Israel dim lɛbig la na yɛla
30
1 Labakaŋa yi Zugsɔb la san'anɛ kɛn Jeremia ni na: 2 “Zugsɔb onɛ an Israel Wina'am la yɛl si'eli nwa ye, Sɔm man yɛlif pian'asieba la wʋsa niŋ gbauŋʋn. 3 Zugsɔb la yɛl ye, ‘Dabisa kenna, ka m na mɔri m nidib Israel nɛ Juda dim banɛ ka ba gban'e lɔ'ɔŋ teŋ zʋŋ la lɛbis na. Ka ba na lɛb na zin'in teŋ kanɛ ka m da tisi ba yaanam la.’ ”“Dabiem kuŋ kaasig ka ba wʋm,
li anɛ dabiem ka ka' sumbʋgʋsʋm.
6 Bu'osim ka gɔs:
dau na nyaŋi du'a biisɛɛ?
Ka bɔ ka m nyɛ ka dau kanɛ mɔr paŋ wʋsa zin'
ka o nu'us bɛɛ o pɔɔrin wʋʋ pu'a sa'ae,
ka ba nindaas wʋsa nwɛɛgida?
7 Dabiskan la tɔɔgʋ na an si'em la!
Dabisir kʋ lɛm bɛɛ nwɛnɛ li ya'asɛ.
Li na anɛ yɛla saŋa tis Jakob nidib,
amaa m na faaɛn ba li pʋʋgin.”
8 “Dabiskan la daar,” Zugsɔb la yɛl si'em la,
“m na kɔ'ɔg yu'asindaug linɛ bɛɛ ba niŋgɔnya ni la
ka na kɛns bana linɛ lɔɔ ba la;
saam kʋ lɛn kɛ ka ba an yammis ya'asɛ.
9 Ka ba yʋ'ʋn na tʋm tisi ba Zugsɔb nɛ ba Wina'am
nɛ David onɛ aan ba na'ab
onɛ ka m na tisi ba la.
10 Alazugɔ, m tʋmtʋm Jakob nidibaa, da zɔti dabiem;
da kɛ ka li paki ya, Israel dima.”
Zugsɔb la yɛl si'em la.
“M sid na faaɛn ya tɛɛns banɛ lal la ni na,
nɛ ya yaas banɛ ka ba mɔri lɔ'ɔŋ teŋ la.
Jakob nidib la yʋ'ʋn na mɔr sumbʋgʋsʋm ka zin' baanlimm,
ka sɔ' kʋ lɛm kpɛn'ɛsi ba dabiem ya'asɛ.
11 M bɛ nɛ ya ka na faaɛn ya.” Zugsɔb la yɛl si'em la.
“La'am nɛ man san'am buudi wʋsa
banɛ ka m widigi ya kpɛn'ɛs la,
m kʋ san'am yanam nyainnɛ.
M na namisi ya amaa ka kɛ ka li dɔlli li suor;
ka kʋ kɛ ka ya keŋ zaalim-zaalim
ka pʋ di'e namisʋg baa bi'elaa.”
12 Zugsɔb la yɛl si'eli nwa ye,
“fʋ sapu'ad la ka' ti'ebʋgɔ,
fʋn pu'alim si'em la ka' bɔdigirɛ.
13 Sɔ' kae na nwɛ' nu'ugʋ fʋ yɛlaa,
fʋ fɛn'ʋg la ka' tiim,
fʋ ka' laafi nyɛɛbɔ.
14 Fʋ taaba la wʋsa tami fʋ yɛla;
ba ba'a ka' nɛ fɔ.
M nwɛ'ɛf wʋʋ dataa na nwɛ'ɛf si'em
ka namisif wʋʋ bugusim sɔb nɛ,
fʋ tʋʋmbɛ'ɛdi zu'oe ka ka' bɛn la zug.
15 Bɔ ka fʋ kaasidi fʋ pu'alʋŋ,
linɛ zabid ka pʋ mɔr ti'ebʋg la yɛla?
Fʋ tʋʋmbɛ'ɛdi zu'oe ka pʋ mɔr bɛn la zug
ka m tʋm nɛ'ɛnamɛ tisif.
16 Amaa onɛ mɔɔd ye o san'amif la mɛ na san'am;
fʋ bi'emnam la wʋsa na lɔ'ɔŋ teŋ zʋŋ.
Banɛ faandif la wʋsa ba na faaɛn ba;
banɛ zabid nɛ ya la mam mɛ na zab nɛ ba.
17 Amaa m na kɛ ka fʋ nyɛ laafi ya'as
ka ti'ebi fʋ dɛmis la,”
Zugsɔb la yɛl si'em la.
“Bɔzugɔ ba buonif ye, ‘Onɛ ka ba kadi bas’
nɛ ‘Zion onɛ ka sɔ' ba'a ka' nɛ o.’ ”
18 Zugsɔb la yɛl si'eli nwa ye:
“M na lɛbis Jakob yidim zusʋŋ la na
ka zɔɔ o nidib nimbaanlig ban bɛ zin'isi'a wʋsa.
Tempʋʋg linɛ an dabɔɔg la, ba na lɛbisi mɛɛ li,
ka na'ayir la na lɛbi zi'enɛ li zin'igin.
19 Ba san'an ka bareka pʋ'ʋsim yʋʋma na yina
ka ba maan sumalisim tansid agɔla gɔla.
M na paasi ba kal,
ka ba kʋ sie;
M na kɛ ka ba nyɛ na'asi,
ka ba kʋ lɛn ziemi ba ya'asɛ.
20 Ba biis na nwɛnɛ kʋdimin dimi mɔr paŋ si'em la,
ba teŋ la na zi'en sʋ'ʋŋa;
m na namis banɛ wʋsa mugusidi ba.
21 Ba tuongat la na anɛ ba mɛŋ nid;
ka ba na'ab la na yinɛ ba sʋʋgin na.
M na kɛ ka o li'elim ka bɛ m san'an yammin,
ka anɔ'ɔnɛ na li'eli m san'an na
ka mam pʋ buol o?”
Zugsɔb la yɛl si'em la.
22 “Ala ka ya na aan m nidib
ka mam mɛ na aan ya Wina'am.
23 Gɔsima, Zugsɔb la sʋnpɛɛn nwɛnɛ sisi'em nɛ,
o na nwɛnɛ sisi'epiliŋi da'ad na
sigid bugusim dim zutin.
24 Zugsɔb la sʋnpɛɛn linɛ mɔr dabiem la kʋ lɛbɛ
asɛɛ o ti tʋm o sʋnfʋ gban'e si'el la naae.
Dabisa kenna ka ya na gban'e li gbin sʋ'ʋŋa.”