42
1 Soogianam tuongatib la wʋsa la'am nɛ Karea biig Johanan nɛ Hosiaya biig Jaazanaya nɛ nidib la wʋsa; lin yii ba tadimnamini ti paae ba kpi'emnam la wʋsa da keŋ 2 Jeremia onɛ an nɔdi'es la san'anɛ yɛl o ye, “Naa, wʋmi ti fabʋlʋg ka sɔsi fʋ Zugsɔb Wina'am la nimbanɛ kpɛlim la yɛla. Fʋn nyɛ la, ti daa anɛ bɛdegʋ amaa nannanna ti yʋ'ʋn anɛ bi'ela. 3 Sɔsim ka fʋ Zugsɔb Wina'am la yɛli ti tinamɛ na keŋ si'el nɛ tinamɛ na niŋ si'em.” 4 Nɔdi'es Jeremia da lɛbis ye, “M wʋm ya. M na sɔs Zugsɔb onɛ aan ya Wina'am la wʋʋ yanamɛ yɛl si'em la. M na kɛlis Zugsɔb la yɛl si'el wʋsa ka kena yɛli ya, m kʋ su'a ya si'el si'ela.” 5 Ani ka ba yʋ'ʋn yɛl Jeremia ye, “Ti ya'a pʋ tʋm wʋʋ fʋ Zugsɔb Wina'am la yɛlif ye ti tʋm si'em la wʋsa, Zugsɔb onɛ an sida sɔb la aan ti kasɛt. 6 Li ya'a na an sʋm woo, li ya'a lɛn anɛ bɛ'ɛd woo, ti na siaki ti Zugsɔb Wina'am onɛ ka ti tʋmmi fʋ o san'an la nɔɔr; ka si'el wʋsa na niŋ sʋ'ʋŋa tisi ti, tinam lɛɛ na siaki ti Zugsɔb Wina'am la nɔɔr.”7 Dabpiiga nya'aŋ ka Zugsɔb labaar kɛn Jeremia san'an na. 8 Ka o buol Johanan nɛ soogianam tuongatib banɛ da bɛɛ o san'an la nɛ nidib la wʋsa lin yi ba tadimnamin la ti paae ba kpi'emnam la. 9 Ka yɛli ba ye, “Zugsɔb onɛ an Israel Wina'am ka ya daa tʋmim ye m mɔri ya fabʋlʋgʋ keŋ o san'an la yɛl ye, 10 Ya ya'a bɛ teŋ kaŋa ni, m na kɛ ka ya nyɛ zi'esim sʋŋ ka m kʋ lɛn da'ae ya basɛ. M na sɛɛ ya ka kʋ lɛn vuoɛn ya ya'asɛ. M sʋʋnr san'am ya nɛ namisʋg kanɛ ka m kɛ ka li paae ya la. 11 Da zɔti Babilon na'ab onɛ mɔri ya dabiem la. Zugsɔb la yɛl si'em la. M na bɛ nɛ ya ka na faaɛn ya yis o nu'usin. 12 M na zɔɔ ya nimbaanlig ka kɛ ka on mɛ zɔɔ ya nimbaanlig ka kɛ ka ya lɛbi zin'inɛ ya teŋin la.”
13 Amaa ya ya'a yɛl ye ya kʋ kpɛlim teŋ kaŋa nii, ka zan'asi ya Zugsɔb Wina'am nɔɔr, 14 ka ye ya na keŋ zin'in Egipt, zin'ikanɛ ka ya kʋ nyɛt zaba bɛɛ wʋm tanp na'atan piebʋg bɛɛ kɔ'ɔm yɛlaa, 15 dinzugɔ kɛlisimi Zugsɔb la labaar yanam Juda dim banɛ kpɛlim la. Zugsɔb onɛ an Paŋtita'ar Sɔb ka an Israel Wina'am la yɛl ye, Ya ya'a mɔɔd ye ya keŋ Egipt, ka sid keŋ zin'inɛ ani, 16 zaba kanɛ ka ya zɔt la na paae ya ani, ka kɔ'ɔm kanɛ ka ya pʋ bɔɔd la na dɔlli ya paae Egipt ka ya kpii ani. 17 Sida, banɛ wʋsa mɔɔd ye ba keŋ Egipt teŋin zin'in la wʋsa na kpi zaba ni, la'am nɛ kɔ'ɔm nɛ ban'abɛ'ɛd; ba nid baa yinne kʋ vʋ'ʋg bɛɛ nyaŋi yi tɔɔg kanɛ ka m na kɛ ka li kɛɛn ba zugin na la. 18 Zugsɔb onɛ an Paŋtita'ar Sɔb ka an Israel Wina'am la yɛl ye, Ya ya'a lɛb Egipt teŋin, m sʋnpɛɛnni sadigim kpa'ae yɛɛl banɛ bɛ Jerusalem la, ala ka m sʋnpɛɛn mɛ na kpa'ae yɛɛli ya. Ya na anɛ banɛ ka ba na mɔri ya yʋ'ʋri pɔɔdi tisid nidib ka li na paki ya. Ya na nyɛ kʋʋsbɛ'ɛd nɛ sʋnsa'aŋ, ka kʋ lɛn nyɛ zin'ikaŋa ya'asɛ.
19 “Yanam Juda dim banɛ kpɛlim la, Zugsɔb la yɛli ya ye, ‘Da keŋi Egipt teŋinɛ.’ Baŋimi nɛ' sʋ'ʋŋa; m sa'ali ya zina nwa ye, 20 Li daa anɛ yidig tita'ar nɛ yanamɛ daa tʋmim Zugsɔb Wina'am la san'an ka yɛl ye, ‘Sɔsimi ti Zugsɔb Wina'am la tisi ti ka on yɛl si'el wʋsa ti na tʋmi li la.’ 21 Zina nwa m yɛli ya on yɛl si'el la wʋsa amaa ya nam kpɛn zan'asnɛ ka pʋ siaki ya Zugsɔb Wina'am la nɔɔrɛ. 22 Alazugɔ baŋimi ye yanamɛ bɔɔd ye ya keŋ zin'isi'a zin'in la, ya na kpi zaba ni ka kɔ'ɔm nɛ ban'abɛ'ɛd mɛ na kʋʋ ya.”