Zugsɔb la na kad na'abɛ'ɛdnam la saria
22
1 Zugsɔb la yɛl si'eli nwa ye, “Kem Juda na'ayin la mɔɔl labakaŋa anina ye, 2 ‘Wʋm Zugsɔb labaar, Juda na'aba, fʋn onɛ zin' David na'am gbauŋ zug la, fʋn nɛ fʋ na'ayikpɛm nɛ fʋ nidib banɛ kpɛn'ɛd za'anɔbama ni la. 3 Zugsɔb la yɛl si'eli nwa ye, Tʋmmi linɛ an sida ka dɔl suor. Faanmi onɛ ka ba faand o la, yisim o banɛ mugusid o la nu'usin. Da mugus saam nɛ pʋkɔnya nɛ kpiibis bɛɛ tʋmmi ba bɛ'ɛdɛ. Ka mɛ da kʋ nidib zaalim-zaalim zin'ikaŋa. 4 Ya ya'a gu'usid ka dɔlisid zi'elbama, na'anam banɛ zin' Na'ab David na'am gbauŋ zug la na dɔl na'ayir za'anɔya la ni kpɛn'; ba na ban'ad widi nɛ zaba tɛrekonam ka ba na'ayikpɛm nɛ ba nidib dɔlli ba. 5 Amaa Zugsɔb la yɛl ye, M pɔ ya, ya ya'a pʋ siak nɔzi'elbamaa, na'ayikaŋa na lieb dabɔɔg.’ ”6 Zugsɔb la yɛl Juda na'ab na'ayir la yɛla si'em nwa:
“La'am nɛ na'ayir la vɛnli nwɛnɛ Gilead n tisim,
ka nwɛnɛ Lebanon zuor linɛ tiisi vɛnl hali la,
m na kɛ ka li lieb pipirig,
wʋʋ tempʋbanɛ ka nidib kae.
7 M na tʋm banɛ san'amid ka ba kena,
sɔ' wʋsa na mɔr o zaba la'ad,
ka ba na nwaae li dasʋma la
lɔbi bas bugumin.
8 “Buudi bɛdegʋ nidib na dɔl tempʋkaŋa nii gat ka bu'osid taaba ye, Bɔ ka Zugsɔb la niŋ tempʋtita'ar kaŋa wala? 9 Ka ba na lɛbis ye, Ban zan'asi ba Zugsɔb Wina'am nɔnaar la ka pʋ'ʋsid winsieba la zug.”
Na'ab Josia biig Jehoahas (Sallum) yɛla
10 Da kum Na'ab Josia onɛ kpi la yɛlaa;
amaa lɛɛ kum o biig Jehoahas yɛla,
ban gban'e o lɔ'ɔŋ teŋ la,
bɔzugɔ, on kʋ lɛb na
bɛɛ o nyɛɛ o mɛŋ teŋ ya'asɛ.
11 Zugsɔb la yɛl Sallum onɛ ka ba buon Jehoahas la yɛla si'em nwa ye, onɛ an Josia biig ka di o saam na'am Juda teŋin, amaa ka lɛn ka' kpɛla la: “O kʋ lɛb na ya'asɛ. 12 O na kpi zin'ikanɛ ka ba gban'e o mɔri keŋ la; o kʋ lɛb teŋ kaŋa ni na ya'asɛ.”
13 Tɔɔg na paae onɛ mɛ' na'ayir
ka li ka' pʋpielim mɛɛbɔ,
o dɔɔd banɛ ka o mɛɛ sʋn'ʋl agɔl la yinɛ filʋŋin na,
o kɛ ka o teŋ la dim tʋmmi tisid o ka o pʋ yɔɔdi baa.
14 O yɛl ye, “M na mɛ na'ayitita'ari tisim mɛŋ
ka dɔɔd banɛ bɛɛ li zugin la yalim.”
Ala ka o maal takorbɛda kpɛn'ɛsi li,
ka kuaki li nɛ na'aziinr dalamma
ka taae li nɛ galʋʋrʋ wiiug.
15 “Fʋ ya'a mɔr na'aziinr bɛdegʋ,
li na nyaŋi kɛ ka fʋ sid an na'aba?
Fʋ saam da pʋ mɔr diib nɛ bʋnnuudaa?
O da tʋm linɛ an sʋm nɛ linɛ an sida
ala ka si'el wʋsa da an sʋ'ʋŋa tis o.
16 O da kpɛn'ɛd nɔŋ dim nɛ fara dim zug,
ka si'el wʋsa ken sʋ'ʋŋa.
Li ka' ala pa'an onɛ nɔŋi maa?”
Zugsɔb la yɛl si'em la.
17 “Amaa fʋ nini nɛ fʋ sʋnf wʋsa
gban'anɛ ye fʋ filim paam la'ad,
ka kʋʋd nimbanɛ pʋ maal si'ela;
fʋ mugusid nidib ka fɛndigi ba ya'am.”
Na'ab Josia biig Jehoyakim yɛla
18 Dinzugɔ, Zugsɔb la yɛl si'eli nwa Juda na'ab Jehoyakim onɛ an Na'ab Josia biig la ye,
“On na ti kpi saŋa si'a la
ba kʋ kaas o kʋʋr ye,
‘Abaa, m bierɛ! Abaa, m taʋn!’
Ba mɛ kʋ kaas o kʋʋr ye,
‘Abaa, m Zugraana! Abaa, Na'aba!’
19 Ba na mum o wʋʋ bʋŋ nɛ
ba na vuug o lɔb
Jerusalem za'anɔya la yiŋ sa.
20 Zɔm keŋ dʋ Lebanon zuoya zugʋ kaas kuŋ,
kɛl ka Basan dim wʋmi fʋ
kaasig Abarim teŋin,
ka fʋ taaba la wʋsa kpiya.
21 M daa sa'alif saŋa kanɛ ka fʋ daa tɛn'ɛs ye si'el wʋsa an sʋ'ʋŋa tisif la;
amaa fʋ daa yɛl ye, ‘M kʋ kɛlisɛ!’
Fʋ tʋʋmmi la lin yii fʋ na'akinnimin sa ti paae zina;
fʋ pʋ siaki m nɔɔrɛ.
22 Sisi'em na da'ae fʋ kɔnbkemnib la wʋsa mɔri keŋ
ka mɔri fʋ taaba la keŋ teŋ zʋŋ.
Ka fʋ yʋ'ʋn di nyan ka ba nyɛɛ fʋ gbin
fʋ bugusim kanɛ ka fʋ mɔr la zug.
23 Fʋn kanɛ bɛ ‘Lebanon,’
linɛ an na'ayiri bɛ Jerusalem la,
fʋ bɛ nɛ fʋ yin
yir kanɛ ka ba nɔk na'aziinr daadi mɛɛ li la,
li ya'a wʋmif, fʋ na ti ʋʋnsid hali,
li na zabidi nwɛnɛ pu'a na sa'ae nɛ!”
Na'ab Jehoyakim biig Jehoyakin yɛla
24 Zugsɔb la yɛl si'em la ye, “Asida sida ka m yɛtif ye, fʋn Jehoyakin onɛ an Juda na'ab ka an Jehoyakim biig la ya'a pʋn aannɛ baŋ kanɛ pidi m datiuŋ nu'ugin pa'annɛ m paŋ la, m naan fuoe nɛ fʋ basin. 25 M na nɔki fʋ tis banɛ ieedif ye ba kʋʋf ka fʋ zɔti ba la, m na nɔki fʋ tis Babilon na'ab Nebukadnɛza nɛ Babilon dim wʋsa. 26 M na lɔb fʋn nɛ fʋ ma kanɛ du'af la teŋgban si'a ni, zin'ikanɛ ka ba pʋ du'a ya sɔ'ɔsɔ la, ani ka ya wʋsa na kpi. 27 Ya kʋ lɛn lɛb teŋ kanɛ ka ya ya'am bɔɔd hali la.”
28 Ka m bu'os ye,
Dau kanɛ ka ba buon Jehoyakin la,
ba sid nɛ'ɛs o nɛ wʋʋ yʋkanɛ nwa'ae?
O anɛ lauk kanɛ ka sɔ' pʋ bɔɔdi li yɛllɛɛ?
Bɔ ka ba na nɔk on nɛ o biisi lɔb yiŋ,
teŋ kanɛ ka ba zi'?
29 O teŋgbauŋɔ, teŋgbauŋɔ, teŋgbauŋɔ, wʋm Zugsɔb la pian'ad!
30 Zugsɔb la yɛl si'eli nwa:
“Sɔm dau kaŋa yɛla digil, nwɛnɛ onɛ ka' biiga,
o kʋ mɔr vɔɔnri o bɛllim saŋaa,
o bisɔ' kʋ zin'in David na'am gbauŋ la zug
bɛɛ di na'am Juda teŋinɛ.”