Jeremia 44

Bada maalʋgʋ kɛ ka yɛltɔɔd paae ba si'em

1 Labakaŋa da kɛn Jeremia san'an na yɛt Juda dim banɛ bɛ Migdɔl nɛ Tapanes nɛ Memfis tɛɛnsin, nɛ banɛ bɛ Egipt ya-dagɔbʋg baba la wʋsa yɛla ye 2 Zugsɔb onɛ an Paŋtita'ar Sɔb, ka an Israel Wina'am la yɛl si'eli nwa ye, “Ya nyɛ man kɛ ka yɛltɔɔg paae Jerusalem nɛ Juda nɛ tɛɛns banɛ bɛ Juda wʋsa la si'em. Zina ba dignɛ zaalim ka an dabɔɔd 3 ka li anɛ bɛ'ɛd kanɛ ka ba tʋm la zug. Ba nyu'od maana ka pʋ'ʋsid winsieba ka ban bɛɛ yanam bɛɛ ya yaanam zi', ka duoe m sʋʋnr. 4  M tʋmi m nɔdi'esidib ka lɛn tʋmi ba ya'as ka ba yɛli ba ye, ‘Da tʋmmi yɛlkisa banɛ ka man kis la!’ 5 Amaa ba pʋ wʋm bɛɛ kɛlisɛ; ba pʋ fɛndig ka basi ba tʋʋmbɛ'ɛd la, bɛɛ bas maana linɛ ka ba nyu'odi tisid winsieba la. 6 Alazug ka m sʋnpɛɛn daa punsigi kpa'ae yɛɛl Juda tɛɛns nɛ Jerusalem suoraad la, ka san'ami ba ka ba lieb dabɔɔd wʋʋ yanamɛ nyɛɛ li si'em zina la.”

7 Zugsɔb onɛ an Paŋtita'ar Sɔb, ka an Israel Wina'am la yɛl ye, “Bɔ ka ya mɔr yɛltɔɔg kaŋa buudi kɛɛn ya zugin na, ya ye ya li' Juda dim nɛ ya biis nɛ bilies ka sɔ' kʋ kpɛlimi ya nya'aŋaa? 8 Bɔ ka ya pɛligidi m sʋʋnr nɛ ya nu'usi maan si'el la, ya nyu'od maana tisid winsieba Egipt teŋin, zin'ikanɛ ka ya kena zin'in la? Ya na san'ami ya mɛŋ ka kɛ ka ba mɔri ya yʋ'ʋri pɔɔdi tisid nidib ka li na paki ya, buudbanɛ ka ya bɛɛ ba sʋʋgin dunia nwa ni la wʋsa. 9 Ya tam bɛ'ɛd kanɛ ka ya yaanam nɛ na'anam nɛ pu'ana'anam tʋm Juda teŋin la nɛɛ? Ka ya tam yanam nɛ ya pu'abi tʋm bɛ'ɛd si'a Juda nɛ Jerusalem suoraadin la nɛɛ? 10 Lin keŋ paae zina, ba pʋ sie ba mɛŋ bɛɛ pa'al na'asi, bɛɛ dɔlis wada nɛ nɔzi'ela banɛ ka m tis ban nɛ ba yaanam la.”

11 Dinzugɔ, Zugsɔb onɛ an Paŋtita'ar Sɔb ka an Israel Wina'am la yɛl ye, “M gban'ad ye m mɔr yɛltɔɔgʋ ya zugin na ka san'am Juda dim wʋsa. 12 M na yis Juda dim banɛ kpɛlim ka mɔɔd ye ba keŋ Egipt teŋin na zin'in anina la. Ba wʋsa na bɔdig Egipt teŋin la; ba na kpi zaba ni, bɛɛ kɔ'ɔm kʋʋ ba. Lin yi ba tadimnamin ti paae ba kpi'emnam wʋsa, na kpi zaba ni, bɛɛ kɔ'ɔm na kʋʋ ba. Ba na mɔri ba yʋ'ʋri pɔɔdi tisid nidib ka li an pakir nɛ kʋʋsbɛ'ɛd nɛ sʋnsa'aŋ. 13 M na namis banɛ bɛ Egipt la nɛ zaba nɛ kɔ'ɔm nɛ ban'abɛ'ɛd wʋʋ man namis Jerusalem dim si'em la. 14 Juda dim banɛ kpɛlim ka kena bɛ Egipt la baa yinne kʋ nyaŋi yi bɛɛ tilig ka lɛb Juda teŋin, zin'ikanɛ ka ba ya'am bɔɔd ye ba lɛb la; ba sɔ' kʋ lɛb anii, asɛɛ ba bi'ela ma'aa na lɛb.”

15 Ka dap banɛ wʋsa mi' ye ba pu'ab nyu'od maana tisid winsieba la, la'am nɛ pu'ab la, nɛ nimbanɛ bɛ Egipt ya-datiuŋ nɛ ya-dagɔbʋg baba la wʋsa yɛl Jeremia ye, 16 “Ti kʋ kɛlis labakanɛ ka fʋ yɛti ti Zugsɔb la yʋ'ʋr zug laa! 17 Ti na ba'asi maal tinamɛ yɛl ye ti na maal si'el la wʋsa. Ti na nyu'oe maana nɛ bʋnnyubisa tis win kanɛ an Agɔla Pu'ana'ab la, ka tis o daam wʋʋ tinam nɛ ti yaanam nɛ ti na'anamɛ da niŋid si'em Juda tɛɛns nɛ Jerusalem suoraadin la. Hali saŋkan la ti da mɔr diib bɛdegʋ ka mugusʋg si'a pʋ paae tii. 18 Amaa lin yi saŋa kanɛ ka ti bas ka pʋ lɛn nyu'od maana nɛ bʋnnyubisa tisidi Agɔla Pu'ana'ab la ka mɛ pʋ tisid o daam la, ti pʋ lɛm mɔr si'ela ka kɔ'ɔm nɛ zaba ma'aa yʋ'ʋn kʋʋdi ti.”

19 Ka pu'ab la mɛ yɛl ye, “Tinamɛ da nyu'od maana nɛ bʋnnyubisa tisid Agɔla Pu'ana'ab la ka tisid o daam la, ti sidib da pʋ baŋ ye ti maan ma'asa ka li nwɛnɛ win la nɛ, ka maan maana tisid oo?”

20 Ka Jeremia yɛl nidib la wʋsa, dap nɛ pu'ab banɛ da pian'ad o la ye, 21 “Ya zi' ye Zugsɔb la tɛnr ka nan kpɛn tɛn'ɛsid maana banɛ ka yanam nɛ ya yaanam, nɛ ya na'anam, nɛ ya kpɛɛmnam da nyu'od Juda tɛɛnsin nɛ Jerusalem suoraadin laa? 22 Hali Zugsɔb la daa pʋ lɛn nyaŋi mɔdig nɛ ya tʋʋmbɛ'ɛd nɛ yɛlkisa banɛ ka ya maal la, li kɛ ka nɔpɔɔr yʋ'ʋn bɛ teŋ la zug ka li lieb dabɔɔd ka nidib kae li pʋʋgin nwɛnɛ lin an si'em zina la. 23 Yanamɛ sadigim nyu'od maana nɛ bʋnnyubisa ka tʋm tʋʋmbɛ'ɛdi pɔ'ɔg Zugsɔb la ka pʋ siak o nɔɔr bɛɛ dɔl o wada la nɛ o zi'ela la, linɛ kɛ ka tɔɔg paae ya, ka ya nyɛti li nannanna la.”

24 Ka Jeremia yɛl nidib la wʋsa la'am nɛ pu'ab la ye, Yanam Juda dim banɛ bɛ Egipt la, wʋmmi Zugsɔb la pian'ad. 25 Zugsɔb onɛ an Paŋtita'ar Sɔb ka an Israel Wina'am la yɛl si'eli nwa ye, Yanam nɛ ya pu'ab pa'ali ya mɛŋ nɛ yanamɛ maal si'el la, ye ya zi'el nɔɔr ka yɛl ye, “Ti na ba'asi maal tinamɛ zi'el nɔɔr si'em la, ti na maal maana ka nyu'oe bʋnnyubisa ka nɔk daam tis Agɔla Pu'ana'ab la.” Alazugɔɔ, kemi tuon! Maalimi yanamɛ zi'el nɔɔr ye ya na tʋm si'el la! 26 Amaa kɛl ka Zugsɔb labaar la kpɛm bɛɛ ya san'an, Zugsɔb la yɛli tis yanam Juda dim banɛ bɛ Egipt la ye, M pɔ ya nɛ m yʋ'ʋtita'ar la ye yanam banɛ an Juda dim ka bɛ Egipt la, yanamɛ bɛ zin'isi'a wʋsa, ya kʋ lɛm buoli m yʋ'ʋr bɛɛ pɔ nɛ man Zugsɔb la yʋ'ʋrɛ. 27 M gɔsidi ba nɛ ye ba nyɛ bɛ'ɛd, ba kʋ nyɛ linɛ an sʋm; zaba nɛ kɔ'ɔm na kʋ Juda dim banɛ bɛ Egipt teŋin la ka ba wʋsa ti kpii naae. 28 Banɛ na nyaŋi yi zaba la ni naan Egipt n lɛb Juda teŋin na la na anɛ bi'ela. Ala ka Juda nimbanɛ kpɛlim ka kena bɛ Egipt teŋin la na baŋ onɛ pian'adi na zi'en. Ba na baŋ ye man pian'adi zi'en bɛɛ ban din la zi'enɛ.

29 Zugsɔb la yɛl ye, “Nɛ'ɛŋa na an zanbinnɛ pa'al ye m na namisi ya kpɛla, ala ka ya na baŋ ye man yɛl ye yɛltɔɔg na paae ya la anɛ linɛ zi'e. 30 Zugsɔb la yɛl si'eli nwa. ‘M bɔɔd ye m nɔk Egipt na'ab Faaro Hofira niŋ o bi'emnam banɛ ieed o nyɔvʋr la nu'usin, nwɛnɛ man daa nɔk Juda na'ab Zedekaya niŋ o bi'em Babilon na'ab Nebukadnɛza nu'usin si'em la.’ ”