Jeremia bɛ sanrega ni la yɛla
37
1 Babilon na'ab Nebukadnɛza da diis Zedekaya onɛ an Josia biig la Juda na'am, ka o di'e Jehoyakin onɛ an Jehoyakim biig la zin'ig. 2 On bɛɛ o tʋmtʋmnib la bɛɛ nimbanɛ bɛ teŋin la da pʋ kɛlis Zugsɔb la pian' si'eli tis Jeremia onɛ an nɔdi'es la.3 Na'ab Zedekaya da tʋm Jehukal onɛ an Sielemaya biig la nɛ Zefanaya onɛ an maanmaan biig la ye ba keŋ Jeremia onɛ an nɔdi'es la san'an nɛ labakaŋa ye, “Sɔsimi ti Zugsɔb Wina'am la tisi ti.”
4 Saŋkan la Jeremia yʋ'ʋn da mɔr yɔlisim na nyaŋi bɛ nidib sʋʋgin bɔzugɔ, ba da nam pʋ kpɛn'ɛs o sanrega nii. 5 Na'ab Faaro soogianam da yi Egipt n kenna, ka Babilon dim banɛ gilig Jerusalem la wʋmi ba labaar la, ba fɔnrigi lɛb ka bas Jerusalem.
6 Ka Zugsɔb la labaar kɛn nɔdi'es Jeremia san'an na ye 7 Zugsɔb onɛ an Israel Wina'am la yɛl si'eli nwa, “Yɛlim Juda na'ab onɛ tʋmi ya na ye ya bu'osim la ye, ‘Faaro soogianam banɛ kena ye ba sʋ'ʋŋif la na lɛbi ba mɛŋ teŋin Egipt, 8 ka Babilon dim la lɛb na zab nɛ tempʋkaŋa. Ba na faaɛn li ka nyu'oe li nɛ bugum.’ 9 Zugsɔb la yɛl si'eli nwa ye, ‘Da ma'aa ya mɛŋ ka tɛn'ɛsid ye, “Babilon dim la na basi tii.” Ba kʋ basɛ! 10 Hali baa ya ya'a nyaŋ Babilon soogianam banɛ zabid nɛ ya la ka li kpɛlim nɛ ba nimbanɛ pu'alim la ma'aa bɛɛ ba sʋga la ni, ba na yina nyu'oe tempʋkaŋa.’ ”
11 Babilon soogianam la da fɔnrigi lɛb nya'aŋ Faaro soogianam la zug, 12 Jeremia da duoe ye o yi tempʋʋgin la ka keŋ Benjamin sʋ'ʋlimin ye o di'e o pʋʋr linɛ aan o faar o nidibin la. 13 Amaa on da paae Benjamin Za'anɔɔrin la, banɛ gur za'anɔɔr la kpɛɛm onɛ yʋ'ʋri buon Irija ka o saam an Sielemaya ka o yaab an Hanania la da gban'e o ka yɛl ye, “Fʋ pʋ bas teŋ la nɛ ka keŋ la'as nɛ Babilon dim laa?”
14 Jeremia da lɛbis ye, “Li ka' sidaa, m pʋ bas teŋ la ka keŋ la'as nɛ Babilon dima.” Amaa Irija da pʋ kɛlis o pian'ad la, ka gban'e o mɔri keŋ tis kpɛɛmnam la. 15 Ba sʋnf da pɛlig nɛ Jeremia ka ba kɛ ka ba bʋ' o ka yɔɔ o Jonatan onɛ an gbansɔbid la yin, linɛ ka ba nɔki li lieb sanrega la.
16 Ba da yɔ' Jeremia nɛ sanrega dɔbil linɛ bɛ bʋmbɔkin la, ka o bɛɛ ani yuug. 17 Ka Na'ab Zedekaya tʋm ka ba mɔr o kɛn na'ayin la na, ka o su'a bu'os o ye, “Labaar pʋ yi Zugsɔb la san'an naa?” Ka Jeremia lɛbis ye, “Sida, Zugsɔb la na nɔki fʋ tis Babilon na'ab.” 18 Jeremia da lɛm bu'os Na'ab Zedekaya ye, “Tʋʋmbɛ'ɛd bɔ ka m tʋm tisif bɛɛ fʋ na'ayikpɛm la bɛɛ nimbama ka ya kpɛn'ɛsim sanrega ni? 19 Fʋ nɔdi'esidib banɛ pian' ziri tisif la bɛ yaanɛ, banɛ yɛl ye Babilon dim kʋ zab nɛ teŋ kaŋa la? 20 Amaa nannanna, m zugdaan Na'aba, Naa, kɛlisim ka m mɔri m sɔsʋgʋ kɛɛn fʋ tuon na. Da lɛbisim Jonatan onɛ an gbansɔbid la yinne, ya'a ka' ala m na kpii ani.”
21 Na'ab Zedekaya da tis nɔɔr ye ba niŋim Jeremia banɛ gur la zakin ka tisid o bodobodo gbil yinne daar wʋsa ti paae diibi na naae tempʋʋgin la nyain. Ala ka Jeremia da kpɛlim banɛ gur la zakin.