Ban gban'e ye ba kʋ Jeremia la
26
1 Jehoyakim onɛ an Juda na'ab ka an Na'ab Josia biig la da di na'am paalim la, labakaŋa da yi Zugsɔb la san'an na: 2 Zugsɔb la yɛl si'eli nwa ye, “Zi'enim Zugsɔb Yir la zakin pian' tis Juda tempʋʋs la nimbanɛ wʋsa kɛn Zugsɔb la Yin na ye ba pʋ'ʋs la. Yɛlimi ba man ye fʋ yɛli ba si'el la wʋsa; da bas pian'ʋk baa yinnɛɛ. 3 Daasi'erɛɛ ba na kɛlis ka ba yinne-yinne tiaki ba suobɛ'ɛdnam la. Ka m na tiaki m pʋtɛn'ɛr ka kʋ lɛn kɛ ka tɔɔg kanɛ ka m gban'e la kena, tʋʋmbɛ'ɛd kanɛ ka ba tʋm la zugɔ.” 4 Yɛlimi ba ye, “Zugsɔb la yɛl si'eli nwa ye: ‘Ya ya'a pʋ kɛlis ka dɔl wada linɛ ka m nɔki digili ya tuon la, 5 ka mɛ pʋ kɛlis nɔdi'esidib banɛ aan m tʋmtʋmnib la pian'adɛ, banɛ ka m tʋmi ba ya san'an ka lɛn tʋmi ba ya san'an na la (la'am nɛ yanamɛ pʋ kɛlis la), 6 alazug m na kɛ ka yikaŋa nwɛnɛ Siilo teŋ ka m da san'am si'em la, ka nɔpɔɔr na bɛ tempʋkaŋa zug buudbanɛ bɛ teŋgbauŋ la wʋsa sʋʋgin.’ ”7 Maanmaannib la nɛ nɔdi'esidib nɛ nidib la wʋsa da wʋm ka Jeremia pian' pian'abama Zugsɔb Pʋ'ʋsim Yir zakin la. 8 Amaa Jeremia pian' naae ka yɛl nidib la Zugsɔb la tis o nɔɔr ye o yɛl si'el la, ka maanmaannib nɛ nɔdi'esidib nɛ nidib la wʋsa gban'e o ka ye, “Asɛɛ ka fʋ kpi! 9 Bɔ ka fʋ yɛt nɛ Zugsɔb la yʋ'ʋr ye Yikaŋa na nwɛnɛ Siilo ka tempʋkaŋa na kpɛlimi li kɔn'ɔkɔn' ka sɔ' kʋ bɛɛ li ni?” Ka nidib la wʋsa la'asi gilig Jeremia, Zugsɔb Yin la.
10 Na'ayikpɛm la wʋm nɛ'ɛŋa la, ka duoe na'ayin la keŋ Zugsɔb la Yin Za'anɔpaallin la zin'inɛ ba zin'isa ni. 11 Ani ka maanmaannib nɛ nɔdi'esidib la yɛl na'ayikpɛm la nɛ nidib la wʋsa ye, “Kʋʋsimi ye dau kaŋa nar nɛ kʋʋb bɔzugɔ o pian' bɛ'ɛdi tis tempʋkaŋa. Ya mɛŋ tʋba wʋm ya!”
12 Ani ka Jeremia mɛ yɛl na'ayikpɛm la nɛ nidib la wʋsa ye, “Linɛ ka ya wʋm la wʋsa Zugsɔb la tʋmim ye m pian' sa'al Yikaŋa nɛ tempʋkaŋa. 13 Nannanna tiakimini ya suoya nɛ ya tʋʋma ka siak Zugsɔb la nɔɔr. Ala ka o na tiaki o pʋtɛn'ɛr ka kɛ ka tɔɔg kanɛ ka o yɛl ye li na kena la kʋ lɛn kɛɛn ya zugin naa. 14 Ya'a kpɛlim nɛ mam, m bɛɛ ya nu'usin; maalimi linɛ ka ya tɛn'ɛs ye li an sʋm ka dɔl suor. 15 Lɛɛ baŋimi ye, ya ya'a kʋ mam, li na an tuku ti yanam nɛ tempʋkaŋa nɛ nimbanɛ bɛɛ li ni la wʋsa, yanamɛ kʋ onɛ pʋ tʋm taal la zug, bɔzugɔ li anɛ sida, Zugsɔb la tʋmim ye m pian' nɛ' wʋsa ka ya wʋm.”
16 Ani ka na'ayikpɛm la nɛ nidib la wʋsa nɛ maanmaannib nɛ nɔdi'esidib la ye, “Dau kaŋa pʋ nar nɛ ban na kʋʋs o yɛla ye o kpii! Bɔzugɔ o pian' tisi ti nɛ Zugsɔb onɛ aan ti Wina'am la yʋ'ʋr zug.”
17 Kpɛɛmnam la sieba da duoe yi tuon na ka yɛl nimbanɛ la'as la wʋsa ye, 18 Hezekia da an na'ab Juda teŋin saŋsi'a la, Maika onɛ yi Moreset la da di'esid Zugsɔb pian'adi tisid nidib la. O da yɛl Juda dim wʋsa ye, “Zugsɔb onɛ an Paŋtita'ar Sɔb la yɛl si'eli nwa:
“Zion na lieb pɔɔg ka ba kua,
ka Jerusalem lieb tandia'ana dʋʋr,
ka Pʋ'ʋsim Yir zuor la lieb sian'anr.”
19 Juda na'ab Hezekia bɛɛ sɔ' da duoe Juda teŋin la kʋʋ o? Hezekia da pʋ zɔ dabiem ka sɔs Zugsɔb la suguruu? Zugsɔb la da pʋ tiaki o pʋtɛn'ɛr on yɛl ye o na mɔr tɔɔgʋ kɛɛn ba san'an na laa? Nannanna ti bɔɔdi bɔnɛ yɛltɔɔgʋ tisi ti mɛŋ!
20 (Saŋa kan la dau sɔ' onɛ yʋ'ʋri buon Uria ka an Semaya biig ka yi Kiriaf Jiarim teŋin na la mɛ da pian' Zugsɔb la pian'ad wʋʋ Jeremia pian' si'em sa'al tempʋkaŋa la. 21 Na'ab Jehoyakim nɛ kpɛɛmnam nɛ na'ayikpɛm la da wʋm pian'akaŋa la, Na'ab la da bɔɔdnɛ ye o kʋʋ o. Amaa Uria da wʋmi li ka zɔɔ keŋ Egipt teŋgbauŋʋn dabiem zug. 22 Na'ab Jehoyakim da tʋm Akibo biig Elinatan nɛ dap sieba Egipt teŋin. 23 Ba da gban'e Uria Egipt na tis Na'ab Jehoyakim, ka o kɛ ka ba kʋʋ o nɛ sʋ'ʋraug ka nɔk o lɔbig yaadin zin'ikanɛ ka ba mum tadimnam la.)
24 Linɛ lɛm paas, Safan biig Ahikam mɛ da pian' sʋŋ Jeremia, ka kɛ ka ba pʋ gban'e o tis nidib la ka ba kʋʋ o.