<<    <     Jeremia     29     >    >> 
Jeremia n sɔb gbauŋʋ tis Jew dim banɛ bɛ Babilon la
29
1 Pian'akaŋa bɛ gbauŋ kanɛ ka Jeremia da bɛ Jerusalem ka sɔbi tis maanmaannib nɛ nɔdi'esidib nɛ nimbanɛ ka Nebukadnɛza da gban'e ba Jerusalem zii keŋ Babilon la. 2 (Nɛ' anɛ Na'ab Jehoyakin nɛ o ma nɛ o na'ayikpɛm la'am nɛ Juda nɛ Jerusalem tuongatib nɛ nimbanɛ mi' tʋʋma nɛ li buudi sʋ'ʋŋa, ka ba da gban'e ba keŋ la.) 3 O da nɔk gbauŋ la tis Elasa onɛ an Safan biig la, nɛ Gemaraya onɛ an Hilkia biig la, bama ka Juda na'ab Zedekaya da tʋm Na'ab Nebukadnɛza san'an Babilon teŋin. Li da sɔb gbauŋ la pʋʋgin ye,
4 “Zugsɔb onɛ an Paŋtita'ar Sɔb, ka an Israel Wina'am la yɛl si'eli nwa tis banɛ ka o da kɛ ka ba gban'e ba Jerusalem mɔri keŋ Babilon la: 5 ‘Mɛɛmi yaa kpɛn', maalimi lɔmbɔn'ɔd ka di linɛ wʋsa ka ya bʋdi li pʋʋgin. 6 Dimi pu'ab ka kul sidibi du'a biribis nɛ bipumis; bɔɔmi pu'abi tisi ya biribis ka tisi ya bipumis la sidib, ka ban mɛ na du'a biribis nɛ bipumis. Wiakimi ka nɔbigi ka da sie. 7 Ieminɛ sumbʋgʋsʋm nɛ tempʋkanɛ ka ya bɛ la sʋ'ʋm, zin'ikanɛ ka m mɛŋ mɔri ya keŋ la. Sɔsimi man Zugsɔb la li yɛla, bɔzugɔ teŋ la ya'a mɔr malisim, ala ka yanam mɛ na di malisim teŋin la.’ 8 Ɛɛn, nɛ'ɛŋa ka Zugsɔb onɛ an Paŋtita'ar Sɔb ka an Israel Wina'am la yɛl: ‘Da kɛ ka nɔdi'esidib nɛ ba'abʋgʋdib banɛ bɛɛ ya sʋʋgin la ma'aa yaa. Da kɛlisidi zaansima banɛ ka ya kpɛmisidi ba ye ba mɔr la. 9 Ba ma'adi ziri tisidi ya nɛ man yʋ'ʋr. Mam pʋ tʋmi ba.’ Zugsɔb la yɛl si'em la.
10  Zugsɔb la yɛl si'eli nwa ye: ‘Li ya'a ti paae yʋma pisyɔpɔi ya Babilon bɛllim la pʋʋgin, m na kɛɛn ya san'an na ka zɔɔ ya nimbaanlig ka mɔri ya lɛb kpɛla na. 11 Mam mɛŋ mi' mam gban'e si'em ya yɛla. Li anɛ gban'ar linɛ na sʋŋi ya ka ka' gban'ar kanɛ na san'ami yaa, gban'ar linɛ na tisi ya ti'ir bɛog sa yɛla,’ Zugsɔb la yɛl si'em la. 12 ‘Ala ka ya na buolim ka sɔsim, ka m na wʋmi ya sɔsʋg. 13 Ya na ieem ka nyɛɛm, ya ya'a sid ieem nɛ ya sʋnya wʋsa.’ 14 Zugsɔb la yɛl ye, ‘M na kɛ ka ya ieem ka nyɛɛm, ka m na yisi ya sankpan'asim la pʋʋginɛ lɛbis na ka kɛ ka ya lɛm mɔr zusʋŋ. M na yisi ya buudi wʋsa ni, nɛ man widigi ya kpɛn'ɛs zin'isieba la wʋsa, lɛbis na; ka na mɔri ya yi teŋ zʋna banɛ ka m widigi ya kpɛn'ɛs la ni lɛbis na.’ Zugsɔb la yɛl si'em la.
15 Daasi'erɛɛ ya na yɛl ye, ‘Zugsɔb la tisi ti nɔdi'esidib Babilon teŋin.’ 16 Amaa Zugsɔb la yɛt na'ab onɛ zin' David na'am gbauŋ zug la yɛla si'em nwa, nɛ nimbanɛ kpɛlim tempʋkaŋa ni la, nɛ fʋ teŋ la dim banɛ da pʋ dɔlli keŋ Babilon la. 17 Ɛɛn, Zugsɔb onɛ an Paŋtita'ar Sɔb la yɛl si'eli nwa ye: ‘M na kɛ ka zaba nɛ kɔ'ɔm nɛ ban'abɛ'ɛd lii ba zugin, ka kɛ ka ba nwɛnɛ kekambɛ'ɛdnam, linɛ san'am hali ka sɔ' kʋ nyaŋi dii li. 18 M na kadi ba nɛ zaba nɛ kɔ'ɔm nɛ ban'abɛ'ɛd ka kɛ ka teŋgbauŋ la sʋ'ʋlim wʋsa kisigi ba ka pɔɔdi ba nɔɔr ka tʋ'ʋdi ba ka la'adi ba, buudkanɛ wʋsa ni ka m kadi ba kpɛn'ɛs. 19 Ban pʋ kɛlisidi m pian'ad la zug,’ Zugsɔb la yɛl si'em la, ‘pian'abama ka m tʋmmi m tʋmtʋmnib banɛ an nɔdi'esidib la ka lɛn tʋmmi ba ya'as. Ka yanam banɛ ka ba gban'e ya keŋ teŋ zʋŋ la mɛ pʋ kɛlisida.’ Zugsɔb la yɛl si'em la.
20 ‘Dinzugɔ, wʋmi man Zugsɔb la pian'ad, yanam banɛ ka m kɛ ka ba gban'e ya mɔri keŋ Babilon teŋin la.’ 21 Zugsɔb onɛ an Paŋtita'ar Sɔb ka an Israel Wina'am la yɛt si'eli nwa, Kolaya biig Ahab nɛ Maaseya biig Zedekaya yɛla ye, ban banɛ mɔri m yʋ'ʋri faadi ya la: ‘M na nɔki ba tis Babilon na'ab Nebukadnɛza ka o kʋʋ ba ya nini ni. 22 Ban zug, banɛ ka ba gban'e Juda mɔri keŋ Babilon la na pɔɔd nɔkaŋa buudi tisid nidib ye, “Zugsɔb la na maalif wʋʋ Zedekaya nɛ Ahab ka o da kɛ ka Babilon na'ab nyu'oe ba nɛ bugum si'em la!” 23 Ba tʋm yɛlbɛ'ɛd Israel nidib sʋʋgin; ba san'ami ba kpi'es pu'ab ka ma'ad ziri nɛ man yʋ'ʋr, ka m pʋ yɛli ba ye ba niŋ ala. M mɛŋ mi' li ka di kasɛt.’ Zugsɔb la yɛl si'em la.”
Semaya labaar la yɛla
24 Yɛlim Semaya onɛ an Nehelam nid la ye, 25 “Zugsɔb onɛ an Paŋtita'ar Sɔb ka an Israel Wina'am la yɛl ye, Fʋ sɔb gbana nɛ fʋ mɛŋ yʋ'ʋri tis nimbanɛ bɛ Jerusalem wʋsa, nɛ Maaseya biig Zefanaya onɛ an maanmaan la nɛ maanmaannib banɛ kpɛlim la. Fʋ yɛl Zefanaya ye, 26 Zugsɔb la gaŋif ye fʋ an maanmaanni di'e Jehoyada zin'igi sʋ'oe Zugsɔb Pʋ'ʋsim Yir la. Gban'am onɛ wʋsa gɛɛm ka niŋid wʋʋ o anɛ nɔdi'esi ba'a o nɛ kʋnt ba'an. 27 Bɔ ka fʋ pʋ gban'e Jeremia onɛ an Anatof teŋin nid ka niŋid wʋʋ o anɛ nɔdi'esi ya sʋʋgin la? 28 O tis tinam banɛ bɛ Babilon teŋin la labakaŋa na ye, Li na yuug hali, dinzugɔ mɛɛmi ya' n bɛɛ ani, maalimi lɔmbɔn'ɔd ka di linɛ wʋsa maal ani.”
29 Zefanaya onɛ an maanmaan la da karim gbauŋ la tis nɔdi'es Jeremia. 30 Ani ka labakaŋa kɛn Jeremia san'an na ye, 31 “Mɔɔlim labakaŋa tis nimbanɛ ka ba gban'e ba lɔ'ɔŋ teŋ la ye, Zugsɔb la yɛl Semaya onɛ an Nehelam nid la yɛla si'em nwa ye: Semaya sadigim pian' tisi ya la'am nɛ mam pʋ tʋm o, ka kɛ ka ya niŋ yadda nɛ linɛ ka' sida la, 32 Zugsɔb la yɛl si'eli nwa ye: M sid na namis Semaya onɛ an Nehelam nid la nɛ o yaas. O kʋ lɛm mɔr sɔ' ka o kpɛlim nimbama sʋʋgin bɛɛ o nyɛ bʋnsʋma banɛ ka m na tʋm tisim nidib la, on pian' si'em zan'as man la zug.”