'am tʋmtʋm la da pʋn dɛŋi yɛl la. 17 Ka Na'ab la bu'os ye, “Yaʋg kugir bɔɔ nwa ka m nyɛt la?” Ka teŋ la nidib lɛbisi yɛl o ye, “Li anɛ zanbinnɛ pa'an Wina'am tʋmtʋm onɛ daa yi Juda na yɛl fʋn maal Betel maan bimbim si'em la yaʋg.” 18 Ka o lɛbis ye, “Basimini li baanlimm, da kɛ ka sɔ' daami lii.” Dinzug ka ba da pʋ lɛɛg on nɛ nɔdi'es onɛ da yi Samaria teŋin na la kɔnba la. 19 Nwɛnɛ on da niŋ si'em Betel teŋin la, ala ka Josia da yis teŋgbana la san'ami ba, nɛ maana zin'ibanɛ ka Israel Na'anam da mɛɛ li Samaria sʋ'ʋlim tɛɛnsin ka li kɛ ka Zugsɔb sʋnf duoe la. 20 Josia da nɔk teŋgban maannib banɛ maan zin'iban la wʋsa kʋʋ ba bimbima la zug, ka nyu'oe ninsaalib kɔnba li zug, ka nyaan lɛb Jerusalem.
21 Na'ab la da tis nidib la nɔkaŋa ye, “Dimmi ya Zugsɔb Wina'am Kum Maliak Gaadʋg malʋŋ la, nwɛnɛ lin sɔb si'em nɔnaar gbauŋ kaŋa ni la.” 22 Lin pin'il Tuongatib la da gur Israel saŋsi'a la, paae Israel nɛ Juda na'anam la saŋa la sa, ba da nan zi' di Kum Maliak Gaadʋg malʋŋ la wʋʋ yʋʋm kan la. 23 Amaa Josia na'am yʋʋm pii nɛ anii saŋa la ba da tiɛn Kum Maliak Gaadʋg malʋŋ Jerusalem tempʋʋgin Zugsɔb la yʋ'ʋr zug.
24 Linɛ lɛm pɛ'ɛs la Josia da kad ba'akɔn dim nɛ sɔnpʋttib la wʋsa, nɛ bada banɛ bɛ yaan la, nɛ wina nɛ yɛlkisa banɛ wʋsa da bɛ Juda nɛ Jerusalem teŋin la. O da niŋ nɛ' ye linɛ sɔb wada gbauŋ kanɛ ka Hilkia onɛ an Maanmaan la da nyɛ Zugsɔb Pʋ'ʋsim Yin la niŋi amɛŋa. 25 Na'ab da nan zi' bɛ nwɛnɛ Josia, bɛɛ na'asi'a na ti bɛ nyaŋi tiaki dɔl Zugsɔb la nɛ o sʋnf nɛ o siig nɛ o paŋ wʋsa, wʋʋ on da niŋ si'em la; nwɛnɛ Moses wada la da zi'el si'em la. 26 La'am nɛ wala Zugsɔb la da pʋ bas o sʋnpɛɛn linɛ ka o mɔr nɛ Juda, ka li anɛ Na'ab Manase da tʋm si'el ka o sʋnf duoe la zugɔ. 27 Alazug Zugsɔb la da yɛl ye, “M na yis Juda dimi m san'anɛ bas wʋʋ man da yis Israel si'em la, m mɛ na zan'as Jerusalem teŋ kanɛ ka man gaŋ, nɛ Pʋ'ʋsʋg Zin'ig kanɛ ka man yɛl ye, ‘M yʋ'ʋr na bɛɛ ani la.’ ”
28 Ya'a kpɛlim yɛla banɛ da maal Josia na'am saŋa nɛ on da tʋm si'el la, ba da sɔbi niŋ Juda Na'anam Gbauŋʋn la. 29 Josia n da nan an Na'ab la, Egipt Na'ab Faaro Neko da keŋ Efiritis kɔldaugin ye o sʋŋi Asiria Na'ab. Na'ab Josia da yi ye o tʋ'ʋsi zab nɛ o, amaa Neko da tʋ'ʋs o kʋʋ o Megido teŋin. 30 Josia yammis da nɔk o niŋgbiŋ la Megido teŋin niŋ tɛreko ni mɔri keŋ Jerusalem mum o, o mɛŋ yaʋgʋn. Ka teŋ la nidib gaŋ Jehoahas onɛ an Josia biig la, bu'oe malʋŋ kpaam niŋ o zugin ka diis o, o saam na'am la.
Jehoahas n di Juda na'am la yɛla
31 Jehoahas da anɛ yʋma pisi nɛ atan' ka di na'am. O da zin'in na'am gbauŋ zug Jerusalem tempʋʋgin nwadis atan'. O ma yʋ'ʋri da buon Hamutal, onɛ an Jeremia pu'ayua, ka da yinɛ Libna teŋin na. 32 O da tʋm bɛ'ɛd Zugsɔb la tuon wʋʋ o yaanamɛ da tʋm si'em la. 33 Faaro Neko da mɔr o keŋ Dibila linɛ bɛ Hamat teŋin lɔɔ o nɛ bana linɛ kɛ ka o kʋ nyaŋi sʋ'oe Jerusalem. Ka yʋ'ʋn muk Juda ye ba yɔ anzurifa ligidi kɔbiga nɛ sanlima yinne. 34 Faaro Neko da diis Josia biig Eliakim o saam na'am, ka tiak Eliakim yʋ'ʋr ye Jehoyakim. Amaa o da mɔr Jehoahas n keŋ Egipt teŋin, ka o da kpii ani. 35 Jehoyakim da yɔ Faaro Neko anzurifa nɛ sanlima dinɛ ka o da bɔɔd la. On da niŋ si'em yɔ sam la anɛ nwa: o da kɛnɛ ka teŋ la nidib mɛŋ yɔ anzurifa ka li dɔl sɔ' wʋsa paŋi zem si'em.
Jehoyakim n di Juda na'am la yɛla