43
1 Jeremia da yɛl nidib la ba Zugsɔb Wina'am yɛl o si'el ye o yɛli ba la wʋsa. 2 Amaa Azaria onɛ an Hosiaya biig la nɛ Karea biig Johanan nɛ banɛ dʋ'ʋsidi ba mɛŋ la wʋsa da yɛl Jeremia ye, “Fʋ fanɛ! Ti Zugsɔb Wina'am la pʋ yɛlif ye, ‘Da keŋi Egipt teŋinɛ zin'in ani.’ 3 Amaa Neraya biig Baruk dɔlli fʋ nɔɔri bɔɔd ye o nɔki ti tis Babilon dim ka ba kʋʋ ti bɛɛ ba mɔri ti keŋ Babilon teŋin.” 4 Karea biig Johanan nɛ soogianam tuongatib nɛ nidib la wʋsa da zan'as Zugsɔb la nɔɔr ka pʋ kpɛlim Juda teŋinɛ. 5 Ka lɛɛ la'as nimbanɛ kpɛlim ka yi sʋ'ʋlim banɛ ka ba da widigi kpɛn' ka lɛb na la wʋsa mɔri ba keŋ. 6 Ba mɛ da mɔr Misipa dim la, dap nɛ pu'ab nɛ biis nɛ na'ab pu'ayuos banɛ ka Nebuzaradan onɛ an banɛ gur la kpɛɛm la, da gu'ul Ahikam biig Gedalaya onɛ an Safan yaaŋ la, ka lɛm pɛ'ɛs nɔdi'es Jeremia nɛ Neraya biig Baruk la mɔri ba keŋ. 7 Ba da zan'as Zugsɔb la nɔɔr ka kpɛn' Egipt teŋin hali ti paae Tapanes.8 Jeremia da bɛ Tapanes teŋin la, Zugsɔb la pian'ad da kɛɛn o san'an na ye, 9 “Nɔkim kugbɛda m pin' ya'adin ka Juda dim la nini nyɛ, zin'ikanɛ ka ba maal tampiga digil ka ba dɔlli ani gat ka li bɛ Na'ab Faaro na'ayir za'anɔɔr Tapanes teŋin la.” 10 Yɛlimi ba ye Zugsɔb onɛ an Paŋtita'ar Sɔb ka an Israel Wina'am la yɛl ye, M na tʋm buoli m tʋmtʋm Babilon na'ab Nebukadnɛza, ka o na nɔk o na'am kʋk la zi'el kuga banɛ ka fʋ pin' kpɛla la zug; o na ti' o na'am sʋk ka kuga la bɛɛ li ma'asimin. 11 O na kena zab nɛ Egipt dim la:
banɛ ka li an ye ba kpi la na kpi;
banɛ ka ba mɛ na zabi gban'e ba
mɔri keŋ ka ba an yammis la, ba na gban'e ba;
ka banɛ na kpi zaba ni la na kpi zaba ni.
12 O na nyu'oe Egipt dim wina dɔɔd la; o na nyu'oe ba pʋ'ʋsim dɔɔd la ka vaae ba wina la mɔri keŋ. Nwɛnɛ kɔnbkemmi na ku'ol o fuugʋ ɔnbig si'em la, ala ka o na ku'ol Egipt la'ad la vaae gaad ka ba kʋ niŋ o si'ela. 13 O na nyu'oe Winnig pʋ'ʋsim dɔɔg linɛ bɛ Heliopolis teŋin Egipt teŋgbauŋʋn la, o na san'am teŋgban kuga linɛ bɛ ani la ka nyu'oe Egipt dim wina pʋ'ʋsim dɔɔd la.