Jeremia 35

Jeremia nɛ Rekab dim yɛla

1 Labakaŋa yi Zugsɔb la ni kɛn Jeremia san'an na, Juda na'ab Jehoyakim onɛ an Josia biig la na'am diib saŋa ye, 2 “Kem buol Rekab yidimin la ka ba kɛn Zugsɔb la Yin na kpɛn' dɔbanɛ bɛ lʋga ni la yinne, ka tisi ba daam ka ba nu.”

3 Alazug ka m keŋ buol Jaazanaya onɛ an Jeremia biig ka an Habaziniya yaaŋ, nɛ o ba'abiis nɛ o biis nɛ Rekab yidim la wʋsa. 4 Ka m mɔri ba kɛn Zugsɔb pʋ'ʋsim Yin la na, kpɛn'ɛsi ba nɔdi'es Hanan onɛ an Igdalaya biig nɛ o nya'andɔlib la dɔɔgin. Li da kpi'enɛ kpɛɛmnam la dɔɔg, linɛ bɛ Sallum biig Maaseya onɛ an za'anɔgur la dɔɔg la zugin. 5 Ka m nɔk latitada ka li pɛ'ɛl nɛ daam ka nɔk nwama nɛ bʋtiisi zi'el Rekab yidim la tuon ka yɛli ba ye, “Numi daam nwa!” 6 Amaa ka ba lɛbis ye, “Ti pʋ nuud daam bɔzugɔ, ti yaab Jonadab onɛ an Rekab biig la da zi'eli ti nɔkaŋa ye, ‘Yanam bɛɛ ya yaas da nu daam.’ 7 Ka lɛn yɛl ye, ‘Da mɛɛi, bɛɛ bʋdi, bɛɛ sɛ daam tiisɛ; da mɔri nɛ'ɛnama, amaa bɛɛi sʋga ni. Ala ka ya na vʋe yuug zin'ikanɛ ka ya bɛ wʋsa guri ya bʋnkɔnbid la.’ 8 Ti siaki ti yaab Jonadab Rekab biig la da tisi ti nɔsi'a la. Tinam bɛɛ ti pu'ab bɛɛ ti biribis bɛɛ ti bipumis nan zi' nu daam, 9 bɛɛ mɛ' ya' bɛɛ ani bɛɛ ti mɔr daam tiis bɛɛ pɔɔd bɛɛ bʋd zʋʋdɛ. 10 Ti bɛ nɛ sʋga ni ka siaki ti yaab Jonadab n da zi'eli ti nɔsi'a la wʋsa. 11 Amaa Babilon na'ab Nebukadnɛza daa kena faaɛn teŋ la ka ti yɛl ye, ‘Kemi na ka ti keŋ Jerusalem ka nyaŋi yi ka bas Babilon nɛ Aram dim soogianam la.’ Ala ka ti kpɛlim Jerusalem.”

12 Zugsɔb labaar da kɛn Jeremia ni na yɛt ye, 13 Zugsɔb onɛ an Paŋtita'ar Sɔb ka an Israel Wina'am la yɛl si'eli nwa ye, Kem yɛl Juda dim nɛ Jerusalem nidib ye, “Ya kʋ zamis ya'am ka siaki m nɔɔr yɛlʋgɔɔ?” Zugsɔb la yɛl si'em la. 14 Jonadab onɛ da an Rekab biig la zi'el o yaas nɔɔr ye ba da nu daam, ka ba siak ka dɔlli li, ban siaki ba yaab nɔɔr la zug. Amaa man pian' nɔɔr bɛdegʋ tisi ya ka ya pʋ siaki m nɔɔrɛ. 15 M lɛn tʋmi m tʋmtʋmnib banɛ an nɔdi'esidib la nɔɔr babiga. Ba yɛli ya ye, “Ya wʋsa yinne-yinne fɛndigimi ya suobɛ'ɛdnamin la ka tiaki ya tʋʋma; da dɔlli winsieba na'asidi baa. Lin ka ya na vʋe teŋ kanɛ ka m tis yanam nɛ ya yaanam la ni.” Amaa ya pʋ kɛlis bɛɛ wʋm tisi ma. 16 Jonadab yaas la dɔlisi ba yaab Rekab n zi'eli ba nɔsi'a la, amaa nimbama pʋ siaki m nɔɔrɛ.

17 “Dinzugɔ, Zugsɔb onɛ an Paŋtita'ar Sɔb ka an Israel Wina'am la yɛl si'eli nwa ye, ‘Kɛlisimi! M na kɛ ka tɔɔg kanɛ ka m yɛli zi'el la paae Juda nɛ Jerusalem dim wʋsa. M pian' tisi ba amaa ba pʋ kɛlisɛ; m buoli ba amaa ba pʋ siakɛ.’ ”

18 Jeremia da yɛl Rekab yidim la ye, “Zugsɔb onɛ an Paŋtita'ar Sɔb ka an Israel Wina'am la yɛl si'eli nwa, ‘Ya siaki ya yaab Jonadab ka siak o nɔzi'ela ka maal on yɛli ya si'el wʋsa. 19 Dinzugɔ, Zugsɔb onɛ an Paŋtita'ar Sɔb ka an Israel Wina'am la yɛl ye Jonadab onɛ an Rekab biig la kʋ kɔ'ɔŋ biribis banɛ na tʋmmi tisid mam.’ ”