41
1 Nwadis ayɔpɔi la ni ka Isimael onɛ an Netanaya biig ka an Elisama yaaŋ ka an na'ayikpɛɛm la da dɔl dap piiga kɛn Ahikam biig Gedalaya san'an na Misipa teŋin. Ban da la'asi dit la, 2 Isimael nɛ o dap piiga la da duoe nɔk sʋ'ʋgʋ kʋ Gedalaya. Ala ka ba da kʋ ninkanɛ ka Babilon na'ab gaŋ ye o an gɔmena teŋin la. 3 Isimael mɛ da kʋ Juda dim banɛ da bɛ Gedalaya san'an la wʋsa, la'am nɛ Babilon soogianam banɛ da bɛ ani la.4 Ban da kʋ Gedalaya yimbɛog ka sɔ' nam pʋ baŋi li yɛl la, 5 dap pisnii da yi Sekɛm nɛ Siilo nɛ Samaria na. Ba da pʋni ba tieŋ ka aansi ba fuud ka nwaa ba niŋgbina nɛ sʋ'ʋs sʋnsa'aŋ zug, ka mɔr zʋʋd maana nɛ bʋnnyubisa keŋ Zugsɔb la Yin Jerusalem tempʋʋgin. 6 Netanaya biig Isimael da yi Misipa na tʋ'ʋsi ba. O da kennɛ ka kum, ka yɛli ba ye, “Kemi Ahikam biig Gedalaya san'an na.” 7 Ban kpɛn' tempʋʋgin la, Isimael nɛ dap banɛ da bɛɛ o san'an la da kʋʋ baa lɔs buligin. 8 Amaa ba nidib piiga da yɛl Isimael ye, “Da kʋʋ ti! Tinam mɔr ki nɛ mui nɛ kpaam nɛ siind ka nɔki li su'a.” Ka o basi ba ka pʋ la'asi ba nɛ bama la kʋʋ. 9 (Bulig kanɛ ka o da lɔs nimbanɛ ka o da kʋ la'am nɛ Gedalaya la da anɛ Na'ab Asa da tuu li, on da ti'ebid ye o gu' ka Israel na'ab Baasa da nyaŋi zab nɛ ba la. Isimael da nɔk nɛ ninkpiilima pɛ'ɛl bulig la.) 10 Isimael da gban'e Na'ab la pu'ayuos nɛ nimbanɛ bɛ Misipa la wʋsa nɛ banɛ da kpɛlim ani ka Nebuzaradan da gaŋ Gedalaya ye o guri ba la wʋsa. O da gban'e ba mɔri lɔ'ɔŋi keŋ Ammon dim teŋin.
11 Karea biig Johanan nɛ soogianam tuongatib la wʋsa da wʋm bɛ'ɛd linɛ ka Isimael tʋm la, 12 ba da duoe nɔki ba nidib wʋsa keŋ zab nɛ Isimael. Ba da kad o keŋ gban'e nɛ bɛuŋ tita'ar la baba linɛ bɛ Gibeon la. 13 Nidib banɛ wʋsa ka Isimael mɔr la da nyɛ Johanan nɛ soogianam tuongatib la, ba sʋnf da ma'ae ya. 14 Isimael da gban'e ninsieba Misipa teŋin la wʋsa da fɛndigi lɛb Johanan san'an. 15 Amaa Isimael nɛ o nidiba anii da zɔɔ bɔdigi keŋ Ammon dim san'an.
Ban zɔɔ keŋ Egipt la yɛla
16 Karea biig Johanan nɛ soogianam tuongatib la da mɔr nidib la keŋ. Ba da anɛ nimbanɛ da kpɛlim Misipa teŋin ka o faaɛn ba Isimael san'an, on da kʋ Ahikam biig Gedalaya la nya'aŋ. Ba da anɛ soogianam nɛ pu'ab nɛ biis nɛ na'ayikpɛm, banɛ wʋsa ka o da mɔri yi Gibeon na la. 17 Ka ba wa'ae Egipt teŋin ka zi'en Geruf-Kimham teŋin linɛ kpi'e Betilehem la 18 ye ba su'a ka Babilon dim da nyɛɛ ba. Ba da zɔti ba nɛ dabiem bɔzugɔ Netanaya biig Isimael da kʋ Gedalaya onɛ ka Babilon na'ab da gaŋ ye o an gɔmena teŋin la.