24
1 Jehoyakin onɛ an Jehoyakim biig ka an Juda na'ab la, nɛ o na'ayikpɛm nɛ Juda nimbanɛ mi' tʋʋma sʋ'ʋŋa la, Babilon na'ab Nebukadnɛza da gban'e ba Jerusalem teŋin mɔri keŋ Babilon teŋin. Lin nya'aŋ ka Zugsɔb la nie pa'alim, ka m nyɛ kekama pɛɛd ayi', ka li zi'e Zugsɔb Yir za'anɔɔrin. 2 Pɛog yinne da mɔri kekamsʋma, nwɛnɛ wala banɛ dɛŋ bi'igir; ka yinne la an bʋmpɔn'ɔsa linɛ san'am hali ka sɔ' kʋ nyaŋi dii li.3 Ka Zugsɔb la bu'osim ye, “Jeremia, fʋ nyɛ bɔ?” Ka m lɛbis ye, “Kekama. Bʋnsʋma la an sʋm hali, amaa bʋmbɛ'ɛdnam la san'am nɛ hali ka sɔ' kʋ nyaŋi dii.”
4 Ani ka Zugsɔb labaar kɛɛn m san'an na ye, 5 “Zugsɔb onɛ an Israel Wina'am la yɛl si'eli nwa ye, M gɔs kekamsʋma nwa ka ba anɛ nimbanɛ ka m kɛ ka ba gban'e ba mɔri keŋ Babilon teŋin la an sʋ'ʋm si'em. 6 M na guri ba, ka na ti mɔri ba lɛbis teŋ kaŋa ni na. M na maali mɛɛ ba sʋ'ʋŋa ka kʋ nwa'ae ba ya'asɛ. M na sɛɛ ba ka kʋ lɛn vuoɛn ba ya'asɛ. 7 M na pɛligi m pʋʋgʋ tisi ba, ka ba baŋ ye manɛ an Zugsɔb la. Ba na aan m nidib, ka mam mɛ na aan ba Wina'am, bɔzugɔ, ba na lɛbi m san'an na nɛ ba sʋnf wʋsa.”
8 Amaa Zugsɔb la lɛn yɛl ye, “Nwɛnɛ kekama banɛ san'am ka sɔ' kʋ nyaŋi di si'em la, ala ka m na niŋ Juda na'ab Zedekaya nɛ o na'ayikpɛm nɛ banɛ kpɛlim la, ba ya'a bɛ nɛ Jerusalem la bɛɛ Egipt teŋin wʋsa. 9 M na kɛ ka sʋ'ʋlim banɛ bɛ teŋgbauŋ la zug wʋsa yaa ba ka kisigi ba, ka siilimi ba. Ba na la'adi ba ka tʋ'ʋdi ba, ka pɔɔdi ba nɔya man kadi ba kpɛn'ɛs zin'isi'a wʋsa. 10 M na kɛ ka zaba, nɛ kɔ'ɔm, nɛ ban'as paae ba, hali ka ba ti kpii naae teŋ kanɛ ka m tisi ba nɛ ba yaanam la.”