Israel dim kulig la na yɛla
31
1 Zugsɔb la yɛl ye, “Li saŋa ya'a ti paae, M na an Israel dɔɔd la wʋsa Wina'am, ka ban na aan m nidib.”2 Zugsɔb la yɛl si'eli nwa ye:
“Nidib banɛ vʋ'ʋg ka pʋ kpi zaba ni la
na nyɛ nimbaanlzɔɔr sian'arin la.
M na kena tis Israel dim vʋ'ʋsʋm.”
3-4 Saŋa kanɛ gaad la, Zugsɔb la da nie o mɛŋi ti san'an ka yɛl ye,
“Israel dimaa, ya nwɛnɛ pu'asadir nɛ tisim:
m nɔŋi ya ka m nɔŋilim la kʋ mɔr naarɛ;
m vɛ'ɛgi ya li'eli m san'an nɛ nɔŋilim tita'ar.
Israel dimaa, m na lɛm mɛɛ ya ya'as
ba na lɛbisi ya mɛ'.
Ya na lɛn nɔki ya siyada la
yi yiŋi wa'ad nɛ sumalisim.
5 Ya na lɛn sɛ vain tiis Samaria zuoya la ni;
kpaadib la na sɛɛ ba ka dii ba wala.
6 Dabisir kenna ka banɛ gur la na kaas kuŋ
Efiram kʋkʋna la ni ye,
‘Kemi na, kɛlli ka ti keŋ Zion,
ti Zugsɔb Wina'am la san'an!’ ”
7 Zugsɔb la yɛl si'eli nwa:
“Yʋ'ʋmmi nɛ sumalisim tis Jakob;
tansimi bɛdegʋ tis sʋ'ʋlim kanɛ gat sʋ'ʋlim wʋsa la.
Kɛl ka ba wʋmi ya zun'or ka yɛl ye,
‘O Zugsɔba, faanmi fʋ nidib,
Israel dim banɛ kpɛlim la.’
8 Gɔsima, m na mɔri ba yi ya-datiuŋ na
ka la'as banɛ bɛ dunia kpikpɛmis la na.
Ba sʋʋgin la zʋnzɔɔs nɛ pɔnda na bɛ,
pu'apʋʋs nɛ banɛ sa'ae;
ba na lɛb na lieb buudi bɛdegʋ.
9 Ba na kena nɛ kukuma;
m ya'a mɔri ba lɛbid na
ba na sɔsid man Wina'am suguru.
M na mɔri ba dɔlis ku'om zin'ig,
zin'ikanɛ an sassi ka ba kʋ tu'ugi ba nɔbirɛ,
bɔzugɔ man anɛ Israel dim saam
ka Efiram aan m bikpɛɛm.”
10 Buudi wʋsa, wʋmmi Zugsɔb la labaar;
mɔɔlim tisi tɛɛns banɛ lal ka bɛɛ atɛuk nɔɔrin la:
“Onɛ widig Israel dim la na lɛn la'asi ba na
ka na guri ba wʋʋ kɔnbkemmi gur o kɔnbid si'em la.
11 Mam Zugsɔb la na tis Jakob nidib la yɔlisim
ka faaɛn ba yis banɛ paŋi zu'oe gaadi ba la nu'usin.
12 Ba na kena yʋ'ʋm nɛ sumalisim Zion zuor la zug;
ba na maal sumalisim Zugsɔb la tisi ba piini
linɛ an zʋʋd nɛ danpaalig nɛ kpaam
nɛ kɔnbid nɛ na'abibis la zug.
Ba na nwɛnɛ lɔmbɔn'ɔg kanɛ ka ba dɔn'ɔnsid sʋ'ʋŋa,
ka ba kʋ mɔr sʋnsa'aŋ ya'asɛ.
13 Pu'asada la na wa'ad nɛ sumalisim,
la'am nɛ na'akim nɛ bʋnkʋt wʋsa.
M na tiaki ba kukuma ka li lieb sumalisim;
M na yisi ba sʋnsa'aŋ la ka bʋgʋli ba sʋnya.
14 M na tis maanmaannib la diib bɛdegʋ,
ka m nidib la na nyɛ m piini bɛdegʋ,”
Zugsɔb la yɛl si'em la.
15 Zugsɔb la yɛl si'eli nwa ye,
“Ba wʋm sɔ' kʋkɔr Rama teŋin
ka o kaasid ka fabin ka kum kʋʋr kukuma,
Ka li anɛ Rakɛl n kaasid o biis la yɛla
ka pʋ siakid bɛliŋɔ,
bɔzugɔ o biis la kae.”
16 Zugsɔb la yɛl si'eli nwa ye:
“Gu'om ka da kaasida
ka duusi fʋ ninta'am,
ka ba na yɔɔ fʋ, fʋ tʋʋma la yɛla,”
Zugsɔb la yɛl si'em la.
“Ba na yi dataas la teŋin lɛb na.
17 Alazugɔ fʋ mɔr ti'ir bɛog sa,
fʋ biis la na lɛbi ba mɛŋ teŋin na.”
Zugsɔb la yɛl si'em la.
18 “M sid wʋm Efiram fabinnɛ yɛt ye,
‘Fʋ namisim wʋʋ na'abil kanɛ gɛɛm nɛ,
ka m sid siaki li.
Lɛbisimim na, ka m na lɛb,
bɔzugɔ, fʋnɛ aan m Zugsɔb Wina'am.
19 Man daa yidig la nya'aŋ
m daa tiak ka lɛb na.
Man yʋ'ʋn daa gban'e li gbin la,
ka bibigi m nyɔ'ɔg
m daa di nyan hali ka m zug zi
bɔzugɔ m biilimin nyan la daa paae m.’
20 Efiram ka'anɛ mam mɛŋ biig
ka an bikanɛ ka m nɔŋaa?
La'am nɛ man pian'ad o yɛla bɛ'ɛd la,
m nan kpɛn tɛnri o yɛla.
Dinzugɔ m sʋnf nan bɔɔd o yɛla;
m zɔt o nimbaanlig hali.”
Zugsɔb la yɛl si'em la.
21 “Sɛɛm zanbina suorin la!
Zi'elim linɛ pa'an suor!
Kpansim suoraug la,
suokanɛ ka fʋ dɔl la.
Lɛm na, O Israel onɛ nwɛnɛ pu'asadirɛ,
lɛmmi fʋ tempʋʋsin la na.
22 Bʋndaar ka fʋ na bas giligirɛ,
fʋn bipuŋ kanɛ ka' sida sɔba?
Zugsɔb la na maal bʋmpaal teŋgbauŋ la zug,
ka pu'a yʋ'ʋn na gu'ud dau.”
23 Zugsɔb onɛ an Paŋtita'ar Sɔb, ka an Israel Wina'am la yɛl ye, “M ya'a ti yisi ba sankpan'asim la ni lɛbis na, ka lɛbisi ba zusʋŋ la na, nimbanɛ bɛ Juda teŋin nɛ li tempʋʋsin la na lɛm pian' pian'abama ya'as ye,
“Zugsɔb na niŋif bareka,
zuokanɛ an kasi,
ka an pʋpielim sɔbaa!
24 Nidib na la'asi bɛ Juda nɛ li tempʋʋsin la, kpaadib nɛ banɛ kemmi ba kɔnbidi giligid la na bɛ. 25 M na kpɛ'ɛŋ banɛ tadig la ka diis banɛ vibid kɔ'ɔm la ka ba tig.”
26 Man wʋm nɛ'ɛŋa la, ka duoe gɔsi gilig, ka gbɛɛm la malisi tisim.
27 Zugsɔb la daa yɛl ye, “Dabisa kenna, ka m na kɛ ka Israel nɛ Juda zi'en sʋ'ʋŋa, ka nidib nɛ bʋnkɔnbid na bɛɛ ba tɛɛnsin la. 28 Nwɛnɛ m vɔɔn ba nɛ ka nwa'a ba bas, ka san'ami ba ka mɔr tɔɔgʋ kɛɛn ba zugin na la, ala ka m na guri ba ka lɛbisi baa mɛ' ka sɛɛ ba.” Zugsɔb la yɛl si'em la. 29 “Dabisban la ni nidib kʋ lɛn siilim ye,
“Ba'anam ɔnb kekama, ka li nwɛlig biis sʋnfɔ.
30 Sɔ' wʋsa lɛɛ na kpiid nɛ o mɛŋ tʋʋmbɛ'ɛd yɛla; onɛ wʋsa ɔnb kekammi'isa na kpinɛ o mɛŋ kum.”
31 Zugsɔb la yɛl ye
“Dabisa kenna, ka m na maal nɔnapaal
nɛ Israel dim nɛ Juda dim la.
32 Li kʋ nwɛnɛ nɔnaar
kanɛ ka m da maal nɛ ba yaanam
man da gban'e ba nu'ug
ka mɔri ba yi Egipt teŋin la baa bi'elaa,
bɔzugɔ, ba da san'ami m nɔnaar la,
la'am nɛ man da mɔri ba,
wʋʋ dau mɔr o pu'a si'em la.”
Zugsɔb la yɛl si'em la.
33 “Nɛ'ɛŋa an nɔnaar kanɛ ka m na maal nɛ Israel dim la, li nya'aŋ m na nɔki m wada la niŋi ba sʋnya ni wʋʋ ban sɔbidi niŋid gbauŋʋn si'em la.
“M na aan ba Wina'am
ka ba mɛ na aan m nidib.”
Zugsɔb la yɛl si'em la.
34 “Sɔ' kʋ lɛm pa'al o tiraan
bɛɛ o ba'abiig ye, ‘Baŋim Zugsɔb la!’
Bɔzugɔ ba wʋsa na baŋim,
lin yii ba biisin paae ba kpɛɛmnamin,
bɔzugɔ m na kɛɛ ba tʋʋmbɛ'ɛd la wʋsa bas
ka kʋ lɛn tiɛn li yɛla ya'as baa bi'elaa.”
Zugsɔb la yɛl si'em la.
35 Zugsɔb la yɛl si'eli nwa ye,
onɛ maal winnig
ka li nie nintaŋ la,
onɛ pian' ka nwadig nɛ nwadbibis zi'en
ka tisid nɛɛsim yʋ'ʋŋ,
onɛ gudigid Atɛuk
ka li ku'onwiis dammid la
o yʋ'ʋri buon Zugsɔb onɛ an Paŋtita'ar Sɔb.
36 Zugsɔb la yɛl ya ye, “Bama nwa ya'a ti pʋ lɛm bɛ nwɛnɛ din nar si'em,
Israel yaas la mɛ na bɔdig
ka kʋ lɛn an buudi m san'anɛ.”
37 Zugsɔb la yɛl si'eli nwa ye,
“fʋ ya'a na nyaŋi mak saŋgbana la
ka kpɛn' teŋ teŋir vɛɛns teŋgbauŋ ɛɛnbir la,
ala ka mam mɛ na zan'as Israel yaas
ban maal si'el wʋsa la zug.”
Zugsɔb la yɛl si'em la.
38 Zugsɔb la yɛl ye, “Dabisa kenna, ka ba na lɛbisi mɛ' tempʋkaŋa tisim, lin yi Hananɛl Girimbisa la ni keŋ paae Gɔnligir Zin'ig Za'anɔɔr la. 39 Nwiig kanɛ ka ba mɔri makid la na pin'il anina tiɛn paae Gareb zuorin la gɔnligi keŋ Goa. 40 Bɔn'ɔg la wʋsa, zin'ikanɛ ka ba lɔbid ninkpiilima nɛ tampɛligim la, nɛ linɛ dɛn'ɛni keŋ Kidron bɔn'ɔg nya'aŋ la, keŋ paae Widi Za'anɔɔr gɔnligirin la, na anɛ kasi tis Zugsɔb la. Tempʋʋg la kʋ lɛn san'am bɛɛ ba nwa'ae li basɛ.”