Jeremia nɛ nɔdi'es Hanania yɛla
28
1 Zedekaya da dii o na'am la li yʋma anaasi saŋa, nwadis anu la ni, nɔdi'es Hanania onɛ an Azur biig ka yi Gibeon teŋin la na da pian' tisim Zugsɔb Yin la, ka maanmaannib nɛ nidib la wʋsa bɛ, ka o yɛl ye, 2 “Zugsɔb onɛ an Paŋtita'ar Sɔb, ka an Israel Wina'am la yɛl ye, M na kɔ'ɔg Babilon na'ab yu'asindaug la. 3 Yʋma ayi' saŋa m na mɔr Zugsɔb Yir la'ad la wʋsa lɛbis kpɛla na, la'abanɛ ka Babilon na'ab da yis kpɛla mɔri keŋ Babilon la. 4 M na mɔr Juda na'ab Jehoyakin onɛ an Jehoyakim biig la lɛbis kpɛla na, nɛ banɛ wʋsa ka ba da gban'e ba Juda mɔri keŋ Babilon la, bɔzugɔ m na kɔ'ɔg Babilon na'ab yu'asindaug la.” Zugsɔb la yɛl si'em la.5 Jeremia da lɛbis nɔdi'es Hanania, maanmaannib la tuon, nɛ nimbanɛ bɛ Zugsɔb Yin la si'em nwa. 6 O da yɛl ye, “Ami! Zugsɔb la kɛl ka li lieb amɛŋa, ka di'e fʋ nɔɔr ka pian'abanɛ ka fʋ yɛl la niŋ amɛŋa, ka Zugsɔb Yir la'ad nɛ nimbanɛ ka ba gban'e ba mɔri keŋ Babilon la sid lɛb kpɛla na! 7 La'am nɛ wala, kɛlisim linɛ ka m ye m yɛl ka fʋn nɛ nidib la wʋsa wʋm. 8 Nɔdi'esidib banɛ da gaad saŋa kanɛ ka mam nɛ fʋ nan kae la da pian'anɛ zi'el ye zaba nɛ tɔɔg nɛ ban'abɛ'ɛd na paae tɛɛns bɛdegʋ nɛ sʋ'ʋlim banɛ mɔr kpi'euŋ la. 9 Amaa nɔdi'es kanɛ yɛl ye sumbʋgʋsʋm na bɛ la, lin na niŋ si'em ka ba baŋ ye Zugsɔb la sid tʋm o na anɛ o pian'ad la ya'a niŋ amɛŋa.”
10 Ani ka nɔdi'es Hanania yis yu'asindaug la Jeremia niŋgɔɔnrinɛ kɔ'ɔgi li, 11 ka yɛl nidib la wʋsa tuon ye, “Zugsɔb la yɛl si'em nwa ye, Ala ka m na kɔ'ɔg Babilon na'ab Nebukadnɛza yu'asindaug la buudi wʋsa niŋgɔnya ni yʋma ayi' saŋa.” Nɛ'ɛŋa da kɛ ka nɔdi'es Jeremia gban'e o suori keŋ.
12 Nɔdi'es Hanania n kɔ'ɔg yu'asindaug la nɔdi'es Jeremia niŋgɔɔnrin la, li pʋ yuugɛ ka Zugsɔb labaar kɛn Jeremia san'an na ye, 13 “Kem yɛl Hanania ye Zugsɔb la yɛl ye, ‘Yu'asindaug ka fʋ kɔ'ɔg, amaa m na bɔ kʋnt yu'asin zi'eni li zi'esimin.’ ” 14 Zugsɔb onɛ an Paŋtita'ar Sɔb ka an Israel Wina'am la yɛl si'eli nwa, “M na nɔk kʋnt yu'asin nɛ gɛɛl buudbama niŋgɔnya, ka kɛ ka ba tʋmmi tisid Babilon na'ab Nebukadnɛza, hali m na kɛ ka o sʋ'oe sian'anr bʋnkɔnbid.”
15 Nɔdi'es Jeremia da yɛl Nɔdi'es Hanania ye, “Hanania, kɛlisim! Zugsɔb la pʋ tʋmi fɔ, la'am nɛ wala fʋ bɛlis buudkaŋa ka ba niŋ yadda nɛ linɛ an faad. 16 Dinzugɔ, Zugsɔb la yɛl si'eli nwa, ‘M na yisif dunia kaŋa pʋʋgin. Yʋʋm kaŋa fʋ na kpi, bɔzugɔ fʋ kɛ ka nidib la zan'as Zugsɔb la nɔɔr.’ ”
17 Yʋʋm kan la ni, li nwadis ayɔpɔi la, ka Hanania sid da kpi.