Zugsɔb la zi'el nɔsi'a la yɛla
33
1 Jeremia n da nam bɛ banɛ gur na'ayir la zakin la, ka Zugsɔb labaar lɛn kɛɛn o san'an na paas nɔɔr ayi' ya'as ye, 2 “Zugsɔb la yɛl si'eli nwa ye, Zugsɔb onɛ maal teŋgbauŋ wʋsa, ka ya'abi li zi'el la, o yʋ'ʋri an Zugsɔb: 3 ‘Buolimi ka m na siak ka yɛli ya yɛlsu'ada linɛ ka ya zi'isigɛ.’ ” 4-5 Zugsɔb onɛ an Israel Wina'am la yɛl si'eli nwa ye, Gɔsima, ba da'ae ya' banɛ bɛ tempʋʋgin la nɛ na'ayir linɛ bɛ Juda la bas ye ba nɔki gu' Babilon dim ka ba da nyaŋi kpɛn' na zab nɛ ba. Amaa m sʋnpɛɛn la pʋʋgin nimbanɛ ka m na kʋ la na yadigi pɛ'ɛl ya' la nɛ zin'ig la wʋsa. M na bid tempʋkaŋa kudugʋ ba tʋʋmbɛ'ɛd la zug.6 La'am nɛ wala, m na mɔr ti'ebʋg nɛ laafi kenna; m na ti'ebi m nidib ka kɛ ka ba nyɛ sumbʋgʋsʋm nɛ yɔlisim bɛdegʋ ka na zin' ka dabiem kae. 7 M na yis Juda nɛ Israel dim sankpan'asim pʋʋgin mɔri ba lɛb na, ka na kɛ ka ba lɛm mɔr kpi'euŋ wʋʋ ban daa an si'em la. 8 Tʋʋmbɛ'ɛd linɛ ka ba tʋm pɔ'ɔgim la wʋsa m na pie li ka ba an nyain, ka kɛɛ ba taali bas. 9 Ala ka tempʋkaŋa na kɛ ka m yʋ'ʋr dʋ, m na mɔr sumalisim nɛ na'asi buudi wʋsa san'an, banɛ wʋsa wʋm tʋʋm sʋma linɛ ka m ye m maali tis teŋ kaŋa la; li na paki ba, ka ba na kirid nɛ dabiem man maali ba sʋ'ʋm nɛ sumbʋgʋsʋm linɛ ka m tisi ba la yɛla.
10 Zugsɔb la yɛl si'eli nwa ye, ya yɛt teŋ kaŋa yɛla ye, teŋ la san'am nɛ ka nidib bɛɛ bʋnkɔnbid lɛn kae. La'am nɛ wala Juda tempʋʋsin nɛ Jerusalem suoraad banɛ ka ba bas ka nid bɛɛ bʋnkɔnbid pʋ lɛn dɔl la, ba na lɛn wʋm tʋkpiidʋgʋ li pʋʋgin ya'as. 11 Ya na wʋm ka pu'apaala nɛ ba sidib maan sumalisim nɛ banɛ mɔr bareka pʋ'ʋsim piini ken Zugsɔb la Yin na yɛt ye,
“Pʋ'ʋsimi Zugsɔb onɛ an Paŋtita'ar Sɔb la bareka
on an sʋm la zug;
o nɔŋilim la bɛ nɛ saŋa linɛ ka' bɛnnɛ.”
M na lɛbis zusʋŋ kanɛ ka teŋ la daa pʋn mɔr la. Zugsɔb la pian' li.
12 Zugsɔb onɛ an Paŋtita'ar Sɔb la yɛl si'eli nwa ye, “Zin'ikaŋa ka nidib bɛɛ bʋnkɔnbid lɛn kae la, li tempʋʋs la mɔɔd bɛɛ yaama na lɛm bɛ ka kɔnbkemnib na mɔri ba kɔnbidi kena. 13 Tempʋbanɛ bɛ kʋkʋna teŋ, linɛ bɛ Sefela nɛ linɛ bɛ Negef nɛ Benjamin sʋ'ʋlimin la nɛ teŋkpɛmis banɛ gilig Jerusalem nɛ tempʋbanɛ bɛ Juda la, ani ka kɔnbid na lɛn gaad onɛ kaannɛ ba la nu'usin.” Zugsɔb la pian' li.
14 Zugsɔb la yɛl ye, “Dabisa kenna,” ka m na maal nɔsʋŋ kanɛ ka m kaanbi zi'el Israel nɛ Juda dim la.
15 “Dabisban la ni, nɛ saŋa kan la,
m na kɛ ka pʋpiel duoe David yaasin la na;
O na tʋm linɛ an sʋm nɛ sida teŋ la zug.
16 Dabisbama ni ka Juda na paam yɔlisim
ka Israel na bɛ nɛ sumbʋgʋsʋm.
Ban na buon o yʋ'ʋsi'a nwa,
Zugsɔb Onɛ aan Ti Pʋpielim Sɔb la.”
17 Zugsɔb la yɛl si'eli nwa ye, “David kʋdim kʋ kɔ'ɔŋ biribiŋ ka o zin'inɛ o na'am gbauŋ la zug Israel dim la sʋʋginɛ, 18 bɛɛ Levi dim banɛ an maanmaannib la kɔ'ɔŋ biribiŋ ka o na zi'enɛ m tuon saŋa wʋsa maal nyu'or maan nɛ zʋʋd maan nɛ maana wʋsa.”
19 Ka Zugsɔb la labaar kɛn Jeremia san'an na ye, 20 “Zugsɔb la yɛl si'eli nwa, ‘Ya ya'a na nyaŋi san'am nɔnaar kanɛ ka m kɛ ka yʋ'ʋŋ nɛ nintaŋ bɛ la ka kɛ ka li kʋ lɛn nyaŋi bɛɛ li saŋaa, 21 ala ka m nɔnaar kanɛ ka m maal nɛ m tʋmtʋm David nɛ nɔnaar kanɛ ka m maal nɛ Levi dim ka ba an maanmaannibi bɛɛ m tuonnɛ tʋm la na san'am, ka David mɛ kʋ lɛm mɔr yaaŋ ka o na zin'inɛ o na'am gbauŋ la zugɔ. 22 M na kɛ ka m tʋmtʋm David yaas nɛ Levi dim banɛ tʋmmi tisidi m la yaas kʋ mɔr kallɛ, ba na nwɛnɛ nwadbibis banɛ bɛ saŋgbauŋin la ka nwɛnɛ atɛuk nɔɔrin titanbin'isi an si'em la.’ ”
23 Zugsɔb labaar la da kɛn Jeremia san'an na ye, 24 “Fʋ pʋ baŋ ye nimbama nwa yɛt ye, ‘Zugsɔb la zan'as sʋ'ʋlim ayi' banɛ ka o gaŋ nwaa?’ Ala ka ba nɛ'ɛsidi m nidib la ye ba ka' buudi, ka pʋ nannɛ baa. 25 Zugsɔb la yɛl si'eli nwa ye, ‘M ya'a pʋ maalinɛ m nɔnaar nɛ nintaŋ nɛ yʋ'ʋŋ ka zi'el wada tis agɔla nɛ teŋgbauŋɔ, 26 alazug m naanɛ zan'as Jakob yaas nɛ m tʋmtʋm David, ka kʋ gaŋ o yaas la yinne ka o an Abraham nɛ Isaak nɛ Jakob yaas la na'aba. M na lɛbisi ba zusʋŋ la ka yisi ba sankpan'asim pʋʋginɛ lɛbis na ka zɔɔ ba nimbaanlig.’ ”