<<    <     Jeremia     36     >    >> 
Jehoyakim nyu'oe Jeremia gbana la yɛla
36
1 Juda na'ab Jehoyakim onɛ an Josia biig la da di o na'am la li yʋma anaasi saŋa, labakaŋa da yi Zugsɔb la san'anɛ kɛn Jeremia ni na ye, 2 “Nɔkim gbauŋʋ sɔb pian'abanɛ ka m pian'adi tisidif Israel yɛla, nɛ Juda nɛ tɛɛns banɛ bɛ la, mam pin'il Josia na'am diib saŋa pian'adi tisidif hali ti paae nannanna la. 3 Daasi'erɛɛ Juda nidib ya'a wʋm tɔɔg banɛ wʋsa ka m ye m mɔri kɛɛn ba zugin na la, ba wʋsa yinne-yinne na fɛndig ka basi ba tʋʋmbɛ'ɛd la ka m na kɛɛ ba bɛ'ɛd la nɛ ba taali bas.”
4 Alazug Jeremia da buol Baruk onɛ an Neraya biig la tu'as o; Jeremia bɛɛ ani tu'asid Zugsɔb pian'ad la, ka Baruk sɔbidi li gbauŋʋn. 5 Ban sɔbi naae la ka Jeremia yɛl Baruk ye, “Ba vi' m suor; m kʋ nyaŋi keŋ Zugsɔb pʋ'ʋsim Yinnɛ. 6 Dinzug fʋn kem Zugsɔb pʋ'ʋsim Yin dabiskanɛ ka ba lɔ nɔɔr la, ka karim gbauŋ kanɛ ka fʋ sɔb la tis nidib la. Karim tis Juda nidib wʋsa banɛ yii ba tɛɛnsin kena la. 7 Daasi'erɛɛ ba na mɔri ba winsɔsʋgʋ kɛn Zugsɔb san'an na, ka sɔ' wʋsa na fɛndig ka bas o suobɛ'ɛd la, ka Zugsɔb la sʋnpɛɛn linɛ ka o yɛl la zu'onɛ galis.”
8 Neraya biig Baruk da maal linɛ ka Jeremia yɛl o ye o niŋ la wʋsa, ka da karim Zugsɔb la pian'ad linɛ bɛ gbauŋʋn la Wina'am pʋ'ʋsim Yin la. 9 Juda na'ab Jehoyakim da di na'am yʋma anu la saŋa, li nwadis awai la ni, ba da mɔɔl nɔlɔɔr saŋa Zugsɔb la tuonnɛ tis nimbanɛ bɛ Jerusalem la nɛ banɛ yi Juda tɛɛnsin la na. 10 Lin saŋa ka Baruk da bɛ Safan biig Gemaraya onɛ an gbansɔbid la dɔɔgin, linɛ bɛ zak kanɛ bɛ zugin Wina'am Pʋ'ʋsim Yir Za'anɔpaallin la, ka o karim tis nimbanɛ bɛ Zugsɔb pʋ'ʋsim Yin la wʋsa Jeremia pian'ad linɛ bɛ gbauŋʋn la.
11 Mikaya onɛ an Gemaraya biig ka an Safan yaaŋ la da wʋm Zugsɔb la pian'ad linɛ bɛ gbauŋʋn la, 12 o da sigi kpɛn' gbansɔbid la dɔɔgin linɛ bɛ na'ayin la, zin'ikanɛ ka kpɛɛmnam la wʋsa zin' la, ba da anɛ Elisama onɛ an gbansɔbid la nɛ Delaya onɛ an Semaya biig la nɛ Elinatan onɛ an Akibo biig la nɛ Gemaraya onɛ an Safan biig la nɛ Zedekaya onɛ an Hanania biig la nɛ kpɛɛm banɛ kpɛlim la wʋsa. 13 Mikaya da yɛli ba Baruk n karim si'el gbauŋʋn la tis nidib la ka ba wʋm la nya'aŋ, 14 kpɛɛmnam la wʋsa daa tʋm Jehudi onɛ saamme an Netanaya ka o yaanam an Sielemaya nɛ Kus la ye o yɛl Baruk ye, “Mɔr gbauŋ kanɛ ka fʋ karim tis nidib la na ka la'am kɛɛn fʋ mɛŋ na.” Ka Neraya biig Baruk keŋi ba san'an ka gbauŋ la bɛɛ o nu'ugin. 15 Ka ba yɛl o ye, “Zin'inim, ka karim tisi ti!”
Ka Baruk karim tisi ba. 16 Ban wʋm pian'abama wʋsa la dabiem da gban'e ba, ka ba gɔsid taaba ka yɛl Baruk ye, “Asɛɛ ti yɛl Na'ab la pian'abama wʋsa.” 17 Ani ka ba yɛl Baruk ye, “Yɛlimi ti, fʋ niŋ wala sɔb nɛ' wʋsa? Jeremia pian' li tisi fɔɔ?” 18 Ka Baruk lɛbis ye, “Ɛɛn, onɛ pian' tisim ka m sɔb gbauŋʋn la.” 19 Ka kpɛɛmnam la yɛl Baruk ye, “Fʋn nɛ Jeremia kem su'a, da kɛ ka sɔ' baŋ yanamɛ bɛ zin'isi'aa.”
20 Ban daa kpɛn'ɛs gbauŋ la Elisama onɛ an gbansɔbid dɔɔgin la nya'aŋ la, ba daa keŋ Na'ab la san'an zakin la yɛl o si'el wʋsa. 21 Na'ab la da tʋm Jehudi ye o keŋ mɔr gbauŋ la na, ka o keŋ mɔri li Elisama onɛ an gbansɔbid la dɔɔgin na karimi li tis na'ab la nɛ kpɛɛmnam banɛ zi'e o san'an la. 22 Li da anɛ nwadis awai la ni sapal waad saŋa ka na'ab la zin' o dɔɔgin, ka bugum bɛ si'iuŋini zi'e o tuon. 23 Jehudi ya'a karim lakir atan' bɛɛ anaasi, Na'ab la nɔkidnɛ barigi nwaae li niŋ bugumin la hali ka bugum ti di gbauŋ la wʋsa naae. 24 Na'ab la nɛ o nidib la wʋm pian'abama wʋsa la, ba pʋ niŋ si'eli pa'al ye dabiem kpɛn' ba bɛɛ aansi ba fuud sʋnsa'aŋ zugɔ. 25 La'am nɛ Elinatan nɛ Delaya nɛ Gemaraya da bɛllim na'ab la ye o da nyu'oe gbauŋ la, o da pʋ kɛlisi baa. 26 Na'ab la lɛɛ da tisnɛ nɔɔr ye Jerameel onɛ an Na'ab biig la, nɛ Seraya onɛ an Aziriel biig la nɛ Sielemaya onɛ an Abidel biig la, kem gban'e Baruk onɛ an gbansɔbid la nɛ Jeremia onɛ an nɔdi'es la na. Amaa ka Zugsɔb la su'a ba.
27 Na'ab la daa nyu'oe gbambanɛ ka Jeremia pian' ka Baruk sɔb la nya'aŋ la, Zugsɔb labaar da kɛn Jeremia san'an na ye, 28 Nɔkim gbauŋ yinne ya'asi sɔb pian'ad linɛ bɛ gbauŋ kanɛ ka Na'ab Jehoyakim nyu'oe la ni. 29 Mɛ yɛlim Juda na'ab Jehoyakim ye Zugsɔb la yɛl si'eli nwa ye, Fʋ nyu'oe gbauŋ la ka yɛl ye, “Bɔ ka fʋ sɔbi ani ye Babilon na'ab na kena san'am teŋ kaŋa ka nidib nɛ bʋnkɔnbid kʋ lɛm bɛ?” 30 Dinzug, Zugsɔb la yɛl Juda na'ab Jehoyakim yɛla si'em nwa, O kʋ nyɛ biig kanɛ na zin'in Na'ab David na'am gbauŋ la zugɔ; ba na lɔb o niŋgbina bas ka nintaŋ tʋʋlʋg nwɛ'ɛdi li nintaŋ ka wama'asim na ga'aŋi li yʋ'ʋŋ. 31 M na namis on nɛ o biis nɛ o tʋmtʋmnib la ba tʋʋmbɛ'ɛd la zug; banɛ bɛ Jerusalem nɛ banɛ bɛ Juda la, tɔɔg kanɛ ka m gban'e ye li na kena la, m na mɔri li ba zugin na bɔzugɔ ba pʋ kɛlisida.
32 Ala ka Jeremia lɛn nɔk gbansi'a tis gbansɔbid Baruk onɛ an Neraya biig la, ka Jeremia lɛm pian'ad ka Baruk sɔbid pian'abanɛ bɛ gbauŋ kanɛ ka Juda na'ab Jehoyakim nyu'oe la. Ka lɛm paas pian'asieba li zug banɛ nwɛnɛ ala.