<<    <     Jeremia     32     >    >> 
Jeremia da' pɔɔg la yɛla
32
1 Nɛ'ɛŋa an labakanɛ yi Zugsɔb la san'anɛ kɛn Jeremia ni na, Zedekaya da di o na'am la li yʋʋm piiga saŋa la, mɛ da anɛ Nebukadnɛza n da dii o na'am la li yʋʋm pii nɛ anii saŋa. 2 Lin saŋa ka Babilon na'ab zabzabidib la da kena gilig Jerusalem, ka vi' Nɔdi'es Jeremia lɛbis banɛ gur Juda na'ayir la zakin. 3 Juda na'ab Zedekaya da kpɛn'ɛs o sanrega anina ka ye, “Bɔzug ka fʋ di'esid Wina'am pian'adi yɛt ala? Fʋ yɛl ye, Zugsɔb la yɛl ye, M na kɛ ka Babilon na'ab faaɛn tempʋkaŋa. 4 Juda na'ab Zedekaya kʋ nyaŋi yi Babilon dim nu'usinɛ, amaa ba na gban'e o tis Babilon na'ab ka o na nyɛɛ o nɛ o mɛŋ nini, ka ba nindaa kpa' taaba ka o pian' tis o. 5 O na mɔr Zedekaya keŋ Babilon teŋin, ka o na kpɛlim anina hali ka m maal o mam bɔɔd si'em paae li bɛn. Fʋ ya'a zab nɛ Babilon dim la fʋ kʋ nyaŋi baa.” Zugsɔb la pian'ʋkʋ la.
6 Jeremia da yɛl ye, “Zugsɔb labaar kɛɛn m san'an na ye, 7 Hanamel onɛ an Sallum biig ka aan fʋ ba'apit biig la na kɛɛn fʋ san'an na yɛl ye, Da'ami m pɔɔg kanɛ bɛ Anatof teŋin la, bɔzugɔ fʋn kpin nɛ man la fʋ mɔr suokanɛ na da' li.” 8 Nwɛnɛ Zugsɔb la yɛl si'em la, m ba'apit biig Hanamel sid kɛɛn m san'an na zakin la ka yɛl ye, Da'ami m pɔɔg linɛ bɛ Anatof teŋin, Benjamin sʋ'ʋlimin la. Fʋn sadigim mɔr suori na da' li sʋ'oe la, da'ami lii fʋ mɛŋ. Ani ka m baŋ ye li anɛ labaar kanɛ yi Zugsɔb la san'an na; 9 ka m sid da' pɔɔg linɛ bɛ Anatof teŋin la m ba'apit biig Hanamel san'an ka mak anzurifa ka li tɛbisim zemisi li bɛn. 10 Ka m tik nu'ug ka tabil gbauŋ la lɛbis, ka kɛ ka kasɛtib maligim mak anzurifa la tɛbisim. 11 Ka m nɔk man da'ab gbana linɛ tabil ka pa'an da'ab la suor nɛ li zi'ela wʋsa, nɛ linɛ pʋ tabilɛ 12 ka zaŋi li tis Baruk onɛ an Neraya biig ka an Mahiseya yaaŋ la, ka m ba'apit biig Hanamel bɛɛ ani nɛ kasɛtib banɛ tiki ba nu'us gbauŋʋn la, nɛ Juda dim wʋsa ka ba zin' banɛ gur la zakin.
13 Ba san'an ka m tis Baruk nɔkaŋa: 14 “Zugsɔb onɛ an Paŋtita'ar Sɔb ka an Israel Wina'am la yɛl ye, ‘Nɔkim pɔɔg la da'ab gbana, linɛ tabil la nɛ linɛ pʋ tabil la, su yʋʋrin ka li na bɛɛ ani yuug.’ 15 Zugsɔb onɛ an Paŋtita'ar Sɔb ka an Israel Wina'am la yɛl si'eli nwa ye, ‘Ba na lɛn da' ya' nɛ pɔɔd nɛ tiis pɔɔd teŋ kaŋa ni.’ ”
16 Man nɔk pɔɔg la da'ab gbauŋʋ tis Baruk onɛ an Neraya biig la li nya'aŋ, ka m sɔs Zugsɔb la ye,
17 “Aa, m Zugsɔb Wina'am, fʋnɛ maal saŋgbana nɛ teŋgbauŋ nɛ fʋ mɛŋ paŋ tita'ar nɛ fʋ nu'ug kanɛ wa'am la. Si'el kae tɔi tisi fɔ. 18 Fʋ pa'annɛ fʋ nɔŋilim nɛ nidib tusa-tusa, amaa ka lɛɛ namisid tʋʋmbɛ'ɛd dim banɛ kpi la biis ba saamnam yɛla. O Wina'am kanɛ zu'oe ka mɔr paŋ hali, fʋn ka fʋ yʋ'ʋr an, Zugsɔb onɛ an Paŋtita'ar Sɔb la, 19 fʋ gban'ar zu'oya, ka fʋ tʋʋma an tʋʋm bɛda. Fʋ nini laki gɔsid ninsaalib wʋsa suoya; fʋ yɔɔd sɔ' wʋsa nɛ o itʋŋ nɛ o tʋʋma nar ye o di'e si'em. 20 Fʋ da tʋm nyalima nɛ zanbina Egipt teŋin ka nan kpɛn tʋmmi li paae zina, fʋ tʋmmi li Israel dim nɛ nidib wʋsa sʋʋgin, ka di'e yʋ'ʋr linɛ nan kpɛn aan fʋ din. 21 Fʋ tʋm zanbina nɛ tʋʋmnyalima m mɔri fʋ nidib Israel dimi yi Egipt teŋin na, fʋ da tiɛn fʋ nu'ug kpi'euŋ nɛ nu'ug kanɛ mɔr paŋ hali ka mɔr dabiem la. 22 Fʋ da pɔɔ zi'eli ba yaanam la ye fʋ na tisi ba teŋ kanɛ pʋbid bin'isim nɛ siind, ka sid tisi ba. 23 Ba kena kpɛn' sʋ'ʋgi li, amaa ba pʋ siaki fʋ nɔɔr bɛɛ dɔlisi fʋ wada laa; ba pʋ maal fʋn yɛli ba ye ba maal si'el laa, ala ka fʋ kɛ ka tɔɔg kaŋa wʋsa paae ba.
24 Gɔsim ban mɛɛ gilig tempʋʋg la si'em bɔɔd ye ba faaɛn li. Li anɛ zaba nɛ kɔ'ɔm nɛ ban'as zug ka Babilon dim banɛ zabid la sid na faaɛn li. Fʋn yɛl si'el la sid maal ya, wʋʋ fʋn nyɛɛ li si'em nannanna la. 25 La'am nɛ Babilon dimi na faaɛn teŋ la, fʋn onɛ an Paŋtita'ar Sɔb la yɛlim ye, ‘Da'am pɔɔg la nɛ anzurifa ka kɛ ka nidib dii li kasɛt.’ ”
26 Ka Zugsɔb labaar kɛn Jeremia san'an na ye, 27 Manɛ an Zugsɔb onɛ an nidib wʋsa Wina'am la. Si'el bɛɛ tɔi tis mam? 28 Dinzugɔ, Zugsɔb la yɛl si'eli nwa ye, M na nɔk teŋ kaŋa tis Babilon dim nɛ Babilon na'ab Nebukadnɛza ka o sʋ'ʋgi li. 29 Babilon dim banɛ zabid nɛ tempʋkaŋa la na kpɛn' na nyu'oe li nɛ bugum; la'am nɛ ya' banɛ ka nidib nyɔ'ɔd bʋnnyubisa dɔɔd zugʋ tisid Baal ka basid ku'om tisid winsieba ka li duodi m sʋʋnr la.
30 Israel nɛ Juda dim pʋ tʋm bʋnsʋŋ man san'anɛ, asɛɛ bɛ'ɛd ma'aa, lin pin'ili ba biilimin sa, Israel dim la pʋ tʋm si'ela, amaa ba duodi m sʋʋnr nɛ ba nu'usi maan si'el la, Zugsɔb la yɛl si'em la. 31 Lin yi daakanɛ ka ba mɛɛ li la paae nannanna, tempʋkaŋa duoe m sʋʋnr ka m sʋʋnr pɛlig hali ka li nar ye m san'ami li. 32 Israel nɛ Juda nidib la duoe m sʋʋnr hali nɛ bɛ'ɛd linɛ ka ba tʋm la, ban nɛ ba na'anam nɛ ba na'ayikpɛm, ba maanmaannib nɛ ba nɔdi'esidib, Juda dim nɛ Jerusalem nidib wʋsa. 33 Ba fɛndigi bidim kudug ka pʋ kpa'am nɛ ba nindaa, la'am nɛ man pa'ali ba ka maligim pa'ali ba la, ba pʋ kɛlis bɛɛ di'e m sa'alʋgɔ. 34 Ba ba'a ba bada linɛ an bʋnkisa la yikanɛ ka man Yʋ'ʋr bɛ la ni, kɛ ka li lieb dian'ad. 35 Ba mɛ Baal teŋgbana zin'ig Ben Hinnom Biis Bɔn'ɔgin la, ye ba mɔri ba biribis nɛ ba bipumisi maan maana nyu'od bugum tisid win Molek, mam mɛŋ pʋ tisi ba nɔɔr bɛɛ li bɛɛ m pʋtɛn'ɛrin ye ba na maal yɛlkisʋg kaŋa buudi kɛ ka Juda tʋm tʋʋmbɛ'ɛdɛ.
36 Ya yɛt tempʋkaŋa yɛla ye, “Li anɛ zaba nɛ kɔ'ɔm nɛ ban'as zug ka Babilon dim banɛ zabid la na faaɛn li.” Amaa Zugsɔb onɛ an Israel Wina'am la yɛl si'eli nwa ye, 37 M sid na la'asi ba tembanɛ ka m sʋnpɛɛn kɛ ka m widigi ba kpɛn'ɛs la ka na mɔri ba lɛb kpɛla na ka ba bɛ nɛ yɔlisim. 38 Ba na aan m nidib ka man mɛ na aan ba Wina'am. 39 M na tisi ba pʋtɛn'ɛr yinne ka ba na zɔtim, ba mɛŋ nɛ ba biis banɛ na dɔlli ba nya'aŋ la sʋ'ʋm yɛla. 40 M na maal nɔnaar linɛ kʋ mɔr naar nɛ ba, m kʋ bas sʋ'ʋm maalʋgɔ, ka lɛɛ na kpɛn'ɛsi ba siig kanɛ na kɛ ka ba na zɔtim, ala ka ba kʋ fɛndig ka basi ma. 41 Li na mɔrim malisim hali, nɛ man na tʋm sʋ'ʋm tisidi ba, ka na zin'ili ba teŋ kaŋa ni nɛ m sʋnf wʋsa.
42 Zugsɔb la yɛl si'eli nwa ye, Nwɛnɛ man mɔr tɔɔgʋ kɛn bama zugin na si'em la, ala ka m na maal yɛlsʋma banɛ ka m zi'el nɔɔr ye m na tisi ba la.
43 Ba na lɛn da'ad pɔɔd teŋ kaŋa ni, zin'ikanɛ ka ya yɛl ye, “Teŋ la san'am nɛ ka nidib nɛ bʋnkɔnbid lɛn kae, Babilon dimi faaɛn li la zug.” 44 Ba na nɔk anzurifa ligidi da' pɔɔd, ka ba na tik nu'ug, ka kasɛtib na bɛ Benjamin sʋ'ʋlimin nɛ teŋkpɛmis banɛ gilig Jerusalem la, Juda tempʋʋsin nɛ tempʋbanɛ bɛ Sefela nɛ linɛ bɛ Negef la, bɔzugɔ m yisi ba zutɔɔg la, ka yisi ba sankpan'asim pʋʋgin lɛbis na. Zugsɔb la yɛl si'em la.