Juda dim na tʋm tis Nebukadnɛza
27
1 Josia biig Zedekaya n da di Juda na'am la, li da pʋ yuugɛ ka labakaŋa yi Zugsɔb la san'anɛ kɛn man Jeremia san'an na yɛl ye, 2 Zugsɔb la yɛlim si'eli nwa ye, Maalim yu'asindaug ka biɛn gbana lɔɔ li kɔlli fʋ niŋgɔɔnrin. 3 Ka tɔlim labaari tis kpɛɛmnam banɛ yi Edom nɛ Moab nɛ Ammon nɛ Taya nɛ Sidon tɛɛnsini kɛn Juda na'ab Zedekaya san'an na la, 4 ye ba yɛli ba zugdaannam la ye, Zugsɔb onɛ an Paŋtita'ar Sɔb ka an Israel Wina'am la yɛl ye, Yɛlimi ya zugdaannam la nɛ'ɛŋa: 5 M mɛŋ paŋ nɛ m nu'ug kanɛ paad zin'ig wʋsa la ka m maal teŋgbauŋ nɛ nidib nɛ bʋnkɔnbid banɛ bɛɛ li ni la, ka nɔkidi li tisid onɛ wʋsa ka m bɔɔd. 6 Nannanna, m na nɔki ya tɛɛns la wʋsa tisim tʋmtʋm Nebukadnɛza onɛ an Babilon na'ab la; hali m na kɛ ka sian'anr bʋnkɔnbid la siak o nɔɔr. 7 Buudi wʋsa na tʋm tis on nɛ o biig nɛ o yaaŋ hali ti paae li bɛn; ani ka buudi bɛdegʋ nɛ na'atitada yʋ'ʋn na la'as taaba zabi nyaŋ o.8 Ka buudsi'a bɛɛ sʋ'ʋlim si'a ya'a pʋ tʋm tis Babilon na'ab Nebukadnɛza bɛɛ igini na'as oo, m na namis buudkan la, Tanp nɛ kɔ'ɔm nɛ ban'abɛ'ɛd na kʋʋ ba, Zugsɔb la yɛl si'em la, asɛɛ ka m san'ami ba wʋsa naae. 9 Alazug, da kɛlisidi ya nɔdi'esidib nɛ banɛ gɔsid ku'omin nɛ banɛ ye ba mi' zaansima gbinni yɛt la, ya sɔnpʋttib nɛ ba'akɔn dim banɛ yɛti ya ye, “Ya kʋ tʋm tis Babilon na'ab la.” 10 Ba yɛti ya nɛ ziri linɛ na kɛ ka ba mɔri ya lalig ka basi ya teŋ la; m na kadi ya yis ka ya bɔdig. 11 Amaa buudkanɛ igin ka siak Babilon na'ab yu'asindaug la ka tʋm tis o, m na kɛ ka buudkan la kpɛlimi ba mɛŋ teŋin, ka kuod ka bɛɛ ani, Zugsɔb la yɛl si'em la.
12 Labakan la mɛn ka m da tis Juda na'ab Zedekaya. M da yɛl o ye, “Iginim ka siak Babilon na'ab yu'asindaug la; ka tʋm tis on nɛ o nidib, ka fʋ na vʋe. 13 Bɔ ka fʋ bɔɔdi kɛ ka fʋn nɛ fʋ nidib kpi zaba ni nɛ kɔ'ɔm nɛ ban'abɛ'ɛd linɛ ka Zugsɔb la yɛl ye, buudkanɛ pʋ siaki tʋm tis Babilon na'aba o na kɛ ka li paae ba la? 14 Da kɛlisid nɔdi'esidib banɛ ma'adif ye fʋ kʋ tʋm tis Babilon na'ab laa. 15 Mam pʋ tʋmi baa,” Zugsɔb la yɛl si'em la. Ba ma'adnɛ ziri nɛ man yʋ'ʋr. Dinzugɔ m na kadi ya yis, yanam nɛ nɔdi'esidib banɛ pian'adi tisidi ya la wʋsa, ka ya na kpi.
16 Ani ka m yɛl maanmaannib la nɛ nimbama wʋsa ye, “Zugsɔb la yɛl si'eli nwa, Da kɛlisid nɔdi'esidib banɛ yɛt ye, Li kʋ yuugɛ, Zugsɔb Yir la'ad linɛ bɛ Babilon la ba na mɔri ba lɛbis na la.” Ba ma'adnɛ, li anɛ ziri nɔdi'esʋg. 17 Da kɛlisidi baa. Tʋm tis Babilon Na'ab la ka ya na vʋe. Bɔ ka tempʋkaŋa na lieb dabɔɔgɔ? 18 Ba ya'a sid anɛ nɔdi'esidib ka mɔr Zugsɔb la pian'ad, kɛl ka ba sɔs Zugsɔb onɛ an Paŋtita'ar Sɔb la, ka la'ad linɛ nam bɛ Zugsɔb Yinnɛ Juda na'ab yin la kpɛm bɛɛ ala, nɛ linɛ bɛ Jerusalem tempʋʋgin la, ka ba da mɔri li keŋ Babilon teŋinɛ. 19 Zugsɔb onɛ an Paŋtita'ar Sɔb la yɛl si'eli nwa la'abama yɛla, buos la nɛ Atɛuk la nɛ tɛrekonam linɛ mɔr ku'om zi'esa li zug la nɛ la'ad linɛ kpɛlim tempʋkaŋa ni la: 20 Saŋa kanɛ ka Babilon na'ab Nebukadnɛza da gban'e Jehoyakin onɛ an Jehoyakim biig ka an Juda na'ab la mɔr o yi Jerusalem keŋ Babilon teŋin la'am nɛ Juda nɛ Jerusalem ninsʋma wʋsa ka da faaɛn la'asʋma bɛdegʋ yit Zugsɔb pʋ'ʋsim Yinnɛ na'ayin la, o da pʋ vaae la'abama nwa keŋɛ. 21 Dinzugɔ, Zugsɔb onɛ an Paŋtita'ar Sɔb, ka an Israel Wina'am la, yɛl la'ad banɛ kpɛlim Zugsɔb Yin la yɛla nɛ Juda na'ab yin linɛ bɛ Jerusalem la siem nwa ye, 22 “Ba na mɔri ba keŋ Babilon ka ba na bɛɛ ani paae daakanɛ ka m na lɛb na nɔki ba mɔri lɛbis kpɛla na la.” Zugsɔb la yɛl si'em la.