Sankpan'asim linɛ ka ba ye kpɛn' yʋma pisyɔpɔi la yɛla
25
1 Labaar da kɛn Jeremia san'an na Juda nidib wʋsa yɛla, li anɛ Juda na'ab Jehoyakim onɛ an Josia biig la da di o na'am la, li yʋma anaasi saŋa, saŋa kanɛ mɛ da an Babilon na'ab Nebukadnɛza na'am la yʋʋm yinne saŋa. 2 Li saŋa ka Jeremia da yɛl Juda nidib nɛ banɛ bɛ Jerusalem la wʋsa ye, 3 “Yʋʋm pisi nɛ atan' nwa, lin pin'il Ammon biig Josia n da di na'am la li yʋʋm pii nɛ atan' saŋa keŋ paae zina, Zugsɔb labaar la kɛɛn m san'an na ka m pian' tisi ya nɔɔr babiga sa, amaa ya pʋ kɛlisɛ.4 “Zugsɔb la la'am tʋm o tʋmtʋmnib banɛ aan o nɔdi'esidibi ya san'an na saŋa wʋsa la, ya pʋ kɛlisɛ ka zan'asi ba pian'ad la. 5 Ba yɛli ya ye, Ya wʋsa yinne-yinne fɛndigimi ya suobɛ'ɛdnamin la nannanna, nɛ bɛ'ɛd linɛ ka ya maan la, ka ya na kpɛm bɛ teŋ kanɛ ka Zugsɔb la tis yanam nɛ ya yaanam la ni saŋa linɛ ka' bɛnnɛ. 6 Da dɔlli winsieba maannɛ ba ka zun'odi baa; da kɛ ka m sʋʋnr pɛlig nɛ linɛ ka ya maal nɛ ya mɛŋ nu'us la. Lin ka m kʋ san'ami yaa.”
7 “Amaa ya pʋ kɛlis man yɛl si'el la.” Zugsɔb la yɛl si'em la, Ya kɛya ka m sʋnf duoe nɛ linɛ ka ya nɔki ya nu'usi maal la, ka mɔr san'auŋʋ kɛɛn ya mɛŋ san'an na.
8 Dinzugɔ, Zugsɔb onɛ an Paŋtita'ar Sɔb la yɛl ye, “Yanamɛ sadigim pʋ kɛlisi m pian'ad la, 9 m na buol nimbanɛ bɛ ya-datiuŋ la nɛ m tʋmtʋm Nebukadnɛza onɛ an Babilon na'ab la na. M na mɔri ba na ka ba zab nɛ teŋ kaŋa nɛ nimbanɛ bɛɛ li ni la, nɛ buudbanɛ gilig la wʋsa. M na san'ami ba nyain ka kɛ ka ba lieb bʋnla'ada ka ba san'auŋ la kʋ mɔr bɛnnɛ,” Zugsɔb la yɛl si'em la. 10 M na yis sumalisim vuudi ba san'an, sumalisim linɛ ka pu'apaal nɛ pu'apaal sidib maan la, ba kʋ lɛn wʋm ka sɔ' nɛ'ɛm zɔm bɛɛ ba nyu'oe fitirɛ. 11 Teŋ tita'ar kaŋa na lieb zaalim, ka buudbanɛ bɛ kpɛla la na tʋmmi tisid Babilon teŋ dim yʋma pisyɔpɔi.
12 “Amaa yʋma pisyɔpɔi la ya'a ti gaad, m na namis Babilon na'ab nɛ o teŋ la, nɛ Babilon nidib la wʋsa ba bɛ'ɛd la yɛla. M na kɛ ka teŋ la kpɛlim zaalim saŋa linɛ ka' bɛnnɛ,” Zugsɔb la yɛl si'em la. 13 “Mam pian' si'el teŋ kaŋa yɛla la m na mɔri li na, nɛ linɛ wʋsa sɔb gbauŋ kaŋa ni ka Jeremia pian' zɛrig buudi wʋsa la. 14 Ba mɛŋ na zɔɔ kpɛn' sankpan'asim tɛɛns bɛdegʋ pʋʋgin nɛ na'atitada nu'usin. M na lɛbisi yɔɔ ba ban tʋm si'el, nɛ ban nɔki ba nu'usi maal si'el la.”
Wina'am sʋnpɛɛn bʋtiŋ
15 Zugsɔb onɛ an Israel Wina'am la yɛlim si'eli nwa ye: “Nɔkim bʋtiŋ kanɛ pɛ'ɛl nɛ daam linɛ pa'annɛ m sʋnpɛɛn la ka kɛ ka buudbanɛ ka m tʋmmi fʋ ba san'an la nuu li. 16 Ba ya'a nuu li, ba na gɛɛm ka kennɛ gɛrid, zaba bɛɛ tanp linɛ ka m na kɛ ka li nwɛ' ba sʋʋgin la zug.”
17 Ka m di'e bʋtiŋ la Zugsɔb la nu'ugin ka kɛ ka on da tʋmim buudsieba san'an la nuu li. 18 Banɛ an Jerusalem nɛ tempʋbanɛ bɛ Juda nɛ li na'anam nɛ ba kpɛɛmnam la, ka li kɛ ka nidib yaae ba, ka pɔɔd nɔɔri tisidi ba, ka kɛ ka ba lieb bʋnla'ada, nwɛnɛ din an si'em zina la. 19 Egipt na'ab Faaro nɛ o tʋmtʋmnib nɛ o na'ayikpɛm nɛ o nidib la wʋsa na ti nuu li 20 hali nɛ saam banɛ bɛɛ anina la; Uz na'anam nɛ Filisitia na'anam la wʋsa (bama anɛ Askɛlon nɛ Gaza nɛ Ekron nɛ nimbanɛ kpɛlim Asdod la); 21 Edom nɛ Moab nɛ Ammon 22 nɛ Taya nɛ Sidon na'anam; na'anam banɛ bɛɛ atɛuk nɔɔrin nɛ banɛ lɔ'ɔŋ atɛuk la. 23 Dedan nɛ Tema nɛ Buz nɛ banɛ bɛ lalli ka lɔɔdi ba zuobidi lɛbisidi ba gbɛ'ɛdin la; 24 Arabia na'anam wʋsa nɛ nimbanɛ an teŋ zʋŋ na'anam ka bɛ pipirisin la; 25 na'anam banɛ bɛ Zimiri nɛ Elam nɛ Media 26 nɛ na'anam banɛ bɛ ya-datiuŋ nɛ banɛ bɛ yammin nɛ banɛ bɛ lalli nɛ sʋ'ʋlim banɛ bɛ teŋgbauŋ la zug wʋsa na nu sʋnpɛɛn daam la. Ka lin nya'aŋ Siasiak (linɛ an Babilon la) na'ab mɛ na nuu li.
27 Ka o yɛlim ye m yɛlimi ba ye, “Zugsɔb onɛ an Paŋtita'ar Sɔb, onɛ an Israel Wina'am la, yɛl ye, numini m sʋnduor la kʋʋli ka tin ka lii digi ka da lɛn duoe ya'asɛ, bɔzugɔ, m na kɛ ka zaba paae ya na. 28 Amaa ba ya'a zan'as ka pʋ di'e bʋtiŋ la fʋ nu'usinɛ nuu, yɛlimi ba ye Zugsɔb onɛ an Paŋtita'ar Sɔb la yɛl ye, ‘Asɛɛ ya nuu li! 29 Gɔsima, m na dɛŋi pin'ili mɔr tɔɔgʋ kɛn teŋ kanɛ ka m yʋ'ʋr bɛ la zugin na, ya tɛn'ɛs ye ya na keŋ ka kʋ nyɛ namisʋg bɛɛ? Ya kʋ keŋ zaalim, bɔzugɔ m na kɛ ka zaba bɛɛ tanp nwɛ' onɛ mɛkama bɛ teŋgbauŋ la wʋsa zug.’ Zugsɔb la yɛl si'em la.”
30 “Nannanna, pian'am pian'abama wʋsa tisi ba, ka yɛli ba ye,
“Zugsɔb la na naam arezana ni nwa'am,
o na tans wʋʋ satansʋg nɛ, zin'ikanɛ ka o bɛ ka li an kasi la,
ka nwa'am vɔlis o teŋgbauŋ la.
O na tans wʋʋ banɛ nɔɔd tiwala yisid daam
ka maan sumalisim tʋkpiidʋg si'em la,
ka tans banɛ bɛ teŋgbauŋ zug la wʋsa.
31 O tansʋg la na maligim paae dunia kpikpɛmis,
Zugsɔb la na pian' buudi wʋsa pɔ'ɔgir yɛla.
O na kad nidib wʋsa saria
ka kʋ bugusim dim la.”
Zugsɔb la yɛl si'em la.
32 Zugsɔb onɛ an Paŋtita'ar Sɔb la yɛl si'eli nwa ye:
“Gɔsima! Tɔɔg yadigidi kenna,
li na paae buudi wʋsa yinne-yinne;
sisi'etita'ar yi
dunia kpikpɛmisi kenna.”
33 Saŋa kan la ya'a ti paae ka banɛ ka Zugsɔb kʋ la na bɛ zin'ig wʋsa, li na yi dunia kpikpɛŋ yinne paae kpikpɛŋ yinne. Ba kʋ kaasi ba kʋʋr bɛɛ ba la'asi ba bɛɛ mumi baa, amaa ba na nwɛnɛ sa'ad nɛ dig teŋin.
34 Yanam banɛ an kɔnbkemniba, kummi ka kaasi;
yanam banɛ bɛ pɛ'ɛs la tuonnɛ, bilimmi titanin;
bɔzugɔ ya kʋʋb saŋa paae ya;
ya na lii yaam-yaam wʋʋ yʋʋri nwa'anɛ.
35 Kɔnbkemnib la kʋ mɔr zin'ikanɛ ka ba na zɔɔ keŋɛ,
kɔnbid la tuongatib kʋ nyɛ suori zɔɔ pɔnsɛ.
36 Kɛlisim kɔnbkemnib la kaasig
nɛ kɔnbid la tuongatib kuŋ nwɛ'ɛb,
bɔzugɔ, Zugsɔb la san'ami ba yaama zin'ig.
37 Zugsɔb la na kɛn mɔma'asa linɛ malisi tis bʋnkɔnbid la zin'ig na
ka kɛ ka li lieb pipiris zin'ig
Zugsɔb sʋnpɛɛn linɛ mɔr dabiem la zug.
38 O na bas o buug la wʋʋ gbigim nɛ,
ka sɔ' kʋ lɛm bɛ teŋin la
bɔzugɔ, mugusʋg sɔb la na kʋʋ ya
ka li anɛ Zugsɔb sʋnpɛɛn linɛ mɔr dabiem la zug.