Jeremia n nyɛ yɔlisim si'em
40
1 Ban da gban'e nidib Jerusalem nɛ Juda tɛɛnsin ye ba zii ba keŋ Babilon la, ba mɛ da lɔ Jeremia nɛ bana ka kɛ ka o bɛɛ ba sʋʋgin. Amaa Nebuzaradan onɛ an banɛ gur Babilon tuongat la da nyɛɛ o ka yis o bas Rama teŋin. Lin nya'aŋ ka Zugsɔb labaar da kɛn Jeremia san'an na. 2 Tuongat la n da nyɛ Jeremia la, o da yɛl o ye, “Fʋ Zugsɔb Wina'am la daa zi'el nɔɔr ka tɔɔg paae teŋ kaŋa. 3 Nannanna Zugsɔb la sid kɛ ka li kena; o maalnɛ wʋʋ on pian' si'em zi'el la. Nɛ' wʋsa maal ya ka li anɛ yanamɛ tʋm taali pɔ'ɔg Zugsɔb ka pʋ siak o nɔɔr la zug. 4 Amaa zina m yis bana la fʋ nu'usin. Fʋ ya'a bɔɔd, fʋn dɔllimi keŋ Babilon teŋin ka m na gɔsif sʋ'ʋŋa; fʋ ya'a pʋ lɛm bɔɔda, fʋn kɛl, ka kpɛlim kpɛla. Gɔsima, teŋ la wʋsa bɛ nɛ fʋ tuon; kem zin'ikanɛ wʋsa ka fʋ bɔɔd.” 5 Jeremia da nam pʋ fɛndig ye o keŋ bɛɛ o lɛbis o la, ka Nebuzaradan lɛn yɛl ye, “Lɛm Gedalaya onɛ an Ahikam biig ka an Safan yaaŋ la san'an, onɛ ka Babilon na'ab gaŋ ye o sʋ'oe Juda tɛɛns la, ka fʋn nɛ on nɛ nidib la la'am bɛ; bɛɛ fʋ keŋ fʋn bɔɔd si'el.” Tuongat la da tis o diib nɛ piini ka naan kɛ ka o keŋ. 6 Ala ka Jeremia da duoe keŋ Gedalaya san'an Misipa teŋinɛ bɛ nɛ nimbanɛ da kpɛlim teŋin la.Gedalaya lieb gɔmena sʋ'oe Juda
7 Soogia kpɛɛmnam nɛ ba nimbanɛ da bɛ paalʋ la wʋsa da wʋm ye ba gaŋ Gedalaya onɛ an Ahikam biig la ye o an gɔmena sʋ'oe teŋ la nɛ dap nɛ pu'ab nɛ biis banɛ da an nɔŋ dim ka ba pʋ zii ba keŋ Babilon la. 8 Ani ka ba kɛn Gedalaya san'an na Misipa teŋin. Tuongatib la da anɛ Isimael onɛ an Netanaya biig la nɛ Johanan nɛ Jonatan banɛ da an Karea biis la nɛ Seraya onɛ an Tanhumef biig la nɛ Efai onɛ an Netofa nid la biis nɛ Jaazanaya onɛ yi Maaka la, ka ba dɔlli ba nidib la kena. 9 Gedalaya onɛ an Ahikam biig ka an Safan yaaŋ la da pɔɔ zi'el ye o kɛ ka ban nɛ ba nidib la baŋ ye o kʋ yii ba nya'aŋa. O da yɛl ye, “Da zɔti dabiem nɛ yanamɛ na tʋm tis Babilon dim la. Zin'inimi teŋ la pʋʋgin ka tʋm tis Babilon na'ab la, ka si'el wʋsa na an sʋ'ʋŋa tisi ya. 10 Mam mɛŋ na kpɛlim Misipa zi'enɛ ya nɔba zug Babilon dim la ya'a ti kennɛ ti san'an na, amaa yanam na kpɛlim tempʋbanɛ ka ya di'e la ni, ka bʋn zʋʋd la ka maal tiis daam la nɛ kpaam su yʋya la ni ka yadig tiwala la.”
11 Juda dim banɛ da bɛ Moab nɛ Ammon, nɛ Edom tɛɛnsin, nɛ tɛɛns banɛ kpɛlim la wʋsa la, da wʋm ye Babilon na'ab bas ninsieba Juda teŋin ka gaŋ Gedalaya ye o an gɔmena sʋ'oe ba la, 12 ba wʋsa da lɛb Juda teŋgbauŋʋn Gedalaya san'an na Misipa teŋin. Ba da yinɛ tɛɛns banɛ ka ba widigi kpɛn' la wʋsa ni. Ba da nyɛ daam bɛdegʋ nɛ tiis wala.
Ban kʋ Gedalaya la yɛla
13 Karea biig Johanan nɛ soogianam tuongatib banɛ da bɛ paalʋ la wʋsa da kɛn Gedalaya san'an na Misipa teŋin 14 ka yɛl o ye, “Fʋ zi' ye Ammon na'ab Baalis n tʋm Netanaya biig Isimael na ye o kʋʋ fɔɔ?” Amaa Gedalaya da pʋ niŋi ba yadda. 15 Karea biig Johanan da yɛl Gedalaya o kɔn'ɔkɔn' Misipa teŋin ye, “Kɛl ka m keŋ kʋ Isimael ka sɔ' da baŋɛ. Bɔ ka o bɔɔd ye o kʋʋf ka kɛ ka Israel dim banɛ la'asi giligif la widig ka Juda dim banɛ kpɛlim la mɛ widigi ti ba'asi bɔdigɛ?” 16 Amaa Gedalaya da lɛbisi yɛl o ye, “Da tʋm tʋʋm kanɛ! Fʋn yɛt Isimael yɛla si'em la ka' sidaa.”