Ban nɔk Jeremia bas buligin la yɛla
38
1 Sefatia onɛ an Matan biig la nɛ Gedalaya onɛ an Pasur biig la nɛ Jehukal onɛ an Sielemaya biig la nɛ Pasur onɛ an Malkija biig la da wʋm Jeremia yɛl nidib la si'em ye, 2 “Zugsɔb la yɛl si'eli nwa, ‘Onɛ kpɛlim zin' tempʋkaŋa ni ba na kʋʋ o zaba ni bɛɛ o kpi kɔ'ɔm bɛɛ ban'abɛ'ɛd kʋʋ o, amaa onɛ yii keŋ Babilon dimin la na vʋe.’ 3 Zugsɔb la yɛl si'eli nwa, ‘Babilon na'ab soogianam la na ba'asi nyaŋ tempʋkaŋa ka sʋ'ʋgi li.’ ” 4 Kpɛɛmnam la da yɛl Na'ab la ye, “Dau kaŋa sʋ'ʋm ye ba kʋʋ o. On yɛt si'el la pu'asidnɛ soogianam banɛ kpɛlim tempʋʋgin la nɛ nidib la wʋsa giinla. Dau kaŋa pʋ bɔɔd nidib la sʋ'ʋm amaa o mɔɔdnɛ ba san'auŋ.” 5 Ka Na'ab Zedekaya lɛbis ye, “O bɛ nɛ ya nu'usin, man kanɛ an na'ab la kʋ nyaŋi ki'isi ya nɔɔrɛ.”6 Alazug ba da nɔk Jeremia sigis Malkija onɛ an Na'ab biig la buligin, linɛ da bɛ banɛ gur la zakin la. Ka ba nɔk nwiisi sigis Jeremia buligin la. Ku'om da ka' li pʋʋginɛ li lɛɛ da anɛ bian'ar ma'aa, ka Jeremia fir bian'arin la.
7 Ebɛd-Melek onɛ an Kus nid ka tʋm na'ayin la da wʋm ye ba lɔs Jeremia buligin la. Na'ab la da zin'inɛ Benjamin Za'anɔɔrin la, 8 ka Ebɛd-Melek yi na'ayin la keŋ yɛl o ye, 9 “M zugdaan Na'aba, nimbama maal Jeremia onɛ an nɔdi'es la si'em la anɛ bugusim tʋʋma. Ba lɔs o nɛ buligin, ka o na namis ka kpi kɔ'ɔm bɔzugɔ, diib lɛn kae tempʋʋginɛ.” 10 Ka Na'ab la tis Ebɛd-Melek onɛ an Kus nid la nɔɔr ye, “Bɔɔm dap pistan' kpɛla paasi fʋ mɛŋ ka ya keŋ yis Jeremia buligin la ka o da kpii.” 11 Alazug Ebɛd-Melek da buol nidib la ka keŋ ban su'ad la'ad dɔsi'a na'ayin la teŋir la nɔk kparikɛɛnd nɛ fukʋda ani lɔ nɛ nwiisi sigisi tis Jeremia buligin la. 12 Ebɛd-Melek da yɛl Jeremia ye, “Nɔkim kparikɛɛnd nɛ fukʋda nwa vili fʋ nu'us ka nwiis la da pu'alimi fɔ.” Ka Jeremia niŋ ala, 13 ka ba vɛ'ɛg o nɛ nwiis buligin la dʋ'ʋs o na. Ka Jeremia da kpɛlim banɛ gur la zakin.
Zedekaya n sɔs Jeremia ye o sa'al o
14 Na'ab Zedekaya da lɛn tʋm buol Jeremia onɛ an nɔdi'es la na, Pʋ'ʋsim Yir za'anɔɔr kanɛ paasi atan' la ni, ka yɛl o ye, “M bɔɔd ye m bu'osif nɛ si'el, da su'am si'el si'ela.” 15 Jeremia da yɛl Zedekaya ye, “M ya'a tisif lɛbisʋg fʋ kʋ kʋʋ maa? Baa man ya'a tisif sa'alʋg fʋ kʋ kɛlisɛ.” 16 Amaa Zedekaya da su'a pɔɔ tis Jeremia ye, “M pɔ ya nɛ Wina'am kanɛ vʋe ka tisidi ti pɛbisim la, m kʋ kʋʋf bɛɛ nɔki fɔ tis banɛ bɔɔd ye ba kʋʋf la.”
17 Ani ka Jeremia yɛl Zedekaya ye, “Wina'am onɛ an Paŋtita'ar Sɔb ka an Israel Wina'am la yɛl si'eli nwa: ‘Fʋ ya'a nɔki fʋ mɛŋi tis Babilon na'ayikpɛm la, ba kʋ kʋʋ fɔ, ka mɛ kʋ nyu'oe tempʋkaŋa; fʋn nɛ fʋ yidim wʋsa na vʋe. 18 Amaa fʋ ya'a kʋ siaki nɔki fʋ mɛŋi tis Babilon na'ab na'ayikpɛm la, Babilon dim na faaɛn li ka nyu'oe li nɛ bugum; fʋ mɛ kʋ nyaŋi zɔɔ yii ba nu'usinɛ.’ ” 19 Zedekaya da yɛl Jeremia ye, “M zɔtnɛ Jew dim banɛ aaɛn lɛb Babilon dimin la dabiem, Babilon dim la pa'ati nɔkimi tisi ba ka ba niŋim yɔri-yɔri.”
20 Jeremia da lɛbis o ye, “Ba kʋ nɔki fʋ tisɛ!” Siakim Zugsɔb la nɔɔr ka niŋ wʋʋ man yɛlif si'em la, ba na basif ka kʋ kʋʋ fɔ. 21 Amaa fʋ ya'a zan'as ka pʋ nɔki fʋ mɛŋi tisɛ, Zugsɔb la nie si'eli tisimi nwa, 22 Pu'a banɛ kpɛlim Juda na'ayin la, ba na mɔri ba yii keŋ Babilon na'ab na'ayikpɛm la san'an. Pu'a ban la na ti yɛl ye,
“Fʋ zuanam banɛ ka fʋ niŋi ba yadda la
ma'af ka nyaŋif,
fʋ nɔba fir bian'arin;
ka fʋ zuanam zɔ ka basif.”
23 “Babilon dim la na faaɛn fʋ pu'ab nɛ fʋ biis la wʋsa. Fʋ mɛ kʋ nyaŋi zɔɔ yii ba nu'usinɛ amaa Babilon na'ab na gban'af; ka ba na nyu'oe tempʋkaŋa.”
24 Zedekaya da yɛl Jeremia ye, “Da kɛ ka sɔ' baŋi ti sɔnsig nwa yɛllɛ, ya'a ka' ala fʋ na kpi. 25 Na'ayikpɛm la ya'a ti wʋm ye fʋ kena sɔns nɛ m ka kena yɛlif ye, ‘Yɛlimi ti fʋn yɛl Na'ab si'el la nɛ Na'abi yɛlif si'el la, ya'a ka' ala ti na kʋʋf.’ 26 Fʋn yɛlim ye, ‘M pa'a sɔsidnɛ Na'ab la suguru ye o da lɛbisim Jonatan yin ka m kpii ani.’ ” 27 Na'ayikpɛm la wʋsa sid da kɛn Jeremia san'an na bu'os o, ka o lɛbisi ba Na'ab la yɛl o ye o yɛl si'el la wʋsa. Ka ba pʋ lɛn yɛl o si'ela, sɔ' pʋ wʋm on sɔns si'el nɛ Na'ab la zug.
28 Jeremia da kpɛm bɛ banɛ gur la zakin hali ti paae saŋa kanɛ ka Babilon dim faaɛn Jerusalem la.