Ban sa'al Zedekaya la yɛla
34
1 Babilon na'ab Nebukadnɛza nɛ o soogianam la wʋsa nɛ o sʋ'ʋlim la, nɛ o nimbanɛ ka o sʋ'oe la da zabid nɛ Jerusalem nɛ tempʋbanɛ giligi li la, labakaŋa da yi Zugsɔb la san'anɛ kɛn Jeremia san'an na ye, 2 “Zugsɔb onɛ an Israel Wina'am la yɛl si'eli nwa ye, Kem Juda na'ab Zedekaya san'anɛ yɛl o ye, Zugsɔb la yɛl si'eli nwa ye, M bɔɔd ye m nɔk tempʋkaŋa tis Babilon na'ab ka o nyu'oe li. 3 Fʋ kʋ nyaŋi zɔɔ yi ka o da gban'e fɔ amaa ba na ba'asi gban'e fʋ tis o. Fʋ na nyɛ Babilon na'ab nɛ fʋ mɛŋ nini. Fʋn nɛ on na kpa' taaba ka o pian' tisif, ka fʋ na keŋ Babilon.”4 La'am nɛ wala, kɛlisim, Zugsɔb la kaanb si'em ye fʋ Juda na'ab Zedekaya kʋ kpi zaba la nii. 5 Fʋ na kpinɛ baanlimm, wʋʋ fʋ yaanam banɛ da an na'anam ka kpi ka ba nyu'oe bugum na'asidi ba, ba kʋya ni si'em la, ala ka ba na nyu'oe fʋ kʋʋrin na'asif ka kaasi fʋ kʋʋr ye, “Oi, ti zugdaan gaad ya!” Mam mɛŋi kaanb nɔkaŋa. Zugsɔb la yɛl si'em la.
6 Nɔdi'es Jeremia da yɛl Juda na'ab Zedekaya lina wʋsa Jerusalem tempʋʋgin, 7 saŋkan ka Babilon na'ab soogianam la da nam bɛɛ ani zabid nɛ Lakis nɛ Azeka tempʋkpi'ema banɛ da nan kpɛlim Juda la.
Ziri yammis yɔlisim nyɛɛb la yɛla
8 Na'ab Zedekaya da maal nɔnaar nɛ Jerusalem dim ye ba mɔɔl yɔlisim yɛla tis yammis la, lin nya'aŋ ka Zugsɔb labaar kɛn Jeremia san'an na ye, 9 Li anɛ sɔ' wʋsa bas o yammʋg onɛ an Hibiru nid, ka an yamdaug bɛɛ yampu'ak wʋsa; sɔ' da mɔr o Hibiru tiraan ka o an yammʋg ya'asɛ. 10 Na'ayikpɛm la nɛ banɛ wʋsa da kpɛn'ɛsi ba mɛŋ nɔnaar nwa pʋʋgin la da siak ye ba na basi ba yamdaad nɛ ba yampu'ab la, ka kʋ lɛm mɔri ba ka ba an yammisɛ. Ba da siakya ka basi ba. 11 Amaa li nya'aŋ ka ba tiaki ba pʋtɛnda ka lɛm gban'e ba ya'as.
12 Ka Zugsɔb labaar kɛn Jeremia san'an na ye, 13 Zugsɔb la yɛl si'eli nwa ye, Zugsɔb onɛ an Israel Wina'am la yɛl ye, M da maal nɔnaar nɛ ya yaanam man da mɔri ba yi Egipt na, ya sankpan'asim pʋʋgin la. Ka yɛl ye, 14 “Yʋma ayɔpɔi wʋsa ya na basi ya Hibiru tiraan onɛ kuos o mɛŋi tisi ya. O ya'a tʋm tisif yʋma ayuobʋ, asɛɛ ka fʋ kɛ ka o keŋ.” Ya yaanam da pʋ kɛlisid bɛɛ wʋmmi m pian'adɛ. 15 Yanamɛ tiaki tʋm linɛ an sʋm m san'an la li pʋ yuugɛ. Ya wʋsa yinne-yinne siak ye ya basi ya taaba la. Hali ya maal nɔnaar nɛ mam yikanɛ ka m Yʋ'ʋr bɛ la ni. 16 Amaa ya lɛn fɛndigi san'amidi m yʋ'ʋr; ya wʋsa yinne-yinne lɛn lɛbi gban'e ya yamdaad nɛ yampu'ab banɛ ka ya daa bas ye ba kem ban bɔɔd zin'isi'a la. Ya mugusi ba ka ba lɛn aan ya yammis ya'as.
17 Dinzugɔ, Zugsɔb la yɛl si'eli nwa ye: Ya pʋ siaki m nɔɔrɛ; ya zan'as ya ka pʋ mɔɔl yɔlisim yɛla tisi ya taaba la. Alazugɔ, m na mɔɔl “yɔlisim” yɛla tisi ya, Zugsɔb la yɛl si'em la, yɔlisim linɛ ka ya na kpi zaba ni, nɛ ban'abɛ'ɛd, nɛ kɔ'ɔm. M na kɛ ka dunia sʋ'ʋlim wʋsa nyɛɛ ya nyan. 18 Nidib banɛ san'ami m nɔnaar ka pʋ dɔlisid zi'ela banɛ ka m tisi ya la, m na buaki ya zin'isa ayi' wʋʋ na'abil ka ba ɛɛn buak zin'isa ayi' ka dɔlli li sʋʋginɛ gaad si'em la. 19 Juda nɛ Jerusalem tuongatib nɛ na'ayikpɛm nɛ maanmaannib nɛ teŋ la nidib wʋsa banɛ dɔl na'abil ni'im la sʋʋgin gaad la, 20 m na nɔki ba tisi ba dataas banɛ mɔɔd ye ba kʋʋ ba la. Ba niŋgbina la na kilim diibi tis niis banɛ ian'ad agɔla nɛ bʋnkɔnbid banɛ bɛ teŋgbauŋ la zug la.
21 M na nɔk Na'ab Zedekaya nɛ o na'ayikpɛm la tisi ba dataas banɛ mɔɔd ye ba kʋʋ ba la; m na nɔki ba tis Babilon soogianam la'am nɛ bam pʋ lɛn zabid nɛ ya la. 22 Zugsɔb la yɛl ye, M bɔɔd ye m tis nɛ nɔɔr, ka mɔri ba lɛb teŋ kaŋa ni na. Ba na zab nɛ teŋ la faaɛn li, ka nyu'oe li. M na kɛ ka Juda tempʋʋs la lieb dabɔɔd ka sɔ' kʋ lɛm bɛɛ ani ya'asɛ.