Ban da nyaŋ Jerusalem si'em
39
1 Ban da faaɛn Jerusalem si'em nwa. Zedekaya n da di na'am la li yʋma awai la ni li nwadis piiga la saŋa, Nebukadnɛza da duoe nɛ o zabzabidib wʋsa kena gilig Jerusalem zabid nɛ li. 2 Zedekaya na'am la yʋʋm pii nɛ yinne li nwadis anaasi la daba awai la daar ba da nwa'ae zaŋguom la kpɛn' na. 3 Babilon na'ayikpɛm la da keŋi zin'in Teŋsʋk Za'anɔɔrin la. Ba da anɛ Negal-Siareza onɛ yi Samiga la nɛ Nebo-Sarsekim onɛ an na'ayikpɛɛm nɛ Negal-Siareza yinne onɛ da an kpɛɛmtita'ar la nɛ Babilon na'ayikpɛm la wʋsa. 4 Juda na'ab nɛ o soogianamɛ nyɛɛ ba la, ba da yi yʋ'ʋŋʋ dɔl na'ab lɔmbɔn'ɔg suor la zɔɔ dɔl za'anɔɔr linɛ bɛ zaŋguoma ayi' sʋʋgin la, zɔti kpa'ad Araba linɛ an Joodan bɔn'ɔgin la. 5 Amaa ka Babilon zabzabidib la kadi ba paae Jeriko zin'ikanɛ an sassi la nii gban'e ba mɔri keŋ Babilon na'ab Nebukadnɛza san'an Dibila linɛ bɛ Hamat teŋin la, ka Na'ab la da kadi ba saria ani. 6 Babilon na'ab da kɛ ka ba kʋ Zedekaya biisi o nini ni ka kʋʋ o na'ayikpɛm la wʋsa. 7 Ani ka o kpig Zedekaya nini ka lɔɔ o nɛ kʋntzɛn'ug bana mɔr o keŋ Babilon teŋin.8 Babilon dim la da nyu'oe na'ayir la nɛ bugum nɛ nidib la ya' wʋsa, ka da'ae Jerusalem zaŋguoma la wʋsa bas. 9 Nebuzaradan onɛ an soogianam kpɛɛm la da gban'e nimbanɛ kpɛlim tempʋʋgin la nɛ banɛ da dɛŋi zɔ ka bas Zedekaya la wʋsa mɔri keŋ Babilon. 10 Amaa o da bas banɛ an nɔŋ dim ka pʋ mɔr si'el la Juda teŋin ka tisi ba vain tiis pɔɔd nɛ pɔɔd.
11 Babilon na'ab da pʋn tis Nebuzaradan onɛ an soogianam kpɛɛm la nɔɔr Jeremia yɛla ye, 12 “Nɔkim o gur o; da daam o, amaa tisim o on sɔs si'el wʋsa.” 13 Ala ka Nebuzaradan nɛ o kpɛɛm taaba Nebusiasiban nɛ Negal-Siareza nɛ banɛ an Babilon na'ab na'ayikpɛm la wʋsa 14 da tʋm ka ba yis Jeremia banɛ gur la zakin na ka nɔk o tis Gedalaya onɛ an Ahikam biig ka an Safan yaaŋ la ka o mɔr o kul, ka o kpɛlim ani nɛ o nidib.
15 Ban da nan gur Jeremia zakin la, Zugsɔb la labaar da kɛɛn o san'an na ye, 16 “Kem yɛl Ebɛd-Melek onɛ an Kus nid la ye Zugsɔb onɛ an Paŋtita'ar Sɔb ka an Israel Wina'am la yɛl ye, ‘M bɔɔd ye m kɛ ka man zi'el nɔɔr teŋ kaŋa yɛla si'em la niŋ amɛŋa, li na anɛ tɔɔgʋ tisi ba. Li saŋa ya'a paae li na niŋi fʋ nini ni. 17 Amaa daakan la m na faanf.’ Zugsɔb la yɛl si'em la. ‘M kʋ nɔki fʋ tis banɛ ka fʋ zɔti ba dabiem la. 18 M na faanf ka ba kʋ kʋʋf zaba nii, amaa fʋ na zɔɔ faaɛn fʋ nyɔvʋr, fʋn tisim sida la zug.’ ” Zugsɔb la yɛl si'em la.