Wil kanɛ an pʋpiel la yɛla
23
1 “Tɔɔg na paae kɔnbkemnib banɛ widigid ka san'amidi m pɛ'ɛs banɛ bɛɛ ba nu'usin la!” Zugsɔb la yɛl si'em la. 2 Dinzugɔ Zugsɔb, onɛ an Israel Wina'am la, yɛl kɔnbkemnib banɛ gɔsid o kɔnbid la ye, “Yanamɛ sadigim widigi m kɔnbid la ka kati ba ka pʋ guri ba la, m na namisi ya bɛ'ɛd kanɛ ka ya tʋm la zug.” Zugsɔb la yɛl si'em la. 3 “Mam mɛŋ na la'asi m kɔnbbanɛ kpɛlim ka m widigi ba kpɛn'ɛs tɛɛns wʋsa mɔri ba lɛbi ba bɛllim zin'igin na, ani ka ba na nɔbig ka ba kal zu'oe. 4 M na bɔ kɔnbkemnibi tisi ba ka ba na guri ba, ka ba kʋ lɛn zɔt dabiem bɛɛ dabiem kpɛn' ba, ka ba yinne kʋ bɔdigɛ.” Zugsɔb la yɛl si'em la.5 Zugsɔb la yɛl ya ye, “Dabisa kenna,
ka m na kɛ ka na'akanɛ an pʋpielim sɔb duoe David yaasin la.
O na nwɛnɛ wil kanɛ vɛnl ka bus tigbi'irin la na.
O na anɛ na'akanɛ na gur nidib la nɛ ya'am,
ka tʋm linɛ an sʋ'ʋm nɛ sida teŋ la zug.
6 Dabisban ni ka Juda na paam yɔlisim
ka Israel na bɛ nɛ sumbʋgʋsʋm.”
Ba na ti buon o yʋ'ʋr ye:
Zugsɔb la Aan Ti Pʋpielim Sɔb.
7 “La'am nɛ wala sa, dabisa kenna, ka nidib kʋ lɛm pɔ ye, ‘Ti pɔya nɛ Zugsɔb Onɛ mɔri ti yi Egipt teŋin la yʋ'ʋrɛ!’ Zugsɔb la pian'ʋkʋ la, 8 amaa ba na yɛl ye, ‘Zugsɔb onɛ mɔr Israel dimi yi teŋ kanɛ bɛ ya-datiuŋ la na, nɛ tɛɛns banɛ ka o widigi ba kpɛn'ɛs la.’ M na mɔri ba lɛbis teŋ kanɛ ka m da tisi ba yaanam la ni na.”
Ziri nɔdi'esidib la yɛla
9 Nɔdi'esidib la yɛla:
ka m sʋʋnr san'am;
m kɔnba wʋsa dammidnɛ.
M nwɛnɛ danuud nɛ,
ka nwɛnɛ onɛ ka daam nyaŋ o,
bɔzugɔ li anɛ Zugsɔb la
nɛ o pian'abanɛ an kasi la zug.
10 Teŋ la pɛ'ɛli nɛ pu'agɔɔnda tʋʋma;
bɔzugɔ nɔpɔɔr la kɛnɛ ka teŋ la kʋdig
ka mɔɔd banɛ bɛ sian'arin la kʋdig.
Nɔdi'esidib la dɔlli ziri suoya
ka pʋ mɔri ba paŋ la tʋm nɛ sidaa.
11 “Nɔdi'esidib nɛ maanmaannib la wʋsa pʋ dɔl Wina'am;
hali m pʋ'ʋsim Yin la m nyɛ ba bɛ'ɛd la an si'em,”
Zugsɔb la yɛl si'em la.
12 “Dinzugɔ, ba suor la na lieb sisalig;
ba na kadi ba kpɛn'ɛs likin
ani ka ba na li.
Yʋʋm kanɛ ka ba na nyɛ namisʋg la
m na mɔr yɛltɔɔgʋ ba zugin na,”
Zugsɔb la yɛl si'em la.
13 “Samaria nɔdi'esidib la sʋʋgin
m nyɛ linɛ pʋ malisi ma:
ba di'edi Baal nɔɔr pian'ad
ka kpɛn'ɛsidi m nidib Israel dim la mɔɔg.
14 M nyɛ ka nɔdi'esidib banɛ bɛ Jerusalem la
tʋm tʋʋmfɛn'ɛsa si'em:
ba anɛ pu'asan'auŋ nɛ dausan'auŋ nɛ ziri dim.
Ba kpɛmisid tʋʋmbɛ'ɛd dim,
alazugʋ kɛ ka sɔ' pʋ fɛndigid ka basid o tʋʋmbɛ'ɛdɛ.
Man san'an ba nwɛnɛ Sodom nɛ Gomora dim nɛ.”
15 Dinzugɔ, Zugsɔb onɛ an Paŋtita'ar Sɔb la yɛl si'eli nwa ye:
“M na kɛ ka ba di diib linɛ an tɔɔg
ka nu ku'om linɛ an yabid,
bɔzugɔ Jerusalem nɔdi'esidib la
kɛ ka ba Wina'am zi'ilim la yadigi paae zin'ig wʋsa.”
16 Zugsɔb onɛ an Paŋtita'ar Sɔb la yɛl ye,
Da kɛlisidi nɔdi'esidib la yɛti ya si'el la;
ba tisidi ya nɛ ti'ir linɛ ka' asida.
Ba pian'adi linɛ yii ba mɛŋ pʋtɛn'ɛrin na,
ka ka' linɛ yi Zugsɔb la nɔɔrinɛ.
17 Ba yɛt banɛ pʋ bɔɔdi m yɛla la ye,
Zugsɔb la yɛl ye, “Ya na mɔr sumbʋgʋsʋm.”
Nɛ banɛ wʋsa ka ba sʋnya digilim la
ba yɛt ye, “Bɛ'ɛd kʋdim kʋ kɛɛn ya san'an naa.”
18 Amaa ba sʋʋgin la anɔ'ɔnɛ mi' zi'en Zugsɔb la la'asʋg zin'igin
ye o gɔs bɛɛ o wʋmi o pian'adɛ?
Anɔ'ɔnɛ kɛlis bɛɛ baŋ o pian'adɛ?
19 Gɔsima, Zugsɔb la sʋnpɛɛn na da'ae na nwɛnɛ sisi'em nɛ,
li na nwɛnɛ sisi'epiliŋi da'adi
bʋʋn pʋkpɛnnim dim wʋsa zugin.
20 Zugsɔb la sʋnpɛɛn linɛ mɔr dabiem la kʋ lɛbɛ
asɛɛ li ti tʋm o sʋnfʋ gban'e si'el la naae.
Dabisa kenna ka ya na gban'e li gbin sʋ'ʋŋa.
21 Mam pʋ tʋm nɔdi'es bamaa,
la'am nɛ wala ba zɔti ken nɛ ba labaya.
Mam pʋ pian' tisi baa,
la'am nɛ wala ba pian'adi tisid nidib la.
22 Amaa ba ya'a bɛɛn nɛ m la'asʋg la zin'igin,
ba naan di'edi nɛ m pian'adi tisidi m nidib la,
ka fɛndigi ba yiti ba suobɛ'ɛdnam
nɛ ba tʋʋmbɛ'ɛd la pʋʋgin.
23 Zugsɔb la yɛl ye,
“Man anɛ Wina'am onɛ bɛ yammin ma'aanɛɛ?”
“Ayei, m la'am anɛ Wina'am onɛ bɛ lallisa.
24 Sɔ' na nyaŋi nyɛ suak zin'igi su'a
ka man kʋ nyɛɛ o?”
Zugsɔb la yɛl si'em la.
“Mam pʋ pɛ'ɛl agɔl nɛ teŋin wʋsaa?”
Zugsɔb la yɛl si'em la.
25 “M wʋm nɔdi'esidib la yɛt si'em, banɛ pian'ad ziri nɛ m yʋ'ʋr la. Ba yɛt ye, M zaansim nɛ! M zaansim nɛ! Wina'am nie pa'alim! 26 Bʋndaar ka nɔdi'esidib banɛ pian'adi ba mɛŋ pʋtɛnda gban'e si'el la na basɛ? 27 Ba tɛn'ɛs ye zaansima banɛ ka ba yɛt taaba la na kɛ ka m nidib la tam man yʋ'ʋr, nwɛnɛ ba yaanamɛ da kpɛlim Baal pʋ'ʋsʋg ka tam man yɛla si'em la. 28 Kɛl ka nɔdi'es kanɛ zaansim la yɛl o zaansʋŋ la, amaa kɛl ka onɛ mɔr mam pian'ad la pian' li nɛ sida.
“Kikan'ar ka' li kɔn' nɛ kibielim?”
Zugsɔb la yɛl si'em la.
29 “Mam pian'ad la pʋ nwɛnɛ bugum?” Zugsɔb la yɛl si'em la, “Ka lɛn nwɛnɛ zan'ari bɛɛ hamma nwɛ'ɛd tampiinsi bu'aridaa?”
30 Zugsɔb la yɛl si'eli nwa ye, “Dinzugɔ m zan'as nɔdi'esidib banɛ zuud taaba pian'adi pian'ad ka niŋid wʋʋ li yinɛ man san'an na la.” 31 Zugsɔb la yɛl si'em la “Ɛɛn, m zan'as nɔdi'esidib banɛ pian'adi ba mɛŋ pian'ad ka yɛl ye, Zugsɔb pian'ʋkʋ nwa la” 32 Zugsɔb la yɛl ye, “Asida, m zan'as banɛ pian'ad ziri zaansima la. Ba pian'adi li yɛla tisidi m nidib la, ka ma'adi ba n kpɛn'ɛsid mɔɔg nɛ ba ziri la, la'am nɛ man pʋ tʋmmi ba bɛɛ gaŋi ba la. Ba pʋ kɛ ka nimbama nyɛ nyɔɔd baa bi'ela.” Zugsɔb la yɛl si'em la.
Ziri pian'ad nɛ ziri nɔdi'esidib la yɛla
33 “Nimbama bɛɛ nɔdi'es bɛɛ maanmaan ya'a ti bu'osif ye lababɔ ka Zugsɔb la nɔki tisi fɔ? Fʋn lɛbisim ye, ‘Ya anɛ ziidi tis Zugsɔb la, o na tʋki yaa bas.’ ” Zugsɔb la yɛl si'em la. 34 Nɔdi'es bɛɛ maanmaan bɛɛ onɛ wʋsa yɛl ye labakaŋa anɛ Zugsɔb la din la, m na namis dau kan la nɛ o yidim wʋsa. 35 Nɛ' ka ya wʋsa yinne-yinne yɛt o zua bɛɛ o sizua ye, “Zugsɔb la lɛbisʋg an bɔ? bɛɛ Zugsɔb la pian' ye bɔ?” 36 Amaa da lɛm pʋdigi Zugsɔb la labaar yɛla ya'asɛ, bɔzugɔ sɔ' wʋsa mɔr o mɛŋ labaari tisid, ka nɔki li ka li an Zugsɔb la din, ka tia'asid Wina'am Onɛ Vʋe la pian'ad, Zugsɔb onɛ an Paŋtita'ar Sɔb la, onɛ aan ti Wina'am. 37 Ya bu'osid nɔdi'esib la ye, Zugsɔb la lɛbis ye bɔɔ tisi fɔ? bɛɛ Zugsɔb la pian' ye bɔ? 38 Hali ya yɛt ye, Zugsɔb la labaari nwa. Zugsɔb la yɛl si'eli nwa, Ya kʋdim pian'adnɛ ye, Zugsɔb la labaari nwa, la'am nɛ man yɛli ya ye ya da mɔɔn ye, Zugsɔb la labaari nwa la. 39 Dinzugɔ, m na tami ya yɛla ka kadi ya yisi m san'an, nɛ tempʋkanɛ ka m tis yanam nɛ ya yaanam la wʋsa. 40 M na kɛ ka nyan dii ya, hali ka nyan kan buudi ka' linɛ ka ba na tam.